Almaty oblysynda bilim berý salalarynda 34 memlekettik qyzmet belgilengen. Onyń 30-y avtomattandyrylǵan, 4-eýi qaǵaz túrinde kórsetiledi. Bul týraly oblystyq bilim basqarmasymen ótken baspasóz-máslıhaty barysynda belgili boldy.
Ótken jyly bilim basqarmasy jáne basqarmaǵa qarasty oblystyq mekemeler, aýdandyq, qalalyq bilim bólimderimen – 170 306 memlekettik qyzmet kórsetilse, atalǵan sala boıynsha óńir turǵyndary jyl basynan 57 766 memlekettik qyzmet túrine júgingen.
Aıta keteıik, QR Bilim jáne ǵylym mınıstrliginiń buıryǵyna sáıkes, birinshi synyp oqýshylarynyń qujattaryn qabyldaý 1 sáýirden bastalyp, 1 tamyzǵa deıin jalǵasady.
- 2020-2021 oqý jylynda 1 synypqa 47 007 bala qabyldansa, aǵymdaǵy jylǵa 1 synypqa 49 000 jýyq bala qabyldaý josparlanyp otyr. Qujattardy egov.kz arqyly jáne qaǵaz júzinde berýge bolady, - deıdi oblystyq bilim basqarmasy basshysynyń orynbasary Jańyl Súleımenova.
Bıylǵy jyly bilim berý salasyna qatysty 9 memlekettik kórsetiletin qyzmetti oblys ákimdiginiń vedomstvolyq baǵynystaǵy mekemeleriniń ortalyqtandyrylǵan derekter bazasy arqyly alýǵa da bolady. Ol - «e-zhetysu.kz» portaly. Júıede 1328 mektepke deıingi uıym men 721 mektep tirkelgen.
Osy ýaqyt aralyǵynda osy júıeniń kómegimen 69 774 bala joldama alyp, mektepke deıingi tárbıemen qamtylyp úlgergen.
