قىران ۇشسا قاناتى تالاتىن، قۇلان جورتسا تۇياعى توزاتىن شەتسىز-شەكسىز بايتاق ولكەمىزگە تاۋەلسىزدىك وزدىگىنەن كەلگەن جوق. ءبىزدىڭ ەلدىڭ داۋلەتى تاسىعان كەزدەرى دە، باسىنان قيىنشىلىقتى وتكەرگەن كەزەڭدەرى دە از ەمەس. بىراق باقىت پەن بايلىققا تاسىماي، نەبىر قيىندىقتارعا جاسىماي، بولاشاقتان زور ءۇمىت كۇتكەن ەلىمىز ءۇشىن اڭساعان ازاتتىق تاڭى دا اتتى. ءبىز بۇگىندە تاۋەلسىز ەلمىز!
تاۋەلسىزدىك! قانداي قاسيەتتى، قاستەرلى ءسوز، قادىرلى ۇعىم! وسىناۋ تاۋەلسىزدىككە جەتۋ ءۇشىن حالقىمىز قانشاما قيىندىقتى باسىنان وتكەرىپ، قانشاما تەر توكتى دەسەڭىزشى! ەندى سول بابالار مۇراتىن ءبىز قاستەرلەپ، قادىرلەپ ساقتاۋىمىز كەرەك. ول ءۇشىن ءبىزدىڭ الدىمىزدا، حالىق الدىندا بولاشاقتىڭ جارقىن بولۋى ءۇشىن بۇگىننەن باستاپ تاعىلىمدى تاريح قالىپتاستىرۋ مىندەتى تۇرعاندىعى انىق.
ەلىمىز تاۋەلسىزدىگىن قايتا قالپىنا كەلتىرگەن جىلدارى الدىدا ۇلكەن مىندەت تۇردى. ول — حالىقتىڭ ءال-اۋقاتىن جاقسارتىپ، ەلىمىزدى ەڭ وزىق مەملەكەتتەردىڭ قاتارىنا قوسۋ. ال بۇل ماقسات جولىندا ارينە اتقارىلاتىن جۇمىستار لەگى وتە كوپ ەدى. بۇل رەتتە ءار سالانىڭ وزىندىك الار ورنى مەن قوسار ۇلەسى كوپ. سونىڭ ىشىندە قر تۇڭعىش پرەزيدەنتى، ەلباسى ن.نازارباەۆ ماڭىزدى مىندەتتەردىڭ ءبىرى — ءبىلىم بەرۋ ساپاسىن جاقسارتۋ ەكەندىگىن ايتقان بولاتىن. بۇل ءۇشىن ەلباسىمىز كوپ ەڭبەك ەتتى. «قازاقستان — 2030»، «قازاقستان — 2050» ستراتەگيالارىن ۇيىمداستىرىپ، ءار جىل سايىن حالىققا جولداۋ جاساپ، دامىعان مەملەكەتتەردىڭ الدىڭعى قاتارىنا شىعۋىمىزعا بار كۇشىن سالدى. ەلباسىنىڭ سارابدال ساياساتىنىڭ ارقاسىندا ءبىز الەمدىك ارەناعا شىقتىق. قازاقستان دەگەن الىپ مەملەكەتتىڭ بارىن وزگە ەلدەر جاقىنىراق تاني ءتۇستى.
اسىرەسە، ءبىلىم، عىلىم جولىن قۋعان جاستارعا «بولاشاق» باعدارلاماسى ارقىلى شەتەلدە ءبىلىم الۋ باقىتى بۇيىرىپ كەلەدى. بۇنىڭ بارىنە، ارينە، ەلباسىنىڭ ساياسات، ەكونوميكا سەكىلدى ىستەرمەن قاتار، قوعام ءۇشىن ماڭىزدى بارلىق سالانى نازاردان تىس قالدىرماۋى دا سەپ بولدى. تۇڭعىش پرەزيدەنتىمىز «قازاقستان — 2050» ستراتەگياسى قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا:
"جەكە بيزنەستىڭ، ۇكىمەتتىك ەمەس جانە قايىرىمدىلىق ۇيىمدارىنىڭ، جەكە ادامداردىڭ الەۋمەتتىك جاۋاپكەرشىلىگى ءبىلىم بەرۋ سالاسىندا ايرىقشا كورىنۋى كەرەك. بۇل ەڭ ءبىرىنشى كەزەكتە لايىقتى ءبىلىم الۋدا وقۋ اقىسىن ءوز بەتىنشە تولەي المايتىن جاستارعا كومەك بەرۋگە قاتىستى", -دەگەن ەدى.
ول ءۇشىن قاجەتتى شارالار:
- جوعارى جانە ورتا ءبىلىم بەرۋ جۇيەسىن دامىتۋ ءۇشىن مەملەكەتتىك-جەكەمەنشىك ارىپتەستىگى جەلىسىن قۇرۋ.
- كوپساتىلى وقۋ گرانتتارى جۇيەسىن ازىرلەۋ.
- بۇكىل ەل بويىنشا عىلىمي-زەرتتەۋشىلىك جانە قولدانبالى ءبىلىم بەرۋدىڭ وڭىرلىك ماماندىقتاردى ەسكەرەتىن مامانداندىرىلعان وقۋ ورىندارى جۇيەسىن قۇرۋ.
