الماتىداعى قر ۇلتتىق كىتاپحاناسىندا قازاقستاننىڭ حالىق ءارتىسى، بەلگىلى تەاتر جانە كينو رەجيسسەرى، كينودراماتۋرگ تالعات تەمەنوۆتىڭ «ماحاببات بەكەتى» اتتى جاڭا كىتابىنىڭ تۇساۋكەسەرى ءوتتى. «اتامۇرا» باسپاسىنان جارىق كورگەن جيناققا قالامگەردىڭ ماحاببات، ادام تاعدىرى، دوستىق پەن ءومىر شىندىعىن ارقاۋ ەتكەن پوۆەستەرى مەن اڭگىمەلەرى ەنگەن. ادەبي كەشكە قازاق رۋحانياتىنىڭ كورنەكتى وكىلدەرى، بەلگىلى جازۋشىلار مەن ونەر قايراتكەرلەرى قاتىستى، - دەپ حابارلايدى "ادىرنا" ءتىلشىسى.
9 قازاندا وتكەن ادەبي باسقوسۋ تالعات تەمەنوۆتىڭ شىعارماشىلىعىنا ارنالعان تاعىلىمدى كەشكە اينالدى. كوپشىلىك رەجيسسەر رەتىندە كەڭىنەن تانيتىن ونەر يەسى بۇل جولى وقىرمان قاۋىمعا جازۋشىلىق قىرىنان تانىلىپ، پروزالىق تۋىندىلارىن جەكە كىتاپ ەتىپ ۇسىندى.
«اتامۇرا» كورپوراتسياسىنىڭ ۇيىمداستىرۋىمەن وتكەن تۇساۋكەسەردى باقىت جاعىپارۇلى جۇرگىزدى. جيىندا قالامگەردىڭ شىعارماشىلىق جولى، قازاق كينوسى مەن تەاتر ونەرىنە قوسقان ۇلەسى جانە جاڭا جيناقتىڭ ادەبي ماڭىزى ءسوز بولدى.
«كىتابىم جارىق كورەدى دەپ ەشقاشان ويلاعان ەمەسپىن»
كەزدەسۋدە ءسوز العان تالعات تەمەنوۆ جاڭا كىتابىنىڭ جارىق كورۋى ءوزى ءۇشىن كۇتپەگەن ءارى ەرەكشە قۋانىش ەكەنىن جەتكىزدى. ونىڭ ايتۋىنشا، وسى ۋاقىتقا دەيىن جازعان پوۆەستەرى مەن اڭگىمەلەرىن جەكە جيناق ەتىپ باستىرۋ باستاپقى جوسپارىندا بولماعان.
«بۇگىن مەن ءۇشىن كوپتەن كۇتكەن قۋانىشتى كۇن. شىنىمدى ايتسام، ءوزىمنىڭ پوۆەستەرىم مەن اڭگىمەلەرىمدى جيناقتاپ، كىتاپ ەتىپ شىعارامىن دەپ ەشقاشان ويلاعان ەمەسپىن. ەشقانداي وداق مۇشەسى دە ەمەسپىن. سوندىقتان بۇل باستامانىڭ مەن ءۇشىن ورنى بولەك. ەڭ الدىمەن، راقىمعالي ابرارۇلىنا شىنايى العىسىمدى بىلدىرگىم كەلەدى. ول كىسى وسى ۋاقىتقا دەيىن جازعان دۇنيەلەرىمدى جيناقتاپ، كوپشىلىككە جاقسى تانىس «ماحاببات بەكەتى» ءفيلمىمنىڭ اتاۋىمەن كىتاپ ەتىپ شىعارۋدى ۇيعارعان ەكەن. بۇل مەن ءۇشىن ۇلكەن قۇرمەت. مىڭ دا ءبىر راقمەت!»، – دەدى تالعات تەمەنوۆ.
ونەر يەسى جاڭا تۋىندىسىنىڭ وقىرمان جۇرەگىنە جول تاباتىنىنا سەنىم ءبىلدىردى. سونداي-اق ول كىتاپتىڭ جارىق كورۋىنە اتسالىسقان باسپا ۇجىمىنىڭ ەڭبەگىن ەرەكشە اتاپ ءوتتى.
«بۇل كىتاپتىڭ وقىرمانعا جەتىپ، ءوز باعاسىن الاتىنىنا ءۇمىتىم زور. كەلەر جىلى «اتامۇرا» باسپاسىنىڭ قۇرىلعانىنا 35 جىل تولادى. وسى ورايدا باسپا ۇجىمىن الداعى مەرەيتويىمەن قۇتتىقتاپ، قازاق ادەبيەتى مەن رۋحانياتىنا قوسىپ كەلە جاتقان ۇلەسى ءۇشىن ريزاشىلىعىمدى بىلدىرەمىن»، – دەدى اۆتور.
«ماحاببات بەكەتى» 2 مىڭ دانامەن جارىق كوردى
تۇساۋكەسەردە «اتامۇرا» كورپوراتسياسىنىڭ پرەزيدەنتى، قازاقستاننىڭ ەڭبەك سىڭىرگەن قايراتكەرى راقىمعالي قۇل-مۇحاممەد جاڭا جيناقتىڭ مازمۇنى مەن وقىرمان ءۇشىن ماڭىزىنا توقتالدى.
باسپا باسشىسىنىڭ ايتۋىنشا، «ماحاببات بەكەتى» اتاۋى قالىڭ كورەرمەنگە ەتەنە تانىس. ويتكەنى وسى اتتاس كوركەم فيلم قازاق كينوسىنىڭ كوپشىلىك ءسۇيىپ تاماشالايتىن تۋىندىلارىنىڭ بىرىنە اينالعان.
«بۇگىن تالعات تەمەنوۆ اعامىزدىڭ «ماحاببات بەكەتى» اتتى كىتابىنىڭ تۇساۋىن كەسىپ وتىرمىز. بۇل اتاۋ قازاق كورەرمەنىنە جاقسى تانىس. كەزىندە كوپتىڭ كوڭىلىنەن شىعىپ، كورەرمەننىڭ كوزايىمىنا اينالعان تۋىندىنىڭ اتاۋى ەندى كىتاپ ارقىلى وقىرمانعا جول تارتىپ وتىر. كولەمى 200 بەتكە جۋىق بولعانىمەن، جيناقتىڭ كوتەرەر جۇگى سالماقتى. مۇندا ادامعا دەگەن سۇيىسپەنشىلىك، تۋعان ەل مەن جەرگە دەگەن قۇرمەت، قازاقتىڭ سالت-ءداستۇرى مەن ۇلتتىق قۇندىلىقتارىنا دەگەن ماحاببات كەڭىنەن كورىنىس تاپقان. بۇل – وقىرمانعا وي سالىپ، رۋحاني تۇرعىدان بايىتاتىن دۇنيە»، – دەدى راقىمعالي قۇل-مۇحاممەد.
ول جاڭا كىتاپتىڭ وقىرمان تاراپىنان جوعارى باعالاناتىنىنا سەنىم ءبىلدىرىپ، جيناقتىڭ تارالىمى تۋرالى دا ايتتى.
«كىتاپ 2 مىڭ دانامەن جارىق كورىپ وتىر. الداعى ۋاقىتتا وقىرمانىن تاۋىپ، سۇرانىسقا يە بولادى دەپ سەنەمىن. سەبەبى مۇندا ءار ادامنىڭ ومىرىنە جاقىن، جۇرەگىنە تانىس سەزىمدەر مەن تاعدىرلار سۋرەتتەلگەن»، – دەدى باسپا باسشىسى.
بەلگىلى قالامگەرلەر جاڭا كىتاپتىڭ جارىق كورۋىمەن قۇتتىقتادى
ادەبي كەشكە قازاق ادەبيەتى مەن ونەرىنىڭ بىرقاتار بەلگىلى وكىلدەرى ارنايى قاتىسىپ، تالعات تەمەنوۆكە جىلى لەبىزدەرىن ارنادى.
ولاردىڭ قاتارىندا جازۋشى، مەملەكەتتىك سىيلىقتىڭ لاۋرەاتى كادىربەك سەگىزبايۇلى، جازۋشى، مەملەكەتتىك سىيلىقتىڭ يەگەرى بەكسۇلتان نۇرجەكەۇلى، اقىن، جۋرناليست، مەملەكەتتىك سىيلىقتىڭ لاۋرەاتى ۇلىقبەك ەسداۋلەت، قازاقستاننىڭ حالىق جازۋشىسى، كينودراماتۋرگ سماعۇل ەلۋباي، فيلولوگيا عىلىمدارىنىڭ دوكتورى، پروفەسسور قانسەيىت ابدەزۇلى جانە جازۋشى، جۋرناليست مارات ءبايدىلداۇلى بولدى.
قالامگەرلەر مەن ونەر قايراتكەرلەرى تالعات تەمەنوۆتىڭ قازاق مادەنيەتىندەگى وزىندىك ورنىنا توقتالىپ، ونىڭ جاڭا كىتابىنىڭ جارىق كورۋىن شىعارماشىلىق ومىرىندەگى ماڭىزدى بەلەس رەتىندە باعالادى.
