بۇل تۋرالى بۇگىن اقپاراتتىق-كوممۋنيكاتسيالىق ورتالىعىندا وتكەن بريفينگتە شىمكەنت قالالىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ەرجان جولداسوۆ ءمالىم ەتتى.
– وسى جىلدىڭ اقپان ايىندا اۋدان اكىمدىكتەرىمەن بىرلەسىپ، قالا كوشەلەرىنە زەردەلەۋ جۇمىستارىن جۇرگىزدىك. ناتيجەسىندە اۆتوموبيل جولدارى سالاسىندا 168 نىساندى، ياعني، 295,3 شاقىرىم جولدار مەن كوشەلەرگە قۇرىلىس-جوندەۋ جۇمىستارىنىڭ سحەماسى دايىندالدى. ياعني، 2021 جىلى اۆتوكولىك جولدارىنىڭ جاقسى جانە قاناعاتتانارلىق جاعدايداعى ۇلەسىن 63,6 پايىزعا جەتكىزۋدى جوسپارلاپ وتىرمىز، – دەدى ە.جولداسوۆ.
ەرجان جاقسىلىقۇلىنىڭ سوزىنشە، بيىل 21,8 شاقىرىم ماگيسترالدى كوشەلەر جوندەلەدى. ولار – رەسپۋبليكا داڭعىلى 5,0 شاقىرىم، ت.رىسقۇلوۆ كوشەسى 4,1 شاقىرىم، ع.يلياەۆ كوشەسى 2,7 شاقىرىم، ب.مومىشۇلى كوشەسى 2,1 شاقىرىم، ج.تاشەنوۆ كوشەسى 1,7 شاقىرىم، ج.شاياحمەتوۆ كوشەسى 1,6 شاقىرىم، اقنازار حان كوشەسى 2,3 شاقىرىم جانە كلارا-تسەتكين كوشەسى 2,3 شاقىرىم. دەگەنمەن 2021 جىلى جول جوندەۋ جۇمىستارى بارىسىندا شالعاي اۋداندارداعى ىشكى ورامدىق كوشەلەردىڭ قۇرىلىسىنا باسىمدىق بەرىلەدى.
ءباسپاسوز ماجىلىسىندە بەلگىلى بولعانداي، قالادا جاياۋ جۇرگىنشىلەردىڭ قاۋىپسىزدىگىن قامتاماسىز ەتۋ ماقساتىندا پروەكتسيالىق وتكەلدەر ورناتۋ جۇمىستارى جۇرگىزىلۋدە. بۇل وتكەلدەر پيلوتتىق جوبا رەتىندە سىپىرعان اتا كوشەسى مەن ءال-فارابي كوشەسىنىڭ قيىلىسى جانە تەمىرلان تاس جولىنداعى «Satti zhol» جانار-جاعارماي بەكەتىنىڭ ماڭىنا قويىلعان. اتالعان جوبا اياسىندا بيىل 15 بەلسەندى جاياۋ جۇرگىنشىلەر وتكەلى ورناتىلادى.
سونداي-اق، جول كەپتەلىسىن شەشۋ ماقساتىندا 8 كوشە قيىلىسىنا (ت.رىسقۇلوۆ–ج.شاياحمەتوۆ-1, ج.شاياحمەتوۆ–ارعىنبەكوۆ-2, ارعىنبەكوۆ–بايتەرەكوۆ-1, سىپىرعان ءاتا–ال-فارابي-1, ارعىنبەكوۆ–وتەگەنوۆ-1, سىپىرعان اتا–تەمىرلان تاس جولى-1, ت.رىسقۇلوۆ–ادىربەكوۆ-1, ت.رىسقۇلوۆ–قازيەۆ-2) وڭ جاق وتكەل سالۋ جوسپارلانعان.
ايتا كەتەيىك، قالادا جالپى كوشەلەردىڭ ۇزىندىعى 3 247,6 شاقىرىمدى قۇراپ وتىر. ال ايالداما سانى – 1 886. وعان قوسا بيىل جاڭادان 256 ايالداما ورناتىلادى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – ەرنار مامىر
