Qosshy aýylyn oblystyq mańyzy bar qala sanatyna jatqyzý týraly Prezıdent jarlyǵynyń jobasy qoǵamdyq talqylaýǵa usynyldy, dep habarlaıdy "Adyrna" ulttyq portaly.
Eger jarlyqqa Memleket basshysy qol qoısa, Aqmola oblysy, elınograd aýdany, Qosshy aýyly resmı túrde oblystyq mańyzy bar qala sanatyna jatqyzylady.
Jarlyq jobasyna jasalǵan túsindirme jazbada Qosshynyń qazirgi jaǵdaıy men damý perspektıvalary onyń mártebesin kóterý qajettiligin kórsetetindigi atalǵan. Aýylǵa qala mártebesin berý - jyljymaıtyn múliktiń ótimdiligin, kásipkerler men turǵyndardyń bıznesti qurý men damytý úshin nesıelik resýrstarǵa qol jetimdiligin arttyrady.
Qoǵamdyq talqylaý 13 mamyrǵa deıin jalǵasady. Jarlyq jobasyn myna jerde talqylaýǵa bolady.
2018 jyly oblystyń burynǵy ákimi Malık Mýrzalın:
"Elordaǵa qosylýdan Qosshydaǵy ómir jaqsarmaıdy. Eger biz búgin Astanaǵa Qosshyny qossaq, erteń Qoıandy, Talapker, Qaraótkeldiń turǵyndary da sol suraqty qoıady, bizdi de astanaǵa berińizder deıdi. Bul logıkalyq tizbekti jalǵastyra sizder búkil eldi bir astanaǵa biriktirýdi qalaısyzdar ma? Ol - múmkin emes!", dedi.
2020 jyly oblystyń qazirgi ákimi Ermek Marjyqpaev Qosshy aýyl retinde budan bylaı bola almaıdy, eldi meken oblystyq mańyzy bar qalaǵa aınalýy múmkin dedi.
Nur-Sultan qalasynyń ákimi Altaı Kólginov Qosshyny qalaǵa qosý josparlary joq ekenin habarlady.
Qosshy aýyly - elınograd aýdanynyń aýmaǵynda ornalasqan eldi meken. Jalpy aýdany 2413 gektardy quraıdy. Resmı turǵyny - 50 600 adam. Qosshy aýyly - astananyń ońtústik batysynda ornalasqan aımaqtaǵy eń iri eldi mekenderdiń biri.
"Adyrna" ulttyq portaly
