بۇگىن شىمكەنت قالاسىندا پاندەمياعا بايلانىستى قۇرىلعان جەدەل شتابتىڭ كەزەكتى وتىرىسى ءوتتى. جيىندا مەگاپوليستىڭ COVID-19-عا قارسى ءىس-قيمىلدىڭ جۇيەلى ماسەلەلەرى مەن كەشە 1 ءساۋىر كۇنى ەلىمىزدەگى ەپيدەميولوگيالىق احۋالعا بايلانىستى وتكەن كەڭەس بارىسىندا مەملەكەت باسشىسىنىڭ بەرگەن تاپسىرمالارىنىڭ ورىندالۋ بارىسى قاراستىرىلدى.
شىمكەنتتە ەپيدەميولوگيالىق جاعدايدىڭ كۇردەلەنە تۇسكەنىن ايتقان قالا باسشىسى تۇرعىندار اراسىندا ماسكا رەجيمى مەن الەۋمەتتىك قاشىقتىقتى قاتاڭ ساقتاۋ بويىنشا ءتۇسىندىرۋ جۇمىستارىن كۇشەيتۋدى جانە قالا تۇرعىندارىن ادام كوپ شوعىرلانعان جەرگە بارۋدان باس تارتۋعا شاقىردى.
«سوڭعى ەكى تاۋلىكتە شاھاردا ىندەت جۇقتىرعان 147 ناۋقاس تىركەلگەن. بۇل كورسەتكىش كۇن سايىن ارتىپ وتىر. سوندىقتان شىمكەنت قالاسى كوروناۆيرۋستىڭ تارالۋى بويىنشا «سارى ايماققا» ەندى. بۇل قاۋىپتى ىندەتتەن قورعانۋدىڭ بىردەن-ءبىر جولى كوروناۆيرۋسقا قارسى ۆاكتسيناتسيانى قابىلداۋ. سوندىقتان سالا ماماندارى وسى باعىتتاعى جۇمىستاردى كۇشەيتىپ، حالىق اراسىندا ءتۇسىندىرۋ جۇمىستارىن كۇشەيتۋ كەرەك»،-دەدى قالا اكىمى.
دەنساۋلىق ساقتاۋ باسقارماسىنىڭ باسشىسى ب.پوزيلوۆتىڭ حابارلاۋىنشا، بۇگىندە شىمكەنت قالاسىندا جالپى كوروناۆيرۋسقا قارسى ەكپەنىڭ 1-ءشى كومپونەنتى 7400 ادامعا، ال، ەكىنشى كومونەنتى 3385 ادامعا ەگىلگەن ەكەن. سونىمەن قاتار ول ينفەكتسياعا قارسى ۆاكتسيناتسيالاۋ جۇمىستارى قالاداعى 26 ەمدەۋ مەكەمەسىندە جانە دەمالىس كۇندەرى دە جۇرگىزىلىپ جاتقانىن ايتتى. بۇعان قوسا قوسىمشا 10 باستاپقى مەديتسينالىق-سانيتاريالىق العاشقى كومەك كورسەتۋ ۇيىمدارىندا ەكپە جاساۋ ءۇشىن ارنايى كابينەتتەر دايىندالعان.
قالا اكىمى مۇرات ايتەنوۆ قالادا كوروناۆيرۋسپەن كۇرەستىڭ 3 ستسەناريى ازىرلەنگەنىن ايتىپ، وتكەن جىلعى قاتەلىكتەردىڭ ورىن الماۋىن باسا ايتتى.
«قازىر ا ستسەناريى بويىنشا جۇمىس جۇرگىزىلىپ جاتىر. بۇل ستسەناري بويىنشا 1380 توسەك-ورىن دايىن. B جانە س ستسەناريلەرى بويىنشا 5 مىڭ توسەك-ورىنعا جەتكىزۋىمىز كەرەك. ءار ايماققا جەتكەن كەزدە ءتيىستى قۇرال-جابدىقتارمەن، ءدارى-دارمەكتەرمەن قامتاماسىز ەتۋ باس دارىگەرلەردىڭ مىندەتى.
سونىمەن بىرگە ولار ناۋقاستاردى قابىلداۋ الگوريتىمىن ازىرلەۋى ءتيىس. ادامداردىڭ جينالىپ قالۋىن جانە كەزەك كۇتپەۋىن قامتاماسىز ەتۋى كەرەك. دايىندىقتار پىسىقتالىپ، كەمشىلىكتەر انىقتالىپ، شەشىم جولدارى قارالسىن»،-دەدى م.ايتەنوۆ.
وسى تۇستا قالانىڭ باس دارىگەرى كوروناۆيرۋس ينفەكتسياسىنا شالدىققان ناۋقاستاردى ەمدەۋ ءۇشىن قالاداعى مەديتسينالىق ۇيىمداردا قاجەتتى جاعدايدىڭ بارلىعى جاسالعانىن اتاپ ءوتتى. ول مەديتسينالىق ۇيىمداردا 900 ملن. تەڭگەنىڭ ءدارى-دارمەك قورىنىڭ بار ەكەنىن، بۇل ەكى ايعا دەيىن جەتەتىنىن ءمالىم ەتتى. سونىمەن قاتار، قالا تۇرعىندارىنا قىزمەت كورسەتەتىن 11 پتر زەرتحاناسى جۇمىس جاساۋدا. زەرتحانالاردا تاۋلىگىنە بارلىعى 6 270 تەست جاساۋ قۋاتتىلىعى بار.
ايتا كەتەيىك، وتكەن تاۋلىكتە COVID-19 ينفەكتسياسىن جۇقتىرعان 96 جاعداي تىركەلدى. ال، قالادا جىل باسىنان بەرى 1440 جاعداي تىركەلگەن. بۇگىنگى كۇنى قالادا 1 380 توسەك - ورىن بار ونىڭ 1067 توسەك – ورنى بوس. جۇقپالى جانە كارانتيندىك اۋرۋحانالاردا 313 ناۋقاس ەم قابىلداۋدا. اۋرۋحاناداعى توسەك ورىندار تولىمدىلىعى 22% قۇرايدى.
شىمكەنت قالاسى اكىمدىگىنىڭ ءباسپاسوز قىزمەتى
