الماتى وبلىسىنىڭ كەگەن اۋىلىندا جاڭا ءورت ءسوندىرۋ دەپوسى اشىلدى. اشىلۋ راسىمىنە قر توتەنشە جاعدايلار ءمينيسترى، گەنەرال-لەيتەنانت شىڭعىس ءارىنوۆ، الماتى وبلىسىنىڭ اكىمى مارات سۇلتانعازيەۆ، الماتى وبلىسى توتەنشە جاعدايلار دەپارتامەنتىنىڭ باستىعى پولكوۆنيك داۋرەن ورازبەكوۆ، توتەنشە جاعدايلار دەپارتامەنتىنىڭ باسشى قۇرامى، جەكە قۇرامى، ازاماتتىق قورعاۋ ورگاندارىنىڭ ارداگەرلەرى، اۋدان تۇرعىندارى قاتىستى.
اتالعان نىسان قازاقستان تج مينيسترلىگىنىڭ ستراتەگيالىق جوسپارى اياسىندا جەرگىلىكتى بيۋدجەت قاراجاتى ەسەبىنەن سالىندى.
توتەنشە جاعدايلار ءمينيسترى شىڭعىس ءارىنوۆتىڭ ايتۋىنشا ازاماتتىق قورعاۋ جۇيەسىن نىعايتۋ جانە اۋىلدىق جەرلەردەگى قاۋىپسىزدىك دەڭگەيىن ارتتىرۋ مەملەكەت باسشىسى قويعان باسىم مىندەتتەردىڭ ءبىرى.
«اۋىلدىق جەرلەردە ورتكە قارسى ينفراقۇرىلىمدى دامىتۋ - حالىقتىڭ قاۋىپسىزدىگىن قامتاماسىز ەتۋدىڭ ماڭىزدى بولىگى. جاڭا ءورت ءسوندىرۋ دەپولارىنىڭ اشىلۋى توتەنشە جاعدايلارعا جەدەل ارەكەت ەتۋگە جانە ادام ءومىرىن ساقتاۋعا مۇمكىندىك بەرەدى»، – دەدى توتەنشە جاعدايلار ءمينيسترى شىڭعىس ءارىنوۆ.
سونداي-اق شىڭعىس ءارىنوۆ جاڭا ءورت ءسوندىرۋ دەپوسىنىڭ، زاماناۋي ءورت-قۇتقارۋ تەحنيكاسىنىڭ، ونىڭ ىشىندە ءورت اۆتوتسيستەرناسىنىڭ، جەدەل-قۇتقارۋ اۆتوكولىگىنىڭ جانە جول تالعامايتىن كولىكتىڭ كىلتتەرىن، مەرەكەلىك مەدالدار مەن العىس حاتتار تابىس ەتتى.
ولاردىڭ قاتارىندا «ترەكول» ماركالى اۆتوكولىگى، «كاماز» اتس-5-40 ماركالى ءورت ءسوندىرۋ اۆتوكولىگى، «Toyota Hilux» ماركالى جەڭىل اۆتوكولىگى بار.
اشىلۋ راسىمىنە قاتىسقان الماتى وبلىسىنىڭ اكىمى مارات سۇلتانعازيەۆ نىساننىڭ ءوڭىر ءۇشىن ايرىقشا ماڭىزعا يە ەكەنىن اتاپ ءوتتى.
«ازاماتتاردىڭ قاۋىپسىزدىگى – مەملەكەتتىڭ باستى مىندەتتەرىنىڭ ءبىرى. توتەنشە جاعدايلاردىڭ الدىن الۋ جانە ولاردىڭ سالدارىن ازايتۋ جۇيەسىن جەتىلدىرۋ – ستراتەگيالىق ماڭىزى بار ماسەلە. بۇگىن ىسكە قوسىلىپ وتىرعان ءورت ءسوندىرۋ دەپوسى – وبلىستا ازاماتتىق قورعاۋ ينفراقۇرىلىمىن جۇيەلى جاڭعىرتۋ جۇمىستارىنىڭ ناقتى ناتيجەسى»، – دەدى ءوڭىر باسشىسى.
جاڭا ءورت ءسوندىرۋ دەپوسى جالپى سانى 28 مىڭنان استام حالقى بار 12 اۋىلدىق وكرۋگ پەن 34 ەلدى مەكەندى ورتتەن قورعاۋدى قامتاماسىز ەتەدى. عيمارات مودۋلدىك تەحنولوگيا بويىنشا سالىنعان، بۇل قاجەت بولعان جاعدايدا نىساندى جەدەل تۇردە كەڭەيتۋگە جانە جاڭعىرتۋعا مۇمكىندىك بەرەدى. دەپو تاۋلىك بويى قىزمەت اتقارۋعا قاجەتتى بارلىق جاعدايمەن تولىق جابدىقتالعان: زاماناۋي بايلانىس قۇرالدارى بار ديسپەتچەرلىك پۋنكت، ەكى ءورت ءسوندىرۋ اۆتوكولىگىنە ارنالعان گاراجدار، سانيتارلىق-تۇرمىستىق ءۇي-جايلار، اس ءۇي جانە دەمالىس بولمەلەرى بار. سونىمەن قاتار سپورتتىق جاتتىعۋ قۇرال-جابدىقتارمەن جاراقتالعان «Batyr Team» جاتتىعۋ ايماعى بار.
ءىس-شارا اياسىندا نىساننىڭ قۇرىلىسىنا جوعارى جاۋاپكەرشىلىكپەن قاتىسىپ، بەلسەندىلىك تانىتقان ازاماتتار تجم ۆەدومستۆولىق ناگرادالارىمەن ماراپاتتالدى.
اتاپ ايتقاندا، قازاقستان رەسپۋبليكاسىنىڭ توتەنشە جاعدايلار مينيسترلىگىنىڭ العىس حاتىمەن «كەگەن ورمان شارۋاشىلىعى» مەملەكەتتىك مەكەمەسىنىڭ باسشىسى ايبولات سولتانعازيەۆ، توتەنشە جاعدايلار مينيسترلىگىنىڭ «30 جىل» مەدالىمەن كەگەن اۋدانىنىڭ اكىمى نۇرباقىت تەڭىزباەۆ، «AS Karasay» جاۋاپكەرشىلىگى شەكتەۋلى سەرىكتەستىگىنىڭ ديرەكتورى مەدەت ومارحانوۆ ماراپاتتالدى.
