شىمكەنت قالاسىندا ەندى «ەگەمەن قازاقستان» كوشەسى بار. بۇگىن قاراتاۋ اۋدانى، بوزارىق ساياجايىندا «ەگەمەن قازاقستان» كوشەسى اتاۋىن بەرۋگە ارنالعان سالتاناتتى ءىس-شارا ءوتتى. جيىنعا حالىقارالىق "الاش" سىيلىعىنىڭ يەگەرى، جازۋشى-جۋرناليست، مارحابات بايعۇت، شىمكەنت قالاسى ءماسليحاتىنىڭ دەپۋتاتى نۇرعازى بۇحارباەۆ، «ەگەمەن قازاقستان» رەسپۋبليكالىق گازەتى اق باسقارما توراعاسى دارحان قىدىرالى قاتىستى.
نۇر-سۇلتان قالاسىندا «ەگەمەن قازاقستان» اتتى كوشە اشىلعان بولاتىن. ءجۇز جىلدان استام تاريحى بار رەسپۋبليكالىق باسىلىمنىڭ اتىنا ءۇشىنشى مەگاپوليستە كوشە اتاۋى بەرىلىپ وتىر. ۇلت رۋحانياتىن ۇلىقتاعان شىمكەنتتىكتەردىڭ بۇل باستاماسى «رۋحاني جاڭعىرۋدىڭ» جارقىن كورىنىسى دەسەك بولادى.
جازۋشى-جۋرناليست مارحابات بايعۇت
كوشە اتاۋىن بەرۋگە ارنالعان سالتاناتتى جيىندى اشىپ، قۇتتىقتاۋ ءسوز سويلەدى. قالامگەر ءجۇز جىلدان استام تاريحى بار، ەلىمىزدىڭ باس باسىلىمىنىڭ قۇرمەتىنە كوشە اتاۋى بەرىلۋى ۇلت رۋحانياتىندا ماڭىزى زور ءىس-شارا ەكەنىنە توقتالدى.
شىمكەنت قالاسى ءماسليحاتى مەن اكىمدىگىنىڭ بىرلەسكەن قاۋلىسىمەن 2021 جىلدىڭ 18 ناۋرىز كۇنى قالانىڭ اتاۋى جوق 325 كوشەسىنە قازاقتىڭ بەلگىلى وڭتۇستىكتەگى ەلدى-مەكەندەردىڭ اتاۋلارى، جەر-سۋ اتاۋلارى، رومان، ەپوس، حالىق اندەرى جانە تانىمال باسپالاردىڭ اتاۋلارى بەرىلدى. قاراتاۋ اۋدانى بوزارىق ساياجايىنداعى 65 كوشە «انا ءتىلى»، «جاس الاش»، «اباي جولى»، «قامار سۇلۋ»، «بالحاديشا»، «اقبىلەك» جانە تاعى باسقا اتاۋلارمەن اتالادى.
سونىمەن قاتار، ءماسليحات دەپۋتاتى ن.بۇحارباەۆ، «ەگەمەن قازاقستان» رەسپۋبليكالىق گازەتى» اق باسقارما توراعاسى د.قىدىرالى دە ءىس-شارانىڭ ماڭىزدىلىعىن اتاپ ءوتىپ، ىزگى تىلەكتەرىن جەتكىزدى.
شىمكەنت قالاسى اكىمدىگىنىڭ ءباسپاسوز قىزمەتى
