رەسەي پرەزيدەنتى ۆلاديمير پۋتين فەدەرالدىق جينالىسقا جولداۋىن جاريالاۋ كەزىندە ءار وقۋشى ءۇشىن 10 مىڭ رۋبل مولشەرىندە ءبىر رەتتىك تولەم تولەۋ تۋرالى جاريالادى. پۋتين اتا-انالاردىڭ بالالارىن مەكتەپكە دايىنداۋعا مۇمكىندىكتەرى بولۋى ءۇشىن تولەم تامىزدىڭ ورتاسىندا تولەنەتىن ايتتى، دەپ حابارلايدى "ادىرنا" ءتىلشىسى.
«ەڭبەك نارىعى جانە ازاماتتاردىڭ قولدا بار ناقتى تابىسى مىندەتتى تۇردە قالپىنا كەلتىرىلەدى، ءبىز ودان ءارى قاراي جۇرەمىز، بىراق بۇل ءالى ورىن العان جوق. وسىعان بايلانىستى مەن مەكتەپ جاسىنداعى بالالارى بار وتباسىلارعا تاعى ءبىر رەتتىك تولەم جاساۋدى ۇسىنامىن، ياعني بارلىق مەكتەپ وقۋشىلارى ءۇشىن 10 مىڭ رۋبل كولەمىندە ءبىر رەتتىك تولەم تاعايىندالسىن. سونىمەن قاتار، بۇل شارانى بولاشاق ءبىرىنشى سىنىپ وقۋشىلارىنا، بيىل مەكتەپكە باراتىن بالالارعا دا كەڭەيتۋ جوسپارلانسىن. اتا-انالاردىڭ بالالارىن مەكتەپكە دايىنداپ ۇلگەرۋى ءۇشىن ءبىز تامىزدىڭ ورتاسىندا تولەم جاسايمىز»، - دەدى پۋتين مىرزا.
قازىرگى ۆاليۋتا باعامىمەن 10 مىڭ ءرۋبلدى تەڭگەگە شاققاندا 60 مىڭ تەڭگەنى قۇرايدى.
سونداي-اق، پرەزيدەنت 1 شىلدەدەن باستاپ، تولىق ەمەس وتباسىندا ءوسىپ جاتقان 8 جاستان 16 جاسقا دەيىنگى بالالارعا ايىنا 5650 رۋبل كولەمىندە تولەم جاساۋدى بۇيىردى. تاعى پرەزيدەنت بالا تۋىلعاننان ءۇش جاسقا دەيىنگى كەزەڭگە 11 300 رۋبل مولشەرىندە تولەم ەنگىزدى.
قازاقستاندا مۇنداي قالىپتاسقان جۇيە جوق. مەكتەپكە دايىندىق بارىسىندا الەۋمەتتىك از قامتىلعان وتباسىلارىنا كومەك كورسەتۋ، "مەكتەپكە جول" اكتسيالارى ۇيىمداستىرىلسا دا، مەملەكەت تاراپىنان بارلىق وقۋشىعا بىردەي ماتەريالدىق كومەك كورسەتىلگەن ەمەس.
"ادىرنا" ۇلتتىق پورتالى
