رەسەيلىك ءبىرىنشى ارنا ۋكرايناداعى سوعىسقا قارسى شىققان "سەگودنيا ۆەچەروم" باعدارلاماسىنىڭ جۇرگىزۋشىسى ماكسيم گالكيندى باعدارلامادان شەتتەتتى. گالكيننىڭ ورنىنا ءبيشى نيكولاي تسيسكاريدزە جۇرگىزۋشى بولىپ كەلەدى، دەپ حابارلايدى "ادىرنا" پورتالى "كومسومولسكايا پراۆدا" گازەتىنە سىلتەمە جاساپ.
جۋىردا "ستارحيت" گالكين سوعىسقا بايلانىستى ايتقان سوزدەرى ءۇشىن باعدارلامادان شەتتەتىلەتىنىن جازعان. تەلەجۋرناليست ماريا بورزۋنوۆا قۇپيا دەرەككوزگە سۇيەنە وتىرىپ، رەسەيلىك ازىلكەشپەن كەلىسىم-شارتتىڭ ءۇزىلۋى ونىڭ سوعىسقا قارسى مالىمدەمەسىمەن تىكەلەي بايلانىستى ەكەنىن ايتقان. ارنا رەسمي تۇردە تۇسىنىكتەمە بەرمەدى.
ۋكراينادا سوعىس باستالعالى بەرى ماكسيم گالكين رەسەي بيلىگىنىڭ ارەكەتىن سىناپ، قانتوگىستى توقتاتۋعا شاقىرىپ كەلەدى. قاقتىعىس تۇسىندا ماكسيم گالكين مەن ايەلى، ءانشى اللا پۋگاچەۆا رەسەيدەن كەتكەن.
گالكين – سوعىس باستالعالى بەرى ەفيردەن كورىنبەي كەتكەن جالعىز فەدەرالدىق ارنا جۇرگىزۋشىسى ەمەس. ءبىرىنشى ارنا ۆلاديمير پوزنەر مەن يۆان ۋرگانتتىڭ باعدارلامالارىن دا ەفيردەن الىپ تاستاعان. "چتو؟ گدە؟ كوگدا؟" باعدارلاماسى تىكەلەي ەفيردەن بەرىلمەيتىن بولعان، ال "موجەم وبياسنيت" باسىلىمىنىڭ جازۋىنشا، ويىنعا قاتىسىپ جۇرگەن كوپتەگەن جاستار جوبادان كەتكەن، التى ادامنان قۇرالعان كوماندالاردىڭ كەيبىرىندە ءبىر-ەكى ادام عانا قالعان.
"روسسيا 1" ارناسىندا سەرگەي بريلەۆتىڭ "ۆەستي ۆ سۋببوتۋ" باعدارلاماسى دا ەفيرگە شىقپاي قالعان. رەسمي اقپارات بويىنشا، ول ىسساپارعا كەتكەن.
"ادىرنا" ۇلتتىق پورتالى
