Şymkent qalasyndaǧy №1 qalalyq klinikalyq auruhanasynyŋ därıgerı Ashat Hamidulin lor aǧzalarǧa endoskopiialyq ädıspen ota jasauda.
2019 jyly aşylǧan otorinolaringologiialyq bölımınıŋ qūryluyna därıgerdıŋ özı atsalysqan. Elımızdegı sanauly otonevrologtardyŋ bırı - Ashat Hamidulin bügınde atalǧan bölımnıŋ meŋgeruşısı.
Därıgerdıŋ aituynşa, jaŋa ädıspen jasalǧan otanyŋ erekşelıgı nauqastyŋ denesıne pyşaq tigızbei, tek apparattyŋ kömegımen jüzege asady eken. Būl pasientterdıŋ stasionarlyq emın de jedeldetedı eken.
«Būl otanyŋ tiımdı jerı – mūrynnyŋ quystaryna denenı tılmei bara alamyz. Estu qabıletterın jaqsartatyn jäne mūrynmen demaludy qalpyna keltıretın operasiialardyŋ barlyq türın jasaimyz. Tamaqty da emdeimız. Öz täjıribemde oftalmolog jäne neirohirurg därıgerlerımen tyǧyz jūmys jasaǧandyqtan köz kanaldary arqyly da ota jasaimyz»,-deidı maman.
Medisina salasynda on jyldan astam eŋbek ötılı bar därıger otorinolaringologiialyq aurulardy hirurgiialyq operasiianyŋ kömegımen emdeuge bolatynyn aitady. 2019 jyldan berı 200-den astam nauqasqa operasiia jasalǧan. Därıger tūrǧyndarǧa smartfon syndy jaŋa tehnologiiany qoldanǧanda densaulyqqa keler ziiandy äreketten qorǧanudy ūmytpauǧa şaqyrdy.
Lor bölımınıŋ aşyluy nauqastarmen qatar, jas mamandardyŋ täjıribe alaŋyna ainaldy. Bügınde Oŋtüstık Qazaqstan medisina akademiiasynyŋ rezidentterı osy bölımde bılımderın şyŋdap jür. Būǧan deiın qūlaq pen mūrynǧa qatysty otalar Almaty men Nūr-Sūltan qalalarynda jasalyp kelse, endı şymkenttıkter de qaladaǧy №1 qalalyq klinikalyq auruhanasynyŋ därıgerlerınıŋ kömegıne jügıne alady.
Şymkent qalasy äkımdıgınıŋ baspasöz qyzmetı
