فوتو: Lukasz Glowala/File Photo/REUTERS
5 قازانعا قاراعان ءتۇنى پولشا مەن ناتو ەلدەرىنىڭ اسكەري-اۋە كۇشتەرى جوعارى دايىندىق رەجيمىنە كوشتى. بۇل شەشىم رەسەي فەدەراتسياسىنىڭ ۋكرايناعا باعىتتالعان اۋقىمدى اۋە شابۋىلىنا بايلانىستى قابىلداندى. اتالعان اقپاراتتى پولشا قارۋلى كۇشتەرىنىڭ وپەراتيۆتىك قولباسشىلىعى X الەۋمەتتىك جەلىسىندە جاريالاعان، دەپ حابارلايدى “ادىرنا”.
مالىمەتتەرگە سايكەس، رەسەي 4-نەن 5 قازانعا قاراعان ءتۇنى ۋكراينا اۋماعىنداعى بىرقاتار نىساندارعا زىمىران سوققىلارىن جاساعان. بۇعان جاۋاپ رەتىندە پولشا ءوز اۋە كەڭىستىگىنىڭ قاۋىپسىزدىگىن قامتاماسىز ەتۋ ماقساتىندا بارلىق قاجەتتى قاۋىپسىزدىك راسىمدەرىن ەنگىزگەنىن حابارلادى.
وپەراتيۆتىك قولباسشىلىقتىڭ مالىمدەۋىنشە، پولشا مەن وداقتاس ناتو ەلدەرىنىڭ اسكەري ۇشاقتارى اۋە كەڭىستىگىندە بەلسەندى ارەكەت ەتۋدە. سونىمەن قاتار، جەرۇستى اۋە شابۋىلىنا قارسى قورعانىس جۇيەلەرى مەن راديولوكاتسيالىق باقىلاۋ قۇرىلعىلارى جوعارى جاۋىنگەرلىك دايىندىق دەڭگەيىنە كەلتىرىلگەن.
پولشا تاراپى بۇل ارەكەتتەردىڭ الدىن الۋ سيپاتىندا ەكەنىن جانە ەڭ الدىمەن اۋە كەڭىستىگىنىڭ قاۋىپسىزدىگى مەن شەكارالاس اۋماقتارداعى تۇرعىنداردىڭ قورعالۋىنا باعىتتالعانىن باسا ايتتى.
ء«بىز قازىرگى جاعدايدى مۇقيات باقىلاپ وتىرمىز. بارلىق كۇشتەر مەن قۇرالدار جەدەل ارەكەت ەتۋگە دايىن»، – دەلىنگەن وپەراتيۆتىك قولباسشىلىق حابارلاماسىندا.
ۋكراينا قارۋلى كۇشتەرىنىڭ مالىمەتىنشە، 5 قازان كۇنى تاڭعى 03:34-تە قارا تەڭىز اكۆاتورياسىنان "كاليبر" تيپىندەگى قاناتتى زىمىرانداردىڭ ۇشىرۋى تىركەلگەن. بۇل رەسەيدەگى تۋ-95 بومبالاۋشى ۇشاقتارىنىڭ اۋەگە كوتەرىلۋىنەن كەيىن ورىن العان. اتالعان وقيعالار جاڭا زىمىران شابۋىلىنىڭ بەلگىسى بولۋى مۇمكىن ەكەنى ايتىلدى.
رەسەي مەن ۋكراينا اراسىنداعى قاقتىعىستىڭ ۋشىعۋى ەۋروپا ەلدەرىنىڭ قاۋىپسىزدىگىنە تىكەلەي اسەر ەتۋدە. پولشا مەن ناتو ەلدەرىنىڭ جەدەل ارەكەتى ايماقتاعى شيەلەنىس دەڭگەيىنىڭ جوعارى ەكەندىگىن كورسەتىپ وتىر. ال ۋكراينا تاراپى جاڭا شابۋىلدارعا قارسى قورعانىس شارالارىن كۇشەيتۋ ۇستىندە.
