جەتىسۋ وبلىسىندا «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ اياسىندا جالپى سانى 59 نىسان سالىندى. اتاپ ايتقاندا، 2023-2025 جىلدار ارالىعىندا 15 دارىگەرلىك امبۋلاتوريا، 39 فەلدشەرلىك-اكۋشەرلىك جانە 5 مەديتسينالىق پۋنكتتىڭ قۇرىلىسى اياقتالدى.
وبلىستىق دەنساۋلىق ساقتاۋ باسقارماسىنىڭ مالىمەتىنشە، مەديتسينالىق كومەكتىڭ قادامدىق قولجەتىمدىلىگىن قامتاماسىز ەتۋ جانە شالعايداعى اۋىلداردى مەديتسينالىق قىزمەتپەن قامتۋ ماقساتىندا قولعا الىنعان ۇلتتىق جوبا اياسىندا كەربۇلاق اۋدانىندا - 17, پانفيلوۆ - 11, الاكول - 9, قاراتال - 6, ەسكەلدى - 5, اقسۋ مەن كوكسۋ اۋداندارىندا – 4-تەن، سارقان اۋدانىندا 3 دەنساۋلىق ساقتاۋ نىسانى بوي كوتەردى.
سولاردىڭ ءبىرى – وتكەن جىلدىڭ سوڭىندا قۇرىلىسى اياقتالىپ، وسى جىلدىڭ قاڭتار ايىندا اشىلعان پانفيلوۆ اۋدانى ديحانقايرات اۋىلىنداعى جاڭا فەلدشەرلىك-اكۋشەرلىك پۋنكت. اتاپ ايتقاندا، بۇل اۋىلدا 1 200 تۇرعىنى بار. بۇعان دەيىنگى مەديتسينالىق مەكەمە 1980 جىلى سالىنعان ەسكى عيمارات بولعاندىقتان، قىزمەت كورسەتۋدە قولايسىز بولاتىن. جاڭادان پايدالانۋعا بەرىلگەن عيمارات قاجەتتى مەديتسينالىق قۇرالدارمەن جابدىقتالىپ، زاماناۋي ينجەنەرلىك جۇيەلەرمەن تولىق قامتىلعان. مۇندا قابىلداۋ بولمەسى، الدىن-الا قابىلداۋ جانە كۇندىزگى قابىلداۋ بولمەلەرى، ەمدەۋ بولمەلەرى، ۆاكتسيناتسيا كابينەتىجانە باسقا دا قاجەتتى بولمەلەر قاراستىرىلعان.
جاڭا فاپ-تا 3 مەديتسينا مامانى جۇمىس ىستەيدى. سولاردىڭ ءبىرى وتىز جىلدان استام تاجىريبەسى بار فەلدشەر گۋلينۇر قامباروۆا جاڭا عيماراتتى كوپتەن كۇتكەنىن جەتكىزدى.
- ءبىز بۇرىنعى عيماراتتى كومىرمەن جىلىتىپ، تار بولمەلەردە قولايسىز جاعدايدا تۇرعىندارعا مەديتسينالىق كومەك كورسەتىپ كەلدىك. زاماناۋي مەديتسينالىق جابدىقتار جوق بولعاندىقتان، تۇرعىنداردى كوبىنە اۋدان ورتالىعىنا جىبەرەتىنبىز. قازىر جاڭا فەلدشەرلىك-اكۋشەرلىك پۋنكتتە العاشقى كومەك كورسەتۋگە، ەمدىك شارالار جۇرگىزۋگە قاجەتتى جابدىقتاردىڭ بارلىعى بار. مەكەمەنىڭ ەلەكترمەن جىلىتىلاتىنى، كەڭ، جارىق ءارى قولايلى بولعانى قۋانتادى، - دەيدى ول.
بۇل قۋانىشتى جاڭالىققا اۋىل تۇرعىندارى دا ريزا.
- اۋىلىمىزدا جاڭا فەلدشەرلىك-اكۋشەرلىك پۋنكت اشىلىپ وتىر. بۇرىن دا وسىنداي مەكەمە بولعان، بىراق ول تار، ەسكى عيمارات ەدى. قازىرگى فاپ كەڭ، قاجەتتى ەمدىك بولمەلەرى جەتكىلىكتى، زاماناۋي جابدىقتارى بار. اۋىل تۇرعىندارىنىڭ دەنساۋلىعىن ساقتاۋعا وسىنداي قولايلى جاعداي جاسالعانىنا قۋانىشتىمىز، - دەيدى اۋىل تۇرعىنى بايان كوبەنباەۆا.
اتاپ وتسەك، ۇلتتىق جوباعا پانفيلوۆ اۋداندىق كوپسالالى اۋرۋحانا دا ەنگىزىلگەن. قازىر اتالعان نىساننىڭ قولدانىستاعى عيماراتىن قايتا جاڭارتۋ مەن جاڭا كورپۋسىن سالۋ بويىنشا قۇرىلىس جۇمىستارى جۇرگىزىلۋدە.
