قوسشى اۋىلىن وبلىستىق ماڭىزى بار قالا ساناتىنا جاتقىزۋ تۋرالى پرەزيدەنت جارلىعىنىڭ جوباسى قوعامدىق تالقىلاۋعا ۇسىنىلدى، دەپ حابارلايدى "ادىرنا" ۇلتتىق پورتالى.
ەگەر جارلىققا مەملەكەت باسشىسى قول قويسا، اقمولا وبلىسى، تسەلينوگراد اۋدانى، قوسشى اۋىلى رەسمي تۇردە وبلىستىق ماڭىزى بار قالا ساناتىنا جاتقىزىلادى.
جارلىق جوباسىنا جاسالعان تۇسىندىرمە جازبادا قوسشىنىڭ قازىرگى جاعدايى مەن دامۋ پەرسپەكتيۆالارى ونىڭ مارتەبەسىن كوتەرۋ قاجەتتىلىگىن كورسەتەتىندىگى اتالعان. اۋىلعا قالا مارتەبەسىن بەرۋ - جىلجىمايتىن مۇلىكتىڭ وتىمدىلىگىن، كاسىپكەرلەر مەن تۇرعىنداردىڭ بيزنەستى قۇرۋ مەن دامىتۋ ءۇشىن نەسيەلىك رەسۋرستارعا قول جەتىمدىلىگىن ارتتىرادى.
قوعامدىق تالقىلاۋ 13 مامىرعا دەيىن جالعاسادى. جارلىق جوباسىن مىنا جەردە تالقىلاۋعا بولادى.
2018 جىلى وبلىستىڭ بۇرىنعى اكىمى ماليك مۋرزالين:
"ەلورداعا قوسىلۋدان قوسشىداعى ءومىر جاقسارمايدى. ەگەر ءبىز بۇگىن استاناعا قوسشىنى قوسساق، ەرتەڭ قوياندى، تالاپكەر، قاراوتكەلدىڭ تۇرعىندارى دا سول سۇراقتى قويادى، ءبىزدى دە استاناعا بەرىڭىزدەر دەيدى. بۇل لوگيكالىق تىزبەكتى جالعاستىرا سىزدەر بۇكىل ەلدى ءبىر استاناعا بىرىكتىرۋدى قالايسىزدار ما؟ ول - مۇمكىن ەمەس!", دەدى.
2020 جىلى وبلىستىڭ قازىرگى اكىمى ەرمەك مارجىقپاەۆ قوسشى اۋىل رەتىندە بۇدان بىلاي بولا المايدى، ەلدى مەكەن وبلىستىق ماڭىزى بار قالاعا اينالۋى مۇمكىن دەدى.
نۇر-سۇلتان قالاسىنىڭ اكىمى التاي كولگىنوۆ قوسشىنى قالاعا قوسۋ جوسپارلارى جوق ەكەنىن حابارلادى.
قوسشى اۋىلى - تسەلينوگراد اۋدانىنىڭ اۋماعىندا ورنالاسقان ەلدى مەكەن. جالپى اۋدانى 2413 گەكتاردى قۇرايدى. رەسمي تۇرعىنى - 50 600 ادام. قوسشى اۋىلى - استانانىڭ وڭتۇستىك باتىسىندا ورنالاسقان ايماقتاعى ەڭ ءىرى ەلدى مەكەندەردىڭ ءبىرى.
"ادىرنا" ۇلتتىق پورتالى
