فوتو س سايتا president.az
تۇركياداعى ەڭ ءىرى مۇناي وڭدەۋ كاسىپورىندارى رەسەيگە قارسى ەنگىزىلگەن جاڭا باتىس سانكتسيالارىنان كەيىن باسقا ەلدەردەن مۇناي ساتىپ الۋ كولەمىن كوبەيتكەن. بۇل تۋرالى Reuters اگەنتتىگى جازدى، دەپ حابارلايدى “ادىرنا”.
اگەنتتىكتىڭ مالىمەتىنشە، SOCAR Turkey Aegean Refinery (STAR) زاۋىتى يراك، قازاقستان جانە باسقا ەلدەردەن ءتورت پارتيا مۇناي ساتىپ العان. بۇل شامامەن تاۋلىگىنە 77–129 مىڭ باررەل كولەمىنە تەڭ.
سول جەتكىزىلىمدەردىڭ ءبىرى — قازاقستاننىڭ KEBCO ماركالى مۇنايى، ول ساپاسى جاعىنان رەسەيلىك Urals ماركاسىمەن ۇقساس.
Reuters دەرەگىنشە، 2025 جىلى STAR زاۋىتى قازاقستان مۇنايىنىڭ تەك ءبىر پارتياسىن عانا يمپورتتاسا، 2024 جىلى مۇلدە الماعان. ال قىركۇيەك پەن قازان ايلارىندا زاۋىتقا تۇسكەن شيكىزاتتىڭ باسىم بولىگى — رەسەيلىك مۇناي بولعان (شامامەن تاۋلىگىنە 210 مىڭ باررەل).
باسقا ءىرى ءوندىرۋشى — Tupras كومپانياسى دا ساپاسى جاعىنان ۇقساس يراكتىق جانە باسقا دا مۇناي تۇرلەرىنىڭ جەتكىزىلىمىن ارتتىرۋدا. بۇل قادام كومپانياعا سانكتسيالارعا ىلىنبەي جالعاستىرۋعا مۇمكىندىك بەرەدى. دەگەنمەن، رەسەيلىك مۇنايدى وڭدەۋ Tupras-تىڭ باسقا زاۋىتىندا جالعاساتىنى ايتىلعان.
ربك اگەنتتىگىنىڭ مالىمەتىنشە، تۇركيا رەسەيلىك مۇنايدى ەڭ كوپ ساتىپ الاتىن ەلدەردىڭ ءبىرى بولىپ قالا بەرەدى. 2024 جىلى تۇركيا رەسەيدەن رەكورد كولەمدە مۇناي يمپورتتاعان — تاۋلىگىنە 323 مىڭ باررەل، بۇل وتكەن جىلمەن سالىستىرعاندا 36 پايىزعا كوپ.
اقش 22 قازاندا «روسنەفت» جانە «لۋكويل» سەكىلدى رەسەيلىك مۇناي كومپانيالارىنا قارسى جاڭا سانكتسيالار ەنگىزدى. ال كەلەسى كۇنى ەۋرووداق رەسەيگە قارسى 19-شى سانكتسيالار پاكەتىن قابىلدادى.
بۇعان دەيىن حابارلانعانداي، جاڭا امەريكالىق سانكتسيالاردان كەيىن كەيبىر ءۇندى مۇناي وڭدەۋ زاۋىتتارى رەسەي مۇنايىنا تاپسىرىستى ۋاقىتشا توقتاتقان. الايدا ءۇندىستاننىڭ مەملەكەتتىك Indian Oil كومپانياسى 28 قازاندا رەسەي مۇنايىن ساتىپ الۋدى جالعاستىراتىنىن مالىمدەدى.
