"50 ۇزدىك عىلىمي قىزمەتكەرگە 5 ملن تەڭگە كولەمىندە سىياقى تاعايىندالادى"

3424
Adyrna.kz Telegram

جىل سايىن 50 ۇزدىك عىلىمي قىزمەتكەرگە 5 ملن تەڭگە كولەمىندە سىياقى تاعايىندالادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا جازدى، دەپ حابارلايدى "ادىرنا" ۇلتتىق پورتالى.

اسحات ايماعامبەتوۆ 12 ءcاۋىر - قازاقستانداعى عىلىم قىزمەتكەرلەرىنىڭ كۇنى ەكەنىن حابارلادى.

"12 ءساۋىر – عىلىم اكادەمياسىنىڭ تۇڭعىش پرەزيدەنتى، كورنەكتى عالىم-گەولوگ قانىش ساتباەۆتىڭ دۇنيەگە كەلگەن كۇنى. عىلىمدى رەسپۋبليكالىق بيۋدجەتتەن قارجىلاندىرۋ كولەمى سوڭعى ەكى جىلدا شامامەن ەكى ەسەگە ارتتى. 2025 جىلعا قاراي عىلىمدى قارجىلاندىرۋ كولەمىن جالپى ىشكى ءونىمنىڭ 1% دەيىن ۇلعايتۋ جوسپارلانعان. بۇل – وتاندىق عىلىمنىڭ دامۋىنا ۇلكەن سەرپىن بەرەرى ءسوزسىز. ەگەر بۇعان دەيىن ءبىلىم جانە عىلىم مينيسترلىگىنىڭ گرانتتىق جانە باعدارلامالىق-نىسانالى قارجىلاندىرۋعا ارنالعان كونكۋرستارى ءۇش جىلدا ءبىر رەت جۇرگىزىلسە، ەندى ولار جىل سايىن وتكىزىلەتىن بولادى. تەك 2020 جىلى 5 كونكۋرس وتكىزىلگەنىن اتاپ ءوتۋ قاجەت، – دەدى ول.

ايماعامبەتوۆتىڭ ايتۋىنشا، بىلتىر دوكتورانتتاردىڭ ستيپەندياسى 80 پايىزعا كوبەيگەن.

"تاعى ءبىر ماڭىزدى جايت، 2020 جىلى العاش رەت گرانتتاردىڭ جاڭا تۇرلەرى بەكىتىلدى. ولار – كوللابوراتسيا بويىنشا، قىسقا مەرزىمدى، جەكە، جاس عالىمدارعا ارنالعان جانە ت.ب گرانتتار. سونداي-اق دوكتورانتتاردىڭ ستيپەندياسى 80%-عا ۇلعايدى. بۇدان بىلاي ولاردىڭ ستيپەندياسى جىل سايىن 15%-عا ءوسىپ وتىرادى جانە 2025 جىلعا قاراي 260 مىڭ تەڭگەنى قۇرايتىن بولادى، – دەپ جازدى مينيستر.

ونىڭ ايتۋىنشا، ەندى جىل سايىن 50 ۇزدىك عىلىمي قىزمەتكەرگە 5 ملن تەڭگە كولەمىندە سىياقى تاعايىندالادى.

"2021 جىلدان باستاپ ءبىز مىقتى، بەدەلدى عىلىمي جۋرنالداردى قولداۋ جونىندەگى جوبانى ىسكە اسىرۋدى باستايمىز. تاعى ءبىر جاڭالىق – ەندى جىل سايىن 50 ۇزدىك عىلىمي قىزمەتكەرگە 5 ملن تەڭگە كولەمىندە سىياقى تاعايىندالادى. مۇنداعى مەحانيزم "جوو ۇزدىك وقىتۋشىسى" كونكۋرسىنا ۇقساس بولادى. بۇل "عىلىم تۋرالى" زاڭعا ەنگىزىلگەن جاڭا تۇزەتۋلەرگە سايكەس مۇمكىن بولىپ وتىر، – دەدى ايماعامبەتوۆ.

سونىمەن قاتار مينيستر "جاس عالىم" جوباسى اياسىندا 1 مىڭ گرانت ءبولۋ بويىنشا جۇمىستار قولعا الىناتىنىن جازدى.

"مەملەكەت باسشىسى قاسىم-جومارت كەمەلۇلى توقاەۆتىڭ قولداۋىمەن 2020 جىلى ءبىلىم جانە عىلىم مينيسترلىگىنە قاراستى عىلىمي ۇيىمداردىڭ ماتەريالدىق-تەحنيكالىق بازاسىن نىعايتۋ جانە جۇمىسىن جانداندىرۋعا باعىتتالعان جاڭا بيۋدجەتتىك باعدارلاما اشىلىپ، 2,8 ملرد تەڭگە ءبولىندى. ناتيجەسىندە 23 عىلىمي-زەرتتەۋ ينستيتۋتىنا جابدىقتار ساتىپ الىندى. بيىل وسى ماقساتتا 3,5 ملرد تەڭگە ءبولىندى. سوندىقتان ينستيتۋتتاردى مودەرنيزاتسيالاۋ بويىنشا جۇمىس ءارى قاراي جالعاسادى.

بيىلدان باستاپ 500 عالىمدى الەمنىڭ جەتەكشى عىلىمي ورتالىقتارىنا تاعىلىمدامالاردان وتۋگە جىبەرۋ جانە "جاس عالىم" جوباسى اياسىندا 1 مىڭ گرانت ءبولۋ بويىنشا جۇمىستار قولعا الىنادى. ودان بولەك، ەلىمىزدەگى 20 ۋنيۆەرسيتەت "اكادەميالىق ارتىقشىلىق ورتالىقتارى" جوباسى اياسىندا قارجىلاندىرۋعا يە بولادى. ياعني بۇل – جيىرما وقۋ ورنى ماتەريالدىق-تەحنيكالىق بازاسىن ايتارلىقتاي جاڭارتۋعا مۇمكىندىك الادى دەگەن ءسوز" دەلىنگەن ءبىلىم جانە عىلىم ءمينيسترىنىڭ جازباسىندا.

"ادىرنا" ۇلتتىق پورتالى

پىكىرلەر