كەش بارىسىندا رەجيسسەردىڭ كينو مەن تەاترداعى شىعارماشىلىق ىزدەنىستەرى، ادام تاعدىرىن بەينەلەۋدەگى وزىندىك قولتاڭباسى جانە ادەبي تۋىندىلارى تۋرالى اڭگىمە ءوربىدى. جيىلعان قاۋىم اۆتوردى جاڭا جيناعىنىڭ جارىق كورۋىمەن قۇتتىقتاپ، شىعارماشىلىق تابىس تىلەدى.
ماحاببات، ساعىنىش جانە ادام تاعدىرى: جيناققا قانداي شىعارمالار ەندى؟
«اتامۇرا» باسپاسىنان جارىق كورگەن «ماحاببات بەكەتى» جيناعىنا تالعات تەمەنوۆتىڭ ەكى پوۆەسى مەن ءۇش اڭگىمەسى توپتاستىرىلعان.
اتاپ ايتقاندا، كىتاپقا «گۇلناز»، «كوكتەم شىقسا، كوكەك كەلەر» پوۆەستەرى، سونداي-اق «ليبەرتي»، «پاپاسىنىڭ قىزى» جانە «كوكە بالا» اڭگىمەلەرى ەنگەن.
جيناقتاعى شىعارمالاردىڭ نەگىزگى ارقاۋى – ادام جانە ونىڭ ىشكى جان دۇنيەسى. اۆتور ماحاببات پەن دوستىقتى، ادام ومىرىندەگى كۇردەلى تاڭداۋلاردى، قۋانىش پەن وكىنىشتى، ءۇمىت پەن ساعىنىشتى كوركەم تىلمەن بەينەلەيدى.
شىعارمالاردا كەيىپكەرلەردىڭ تاعدىرى ارقىلى ءومىردىڭ سان الۋان قىرى اشىلادى. ادامدار اراسىنداعى قارىم-قاتىناس، سەزىمگە ادالدىق، وتكەن كۇنگە دەگەن ساعىنىش پەن بولاشاققا دەگەن ءۇمىت تۋىندىلاردىڭ ءون بويىنان كورىنىس تابادى.
تالعات تەمەنوۆتىڭ پروزالىق شىعارمالارىنا نازىك ليريزم مەن پسيحولوگيالىق تەرەڭدىك ءتان. قالامگەر كەيىپكەرلەردىڭ ىشكى تولعانىسىن، ولاردىڭ ومىرلىك ۇستانىمدارى مەن تاعدىرلى ساتتەرىن سۋرەتتەي وتىرىپ، وقىرماندى ادام بولمىسى تۋرالى ويلانۋعا جەتەلەيدى.
كىتاپتىڭ «ماحاببات بەكەتى» دەپ اتالۋى دا كەزدەيسوق ەمەس. بۇل اتاۋ اۆتوردىڭ كينو ونەرىندەگى تانىمال تۋىندىسىمەن ۇندەسىپ قانا قويماي، جيناقتاعى شىعارمالاردى بىرىكتىرەتىن ماحاببات تاقىرىبىنا دا نازار اۋدارادى.
كينورەجيسسەردىڭ ادەبيەتتەگى قولتاڭباسى
تالعات تەمەنوۆ – قازاق كينوسى مەن تەاتر ونەرىندە وزىندىك قولتاڭباسىن قالىپتاستىرعان بەلگىلى رەجيسسەر. ونىڭ شىعارماشىلىعىندا ادام تاعدىرى، قوعام مەن تۇلعا اراسىنداعى بايلانىس، ماحاببات پەن ادامگەرشىلىك تاقىرىپتارى ماڭىزدى ورىن الادى.
ونەر يەسىنىڭ «ماحاببات بەكەتى» ءفيلمى دە كورەرمەن ەسىندە سەزىم مەن جاستىق شاقتى، ادام قارىم-قاتىناسىن شىنايى بەينەلەگەن تۋىندى رەتىندە ساقتالعان.
ەندى وسى اتاۋمەن جارىق كورگەن ادەبي جيناق وقىرمانعا تالعات تەمەنوۆ شىعارماشىلىعىنىڭ تاعى ءبىر قىرىن تانىستىرادى. كينو مەن ساحنادا ادام تاعدىرىن كوركەم بەينەلەپ كەلگەن رەجيسسەر بۇل جولى ءوز وي-تولعانىستارىن پروزالىق شىعارمالارى ارقىلى جەتكىزەدى.
