الماتى وبلىسىندا ءبىلىم بەرۋ سالالارىندا 34 مەملەكەتتىك قىزمەت بەلگىلەنگەن. ونىڭ 30-ى اۆتوماتتاندىرىلعان، 4-ەۋى قاعاز تۇرىندە كورسەتىلەدى. بۇل تۋرالى وبلىستىق ءبىلىم باسقارماسىمەن وتكەن ءباسپاسوز-ءماسليحاتى بارىسىندا بەلگىلى بولدى.
وتكەن جىلى ءبىلىم باسقارماسى جانە باسقارماعا قاراستى وبلىستىق مەكەمەلەر، اۋداندىق، قالالىق ءبىلىم بولىمدەرىمەن – 170 306 مەملەكەتتىك قىزمەت كورسەتىلسە، اتالعان سالا بويىنشا ءوڭىر تۇرعىندارى جىل باسىنان 57 766 مەملەكەتتىك قىزمەت تۇرىنە جۇگىنگەن.
ايتا كەتەيىك، قر ءبىلىم جانە عىلىم مينيسترلىگىنىڭ بۇيرىعىنا سايكەس، ءبىرىنشى سىنىپ وقۋشىلارىنىڭ قۇجاتتارىن قابىلداۋ 1 ساۋىردەن باستالىپ، 1 تامىزعا دەيىن جالعاسادى.
- 2020-2021 وقۋ جىلىندا 1 سىنىپقا 47 007 بالا قابىلدانسا، اعىمداعى جىلعا 1 سىنىپقا 49 000 جۋىق بالا قابىلداۋ جوسپارلانىپ وتىر. قۇجاتتاردى egov.kz ارقىلى جانە قاعاز جۇزىندە بەرۋگە بولادى، - دەيدى وبلىستىق ءبىلىم باسقارماسى باسشىسىنىڭ ورىنباسارى جاڭىل سۇلەيمەنوۆا.
بيىلعى جىلى ءبىلىم بەرۋ سالاسىنا قاتىستى 9 مەملەكەتتىك كورسەتىلەتىن قىزمەتتى وبلىس اكىمدىگىنىڭ ۆەدومستۆولىق باعىنىستاعى مەكەمەلەرىنىڭ ورتالىقتاندىرىلعان دەرەكتەر بازاسى ارقىلى الۋعا دا بولادى. ول - «ە-zhetysu.kz» پورتالى. جۇيەدە 1328 مەكتەپكە دەيىنگى ۇيىم مەن 721 مەكتەپ تىركەلگەن.
وسى ۋاقىت ارالىعىندا وسى جۇيەنىڭ كومەگىمەن 69 774 بالا جولداما الىپ، مەكتەپكە دەيىنگى تاربيەمەن قامتىلىپ ۇلگەرگەن.
