قازاقستان رەسپۋبليكاسى ءبىلىم جانە عىلىم ءمينيسترىنىڭ 2018 جىلعى 12 قازانداعى №564 بۇيرىعىنا سايكەس اعىمداعى جىلعى ءساۋىر ايىنان باستاپ ءبىلىم بەرۋ ۇيىمدارى 1 سىنىپقا بالالاردى قابىلدايدى.
1 سىنىپقا التى جاستاعى بالالار قابىلداناتىن بولادى. وقۋشىلاردىڭ اتا-انالارى وتىنىشتەرىن ساۋىر جانە تامىز ايلارىندا بەرە الادى. قاجەتتى قۇجاتتاردى egov.kz پورتالى ارقىلى جانە قاعاز جۇزىندە تاپسىرۋعا رۇقسات. 2020-2021 وقۋ جىلىندا 1 سىنىپقا 47 007 بالا قابىلدانسا، اعىمداعى جىلعا 1 سىنىپقا 47 700 بالانى قابىلداۋ جوسپارلانىپ وتىر.
«IV توقساندا الماتى وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ 2021 جىلعى 25 ناۋرىزداعى №6 قاۋلىسىنا سايكەس سانيتارلىق تالاپتاردى قاتاڭ ساقتاي وتىرىپ، كونتينگەنتى 300 وقۋشىعا دەيىن قالالىق جانە اۋىلدىق مەكتەپتەردە بالالار سانى 15 ادامعا دەيىن ءداستۇرلى فورماتتا وقىتۋعا، 1-5 سىنىپتاردى قوسا العاندا كەزەكشىلىك سىنىپتارداعى بالالار سانى 15 ادامعا دەيىن، مەكتەپ ءبىتىرۋشى 9,11 سىنىپتار ارالاس فورماتتا (سىنىپتا 15 ادامنان ارتىق ەمەس) وقىتۋ جوسپارلانىپ وتىر»،- دەدى الماتى وبلىسى ءبىلىم باسقارماسى باسشىسىنىڭ ورىنباسارى ايجان مامانقىزى.
ءباسپاسوز-ءماسليحاتى بارىسىندا، جەرگىلىكتى سانيتارلىق-ەپيدەميولوگيالىق باقىلاۋ دەپارتامەنتىنىڭ قاۋلىسى نەگىزىندە اقسۋ، الاكول، ەسكەلدى، كەگەن، كەربۇلاق، پانفيلوۆ، رايىمبەك، سارقان، ۇيعىر اۋداندارى جانە قاپشاعاي قالاسى ارالاس فورماتتا وقيتىنى بەلگىلى بولدى.
ايتا كەتەيىك، 2020-2021 وقۋ جىلىنىڭ ءۇشىنشى توقسانىنىندا الماتى وبلىسى بويىنشا جالپى ورتا ءبىلىم بەرەتىن 760 مەكتەپتە 428183 وقۋشى ءبىلىم الدى. ەپيدەميالىق جاعدايعا بايلانىستى كەيبىر مەكتەپتەر شتاتتىق رەجيمدە جۇمىس جاساسا، ال كەيبىرى ارالاس فورماتتا ءبىلىم بەرەتىن بولادى.
