قانىش ساتباەۆتىڭ تۋعانىنا 122 جىل

3082
Adyrna.kz Telegram

وسىدان 122 جىل بۇرىن، 1899 جىلى پاۆلودار وبلىسىنىڭ باياناۋىل اۋدانىندا عالىم، قازاقستان گەولوگتارى عىلىمي مەكتەبىنىڭ نەگىزىن قالاۋشى، قازاقستاندىق مەتاللوگەنيا عىلىمىنىڭ نەگىزىن سالۋشى، گەولوگيا-مينەرالوگيا عىلىمدارىنىڭ دوكتورى، پروفەسسور، قازاقستان عىلىم اكادەمياسىن ۇيىمداستىرۋشىلاردىڭ ءبىرى ءارى تۇڭعىش پرەزيدەنتى قانىش يمانتايۇلى ساتباەۆ دۇنيەگە كەلدى. 

ساۋاتىن اۋىل مولداسىنان اشقان بولاشاق عالىم پاۆلودارداعى ورىس-قازاق مەكتەبىندە، سەمەي مۇعالىمدەر سەمينارياسىندا، تومسك تەحنولوگيا ينستيتۋتىنىڭ تاۋ-كەن فاكۋلتەتىندە ءبىلىم العان. مۇعالىمدەر سەمينارياسىندا ج.ايماۋىتوۆ، م.اۋەزوۆ سىندى كورنەكتى قايراتكەرلەرمەن بىرگە وقىعان. ش.قۇدايبەردىۇلىمەن تىعىز بايلانىستا بولىپ، ونىڭ شىعارماشىلىعىن جوعارى باعالاعان. «الاش» قوزعالىسى قايراتكەرلەرىنىڭ ءىس-ارەكەتىنە قولداۋ بىلدىرگەن.

1920-1941 جىلدارى باياناۋىلدا حالىق سۋدياسى، «اتباستۇستىمەت» ترەسى گەولوگيا ءبولىمىنىڭ، قارساقتاي مىس كومبيناتى گەولوگيالىق بارلاۋ ءبولىمىنىڭ باستىعى، كومبيناتتىڭ باس گەولوگى قىزمەتتەرىن اتقارعان. 1941-1952 جىلدارى كسرو عىلىم اكادەمياسى قازاق بولىمشەسىنىڭ قۇرامىنداعى گەولوگيا عىلىمدارى ينستيتۋتىنىڭ ديرەكتورى، كسرو عىلىم اكادەمياسىنىڭ قازاق بولىمشەسى تورالقاسى توراعاسىنىڭ ورىنباسارى، توراعاسى، قازاقستان عىلىم اكادەمياسىنىڭ پرەزيدەنتى بولعان. 1952 جىلى امىرشىلدىك جۇيەنىڭ تاراپىنان قىسىمعا ۇشىراپ، قىزمەتىنەن تومەندەتىلىپ، قازاق كسر گەولوگيا ينستيتۋتىنىڭ ديرەكتورى بولىپ تاعايىندالعان. 1955 جىلى قازاق كسر عىلىم اكادەمياسىنىڭ پرەزيدەنتى بولىپ قايتا سايلانىپ، ءومىرىنىڭ سوڭىنا دەيىن وسى قىزمەتتى اتقارعان. قازاقستاننىڭ قالا، اۋىلدارىندا ساتباەۆ ەسىمىمەن اتالاتىن جۇزدەگەن كوشە، 40-تان استام مەكتەپ بار.

سونداي-اق عالىمعا ەسكەرتكىشتەر ورناتىلعان. ونىڭ ەسىمى قازاقستان عىلىم اكادەمياسىنىڭ گەولوگيا عىلىمدارى ينستيتۋتىنا، ءبىر قالا مەن عالامشارعا، ەلىمىزدىڭ ەڭ ءىرى تەحنيكالىق وقۋ ورنى قازاق ۇلتتىق تەحنيكالىق ۋنيۆەرسيتەتىنە بەرىلگەن. ساتباەۆتىڭ قۇرمەتىنە