الماتى قالاسىنداعى ناۋرىزباي اۋداندىق سوتىندا بلوگەر اليشەر تەمەنوۆتىڭ ۇستىنەن قوزعالعان سوت پروتسەسى جالعاسۋدا. ول قازاقتىڭ ۇلى اقىنى مۇقاعالي ماقاتاەۆتىڭ شىعارماشىلىعىن سىناپ، ونى «بەيشارا ەركەك» دەپ اتاعانى ءۇشىن جاۋاپقا تارتىلۋدا، دەپ حابارلايدى “ادىرنا” ۇلتتىق پورتالى Orda.kz-كە سىلتەپ.
سوت وتىرىسىنا تەمەنوۆ قوعامدىق قورعاۋشىسى مەيىرمان شەكەەۆپەن بىرگە كەلدى. ايتا كەتەيىك، بلوگەر ازىرگە ادۆوكات جالداماعان. ول سوت زالىندا بەينەجازبا جۇرگىزۋگە قارسىلىق ءبىلدىردى.
قىلمىستىق ءىس قر قك-ءنىڭ 131-بابىنىڭ 2-بولىگى – “قورلاۋ” بويىنشا قارالۋدا. سۋديا بەينەگۇل قايسىنىنىڭ توراعالىعىمەن ءوتىپ جاتقان تىڭدالىمدا پوەزيا الىپتارىنىڭ ءبىرى مۇقاعالي ماقاتاەۆتىڭ ۇلى جۇلدىز ماقاتاەۆ بلوگەردەن مورالدىق شىعىن رەتىندە 10 ميلليون تەڭگە ءوندىرىپ الۋدى جانە الەۋمەتتىك جەلىلەردە كوپشىلىك الدىندا كەشىرىم سۇراۋدى تالاپ ەتتى.
«ءبىزدىڭ فاميليامىزدى قارالاپ، مورالدىق زيان كەلتىردى. مەن شوك جاعدايىندا بولدىم. مۇنداي اۋىر سوزدەر ءۇشىن كەشىرىم سۇراۋى – ازاماتتىق پارىزى»، – دەدى جۇلدىز ماقاتاەۆ.
شەكەەۆتىڭ ايتۋىنشا، تەمەنوۆ ءوز ارەكەتىنە وكىنىپ، كەشىرىم سۇراعان.
«ەكەۋى دە ءبىر اتانىڭ بالالارى. بالكىم، كەشىرىم سىزگە ەمەس، جالپى جۇرتقا ارنالدى. بىراق نيەتى بار»، – دەدى ول.
داۋلى ۆيدەو وتكەن جىلدىڭ قازان ايىندا جاريالانعان. وندا تەمەنوۆ ماقاتاەۆتىڭ شىعارماشىلىعىن سىنعا الىپ، جەكە باسىنا ءتىل تيگىزگەن. ۆيدەو كوپ ۇزاماي وشىرىلگەنىمەن، الەۋمەتتىك جەلىلەردە كەڭ تارالىپ، حالىقتىڭ اشۋ-ىزاسىن تۋعىزدى. اقىننىڭ تۋعان جەرى – قاراساز اۋىلىندا تۇرعىندار بلوگەردىڭ ۇيىنە بارىپ، ءتۇسىندىرۋ جۇمىستارىن جۇرگىزگەن. وسىدان كەيىن تەمەنوۆ اكەسىمەن بىرگە اۋىلعا كەلىپ، جۇرتشىلىقتان كەشىرىم سۇرادى.
سوت وتىرىسى بارىسىندا تاراپتارعا 10 مينۋتتىق ءۇزىلىس بەرىلىپ، تاتۋلاسۋ مۇمكىندىگى قاراستىرىلدى. الايدا جۇلدىز ماقاتاەۆ تالاپتار ورىندالمايىنشا بىتىمگە كەلمەيتىنىن ايتتى.
بلوگەردىڭ ءوزى – الماتى وبلىسى، ۇيعىر اۋدانى، سۇنقار اۋىلىنىڭ تۇرعىنى. ول سوتتا ايەلى ەكىنشى بالاسىنا جۇكتى ەكەنىن، قىزى بار ەكەنىن جانە تۇراقتى جۇمىس ىستەمەيتىنىن، تەك بلوگ جۇرگىزۋمەن اينالىساتىنىن جەتكىزدى. بۇعان دەيىن سوتتالماعان.
كەلەسى سوت وتىرىسى كەلەسى اپتادا وتەدى.
ۇقساس جاڭالىقتار
