اقمولا وبلىسى كراسنىي يار اۋىلىندا وزىنە قول سالعاندار بولەك جەرلەنەدى، دەپ حابارلايدى “ادىرنا” ۇلتتىق پورتالى ەۋرازيا ارناسىنا سىلتەمە جاساپ.
اقمولا وبلىسى كراسنىي يار اۋىلىنىڭ ماڭىندا تەك وزىنە قول سالعاندار جەرلەنەتىن زيرات بار. سىرتتاي قاراعاندا باسقا زيراتتاردان ەش ايىرماشىلىعى بولماسا دا، 2008 جىلدان باستاپ بۇل جەرگە وزىنە قول سالعاندار جالپى مازاردان بولەك جەرلەنىپ كەلەدى. قازىر مۇنداعى مولالار سانى 15-كە جەتكەن. يمامدار جەرگىلىكتى اقساقالدارمەن اقىلداسا كەلە وسىنداي شەشىمگە كەلىپتى.
ء“بىر اكە-شەشە ءوزىنىڭ ۇل-قىزى وزدەرىنە قارسى شىعىپ، وزدەرىنە قول جۇمسايمىز دەپ قورقىتقان كەزدە وسى جەردى كورسەتىپتى، ۇل-قىزى قاتەلىكتەرىن ءتۇسىنىپ كەشىرىم سۇراپتى. اكە شەشەسى بىزگە كەيىن وتباسىمىزعا وسىنداي ۇلكەن تاربيە بولدى دەپ العىستارىن ايتىپ جاتتى”، – دەيدى كراسنىي يار اۋىلى مەشىتىنىڭ باس يمامى ناۋان مۇتالوۆ.
بۇل ماسەلە پارلامەنت قابىرعاسىندا دا ءجيى كوتەرىلەدى. بىرنەشە اي بۇرىن ءماجىلىس دەپۋتاتى ەرلان سمايلوۆ قازاقستاندا جىل سايىن 4000 مىڭعا جۋىق ادام سۋيتسيد جاساپ باقيلىق بولاتىنىن مالىمدەگەن بولاتىن.
“ەلىمىز سۋيتسيد ەڭ كوپ جاسالاتىن 20 مەملەكەتتىڭ ىشىنە كىرەدى. قازاقستاندا كۇن سايىن 8-11 ادام وزىنە قول جۇمساپ كوز جۇمادى. تاۋلىگىنە 9-دان 16-عا دەيىن كىسى سۋيتسيد جاساۋعا تالپىنادى. بۇل دەگەن سۇمدىق ادام شىعىنى”، – دەدى دەپۋتات ەرلان سمايلوۆ.
سونىمەن قاتار، ءدىن قىزمەتكەرلەرىنىڭ ايتۋىنشا، سۋيتسيد جاساعانداردى بولەك جەرلەۋ وزگەلەرگە ەسكەرتۋ ىسپەتتى.
