Reseı prezıdenti Vladımır Pýtın Federaldyq jınalysqa joldaýyn jarııalaý kezinde ár oqýshy úshin 10 myń rýbl mólsherinde bir rettik tólem tóleý týraly jarııalady. Pýtın ata-analardyń balalaryn mektepke daıyndaýǵa múmkindikteri bolýy úshin tólem tamyzdyń ortasynda tólenetin aıtty, dep habarlaıdy "Adyrna" tilshisi.
«Eńbek naryǵy jáne azamattardyń qolda bar naqty tabysy mindetti túrde qalpyna keltiriledi, biz odan ári qaraı júremiz, biraq bul áli oryn alǵan joq. Osyǵan baılanysty men mektep jasyndaǵy balalary bar otbasylarǵa taǵy bir rettik tólem jasaýdy usynamyn, ıaǵnı barlyq mektep oqýshylary úshin 10 myń rýbl kóleminde bir rettik tólem taǵaıyndalsyn. Sonymen qatar, bul sharany bolashaq birinshi synyp oqýshylaryna, bıyl mektepke baratyn balalarǵa da keńeıtý josparlansyn. Ata-analardyń balalaryn mektepke daıyndap úlgerýi úshin biz tamyzdyń ortasynda tólem jasaımyz», - dedi Pýtın myrza.
Qazirgi valıýta baǵamymen 10 myń rýbldi teńgege shaqqanda 60 myń teńgeni quraıdy.
Sondaı-aq, prezıdent 1 shildeden bastap, tolyq emes otbasynda ósip jatqan 8 jastan 16 jasqa deıingi balalarǵa aıyna 5650 rýbl kóleminde tólem jasaýdy buıyrdy. Taǵy Prezıdent bala týylǵannan úsh jasqa deıingi kezeńge 11 300 rýbl mólsherinde tólem engizdi.
Qazaqstanda mundaı qalyptasqan júıe joq. Mektepke daıyndyq barysynda áleýmettik az qamtylǵan otbasylaryna kómek kórsetý, "Mektepke jol" akııalary uıymdastyrylsa da, memleket tarapynan barlyq oqýshyǵa birdeı materıaldyq kómek kórsetilgen emes.
"Adyrna" ulttyq portaly
