شىمكەنت قالاسى تۇرعىن ءۇي باسقارماسىنىڭ I-توقساندا اتقارىلعان جۇمىستارى تۋرالى ەسەبى تىڭدالدى. باسقارما باسشىسى ازامات رىسجانوۆتىڭ ايتۋىنشا، 2021 جىلدىڭ I - توقساننىڭ قورىتىندىسى بويىنشا 2 796 ء(ار ايدا 932) ازامات تۇرعىن ءۇي كەزەگىنە تىركەلدى. شىمكەنت قالاسى بويىنشا تۇرعىن ءۇي الۋ تىزىمىندە 43 906 ازامات بار.
2021 جىلدىڭ باسىندا 976 وتباسىنى ارەندالىق پاتەرمەن قامتۋ جوسپارلانعان بولاتىن. بۇگىنگى تاڭدا جۇمىس ىستەيتىن جاستارعا 300 پاتەر بويىنشا تۇرعىن ءۇي كوميسسيانىڭ شەشىمى قابىلدانىپ، پاتەرلەردىڭ كىلتتەرى بەرىلىپ جاتىر. 1 ساۋىردە 161 پاتەر بويىنشا تۇرعىن ءۇي كوميسسياسىنىڭ شەشىمى شىقتى. بۇل رەتتە جەتىم بالالارعا 10 پاتەر، كوپبالالى وتباسىلارعا 106 پاتەر، حالىقتىڭ الەۋمەتتىك جاعىنان ءالسىز توبىنا 45 پاتەر بەرىلەدى. كوميسسيانىڭ كەلەسى وتىرىسى مامىر ايىندا وتەدى دەپ كۇتىلۋدە.
2021 جىلدىڭ سوڭىنا دەيىن كەزەكتە تۇرعان ازاماتتاردى باسپانامەن قامتاماسىز ەتۋ ءۇشىن 1 580 پاتەر ساتىپ الۋ جوسپارلانعان. پاتەر ساتىپ الۋعا 22,5 ملرد تەڭگە قارجى ءبولىندى. نارىقتاعى جەكە قۇرىلىس سالۋشىلاردىڭ ءتىزىمى انىقتالىپ، تالداۋ جۇمىستارى جۇرگىزىلۋدە.
جىل سوڭىنا دەيىن كرەديتتىك نەگىزدە 4 197 وتباسىنى پاتەرمەن قامتۋ كوزدەلۋدە. 2021 جىلى مامىر ايىندا جەرگىلىكتى بيۋدجەت ەسەبىنەن باستاپقى جارنا ءۇشىن، 300 ملن تەڭگەگە دەيىن ء(ار ازاماتقا 1 ملن تەڭگەگە دەيىن) تۇرعىن ءۇي سەرتيفيكاتتارىن بەرۋ جوسپاردا.
سونىمەن قاتار، 2021 جىلى جەرگىلىكتى بيۋدجەت ەسەبىنەن بولىنگەن 6 ملن تەڭگەگە «تۇرعىن ءۇي سەرتيفيكاتتارىن بەرۋ» مەملەكەتتىك كورسەتىلەتىن قىزمەتى اۆتوماتتاندىرىلدى. بۇل قىزمەت بويىنشا ازاماتتاردىڭ قۇجاتتارىن قابىلداۋ – اقپاراتتىق جۇيەنىڭ www.kezekte.kz سايتى ارقىلى جۇزەگە اسىرىلاتىن بولادى.
تۇرعىن ۇيلەر تەك زاڭ اياسىندا، ەلەكتروندى كەزەكپەن جۇزەگە اسىرىلىپ جاتقانىن حابارلايمىز.
شىمكەنت قالاسى اكىمدىگىنىڭ ءباسپاسوز قىزمەتى
