شىمكەنت قالاسىنداعى №1 قالالىق كلينيكالىق اۋرۋحاناسىنىڭ دارىگەرى اسحات حاميدۋلين لور اعزالارعا ەندوسكوپيالىق ادىسپەن وتا جاساۋدا.
2019 جىلى اشىلعان وتورينولارينگولوگيالىق ءبولىمىنىڭ قۇرىلۋىنا دارىگەردىڭ ءوزى اتسالىسقان. ەلىمىزدەگى ساناۋلى وتونەۆرولوگتاردىڭ ءبىرى - اسحات حاميدۋلين بۇگىندە اتالعان ءبولىمنىڭ مەڭگەرۋشىسى.
دارىگەردىڭ ايتۋىنشا، جاڭا ادىسپەن جاسالعان وتانىڭ ەرەكشەلىگى ناۋقاستىڭ دەنەسىنە پىشاق تيگىزبەي، تەك اپپاراتتىڭ كومەگىمەن جۇزەگە اسادى ەكەن. بۇل پاتسيەنتتەردىڭ ستاتسيونارلىق ەمىن دە جەدەلدەتەدى ەكەن.
«بۇل وتانىڭ ءتيىمدى جەرى – مۇرىننىڭ قۋىستارىنا دەنەنى تىلمەي بارا الامىز. ەستۋ قابىلەتتەرىن جاقسارتاتىن جانە مۇرىنمەن دەمالۋدى قالپىنا كەلتىرەتىن وپەراتسيالاردىڭ بارلىق ءتۇرىن جاسايمىز. تاماقتى دا ەمدەيمىز. ءوز تاجىريبەمدە وفتالمولوگ جانە نەيروحيرۋرگ دارىگەرلەرىمەن تىعىز جۇمىس جاساعاندىقتان كوز كانالدارى ارقىلى دا وتا جاسايمىز»،-دەيدى مامان.
مەديتسينا سالاسىندا ون جىلدان استام ەڭبەك ءوتىلى بار دارىگەر وتورينولارينگولوگيالىق اۋرۋلاردى حيرۋرگيالىق وپەراتسيانىڭ كومەگىمەن ەمدەۋگە بولاتىنىن ايتادى. 2019 جىلدان بەرى 200-دەن استام ناۋقاسقا وپەراتسيا جاسالعان. دارىگەر تۇرعىندارعا سمارتفون سىندى جاڭا تەحنولوگيانى قولدانعاندا دەنساۋلىققا كەلەر زياندى ارەكەتتەن قورعانۋدى ۇمىتپاۋعا شاقىردى.
لور ءبولىمىنىڭ اشىلۋى ناۋقاستارمەن قاتار، جاس مامانداردىڭ تاجىريبە الاڭىنا اينالدى. بۇگىندە وڭتۇستىك قازاقستان مەديتسينا اكادەمياسىنىڭ رەزيدەنتتەرى وسى بولىمدە بىلىمدەرىن شىڭداپ ءجۇر. بۇعان دەيىن قۇلاق پەن مۇرىنعا قاتىستى وتالار الماتى مەن نۇر-سۇلتان قالالارىندا جاسالىپ كەلسە، ەندى شىمكەنتتىكتەر دە قالاداعى №1 قالالىق كلينيكالىق اۋرۋحاناسىنىڭ دارىگەرلەرىنىڭ كومەگىنە جۇگىنە الادى.
شىمكەنت قالاسى اكىمدىگىنىڭ ءباسپاسوز قىزمەتى