- جوعارى وقۋ ورىندارىنداعى وقۋدىڭ ەكىنشى كۋرسىنان باستاپ كاسىپورىندارداعى مىندەتتى وندىرىستىك تاجىريبەنى زاڭنامالىق تۇرعىدا بەكىتۋ.
- بىزگە وقىتۋ ادىستەمەلەرىن جاڭعىرتۋ جانە وڭىرلىك مەكتەپ ورتالىقتارىن قۇرا وتىرىپ، ءبىلىم بەرۋدىڭ ونلاين-جۇيەلەرىن بەلسەنە دامىتۋ كەرەك بولادى.
- بىز قالايتىنداردىڭ بارلىعى ءۇشىن قاشىقتان وقىتۋدى جانە ونلاين رەجىمىندە وقىتۋدى قوسا، وتاندىق ءبىلىم بەرۋ جۇيەسىنە يننوۆاتسيالىق ادىستەردى، شەشىمدەردى جانە قۇرالداردى قارقىندى ەنگىزۋگە ءتيىسپىز;
- ەسكىرگەن نەمەسە سۇرانىس جوق عىلىمي جانە ءبىلىم پاندەرىنەن ارىلۋ، سونىمەن بىرگە، سۇرانىس كوپ جانە بولاشاعى بار باعىتتاردى كۇشەيتۋ قاجەت;
- ورتا جانە جوعارى ءبىلىم بەرۋدىڭ وقۋ جوسپارلارىنىڭ باعىتتىلىعى مەن باسىمدىقتارىن ولارعا تاجىريبەلىك ماشىقتارعا ۇيرەتۋ بويىنشا جانە تاجىريبەلىك بىلىكتىلىككە يە بولۋ باعدارلامالارىن قوسىپ، وزگەرتۋ;
- كاسىپكەرلىككە باعدارلانعان وقۋ باعدارلامالارىن، ءبىلىم بەرۋ كۋرستارى مەن ينستيتۋتتارىن قۇرۋ»،-دەپ ايتۋى جايدان-جاي ەمەس.
بۇل - وزىق ويلى مەملەكەتتەردىڭ قاتارىنا قوسىلۋ جولدارىنىڭ ءبىرى.
بۇگىندە ءبىلىم ساپاسىن جاقسارتۋعا كوپ كوڭىل بولگەن ەلباسىنىڭ جولىن پرەزيدەنتىمىز قاسىم-جومارت توقاەۆ جالعاستىرىپ كەلەدى. مەملەكەت باسشىسىنىڭ «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا:
«كوروناۆيرۋس ىندەتىنىڭ سالدارىنان دۇنيە جۇزىندەگى مەكتەپ وقۋشىلارى مەن ستۋدەنتتەردىڭ باسىم كوپشىلىگى قاشىقتان وقۋعا كوشتى. بۇل جۇمىستىڭ ءتاسىلى مەن مازمۇنىن تۇبەگەيلى وزگەرتۋدە» دەپ ءبىلىم سالاسىنداعى وزگەرىستەر جايلى ايتتى.
ءيا، بۇگىندە بىزگە وسى ۆيرۋستىڭ سالدارىنان قاشىقتان ءبىلىم الۋعا تۋرا كەلىپ تۇر. بىراق ءبىر جاعىنان قاراساڭ، ونلاين وقۋدىڭ دا ارتىقشىلىقتارى كوپ. بىرىنشىدەن، ۋاقىت ۇنەمدىلىگى. تالىمگەر ءوزى ءبىلىم الاتىن وقۋ ورنىنا بارماي-اق، ۇيدە وتىرىپ، بارىنشا ساپالى ءبىلىم الا الادى. تەحنيكالىق ءبىلىمى ارتىپ، كوپتەگەن باعدارلامالارمەن جۇمىس جاساۋدى ۇيرەنەدى. ءارى كەز كەلگەن ستۋدەنت ءارتۇرلى ايماقتاردان، سولتۇستىك، وڭتۇستىك، باتىس، شىعىس وڭىرلەرىندە، ءتىپتى شەتەلدە ءجۇرىپ-اق، ءبىر مەزەتتە ارنايى وقىتۋ پلاتفورمالارىنا كىرىپ، باسقا ستۋدەنتتەرمەن سويلەسىپ، پىكىر الماسىپ، ساباق ايتۋعا مۇمكىندىگى بار. مىنە، وسىنداي مۇمكىندىكتەرىنە قاراپ، قاشىقتان ءبىلىم الۋدىڭ دا پايداسى بار ەكەندىگىن ايتقان ءجون. مۇنىڭ ءبارى، ارينە، ەڭ الدىمەن حالىقتىڭ دەنساۋلىعى مەن بالالاردىڭ اماندىعى ءۇشىن، ساپالى ءبىلىم الۋ ءۇشىن جاسالىپ جاتقان ءىس-ارەكەتتەر ەكەنى انىق. سەبەبى، مەملەكەت باسشىسى ايتقانداي: «بالالارىمىز قاي جەردە تۇرسا دا، قانداي تىلدە وقىسا دا ساپالى ءبىلىم الۋى كەرەك» ەمەس پە؟
كۇليا قورشابەكوۆا،
جاركەنت كوپسالالى كوللەدجى
ەڭبەك قورعاۋ ءپانىنىڭ مۇعالىمى.
