مەملەكەت باسشىسى وقۋ-اعارتۋ ءمينيسترىن قابىلدادى، دەپ حابارلايدى “ادىرنا”.
بۇگىن وقۋ-اعارتۋ ءمينيسترى عاني بەيسەمباەۆ پرەزيدەنتكە مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ سالالارىن دامىتۋ ماقساتىندا جاسالىنىپ جاتقان جۇمىستاردى باياندادى.
ءمينيستردىڭ مالىمدەۋىنشە، بيىل پەداگوگتاردى اتتەستاتتاۋ ءراسىمى جەتىلدىرىلىپ جاتىر. ەندى ۇستازداردىڭ كاسىبي بىلىكتىلىگى ءوز ءپانىن قانشالىقتى جەتىك بىلەتىنىنە، ال جۇمىس ناتيجەسى ءبىلىم الۋشىلاردىڭ وقۋ جەتىستىكتەرى نەگىزىندە باعالانباق. سونداي-اق عاني بەيسەمباەۆ بىرقاتار وزگەرىستەردى تىزبەكتەدى. ءبىلىم سالاسىندا:
- قىركۇيەك ايىنان باستاپ مەكتەپكە دەيىنگى ءبىلىم بەرۋ مەكەمەلەرىندەگى پەداگوگتاردىڭ ەڭبەكاقىسى 30 پايىزعا وسەدى;
- جىل سوڭىنا دەيىن بالاباقشالاردا 81 مىڭ ورىن اشۋ جوسپارلانۋدا;
-حالىقتىڭ الەۋمەتتىك وسال توپتارىنا جاتاتىن 98 مىڭ بالا تەگىن ىستىق تاماقپەن قامتاماسىز ەتىلەدى;
- 1 قىركۇيەكتەن باستاپ 1-4 سىنىپ وقۋشىلارى تولىقتاي تەگىن تاماقپەن قامتاماسىز ەتىلەدى. سونداي-اق ءبىلىم بەرۋ ۇيىمدارىن دابىل تۇيمەلەرىمەن، ليتسەنزياسى بار كۇزەتپەن، تۋرنيكەتتەرمەن جانە جەدەل باسقارۋ ورتالىقتارىنا قوسىلعان بەينەباقىلاۋ جۇيەلەرىمەن جابدىقتاۋ جوسپارلانىپ وتىر;
- بيىل تەحنيكالىق جانە كاسىپتىك ءبىلىم الۋشى ستۋدەنتتەردىڭ 80 پايىزى تەگىن وقيدى. قىركۇيەك ايىنان باستاپ ولاردىڭ شاكىرتاقىسى 50 پايىزعا، ال كەلەسى جىلى 100 پايىزعا ارتادى. كاسىپورىندار كوللەدج تۇلەكتەرىن مىندەتتى تۇردە جۇمىسقا ورنالاستىرۋ شارتىمەن مامانداردى ماقساتتى دايارلاۋ ىسىنە العاش رەت اتسالىسىپ وتىر.
مەملەكەت باسشىسى قاسىم-جومارت توقاەۆ وقۋ-اعارتۋ ءمينيسترى عاني بەيسەمباەۆقا ءبىلىم بەرۋ جۇيەسىن ودان ءارى جەتىلدىرۋدى مىندەتتەپ، بالالاردىڭ قاۋىپسىزدىگىن قامتاماسىز ەتۋ ىسىنە ۇدايى كوڭىل ءبولۋدى تاپسىردى.
