ءماسليحات تاراتىلعان جاعدايدا دەپۋتاتتارعا تولەماقى تولەنەتىنىنە كەپىلدىك بەرىلەدى. بۇل نورما مەملەكەتتىك باسقارۋ جانە جەرگىلىكتى ءوزىن-ءوزى باسقارۋ ماسەلەلەرىنە قاتىستى ماجىلىستە قارالىپ جاتقان زاڭ جوباسىندا كوزدەلگەن، دەپ حابارلايدى «ادىرنا» ءتىلشىسى.
دەپۋتات ەكاتەرينا سمىشلياەۆانىڭ سوزىنشە، قۇجات ءماسليحات دەپۋتاتتارىنىڭ الەۋمەتتىك كەپىلدىكتەرىن كۇشەيتەدى.
«اتاپ ايتقاندا، ءىس-ساپار شىعىندارىن وتەۋ قاراستىرىلعان. سونداي-اق ءماسليحات تاراتىلعان جاعدايدا تۇراقتى نەگىزدە جۇمىس ىستەيتىن دەپۋتاتتارعا تولەماقى بەرىلەدى»، – دەدى ول.
بۇل تولەمدەر دەپۋتات وكىلەتتىگى توقتاتىلعان كۇننەن باستاپ، 3 اي مەرزىمگە بەرىلەدى. تولەم ءتارتىبى ءماسليحات رەگلامەنتىنە سايكەس رەتتەلەدى.
سونداي-اق زاڭ جوباسىندا ءماسليحات دەپۋتاتتارىنا قاتىستى جاۋاپكەرشىلىك شارالارى دا قاراستىرىلعان. ولارعا ءبىر سەسسيا بويى داۋىس بەرۋ قۇقىعىنان ايىرۋ جانە سەسسياعا قاتىسۋ قۇقىعىنان شەكتەۋ جازاسى ۇسىنىلادى. ال تۇراقتى نەگىزدە جۇمىس ىستەيتىن دەپۋتاتتارعا قوسىمشا رەتىندە ءبىر كۇندىك جالاقىسىنان ايىرۋ تۇرىندەگى تارتىپتىك جازا قولدانىلۋى مۇمكىن.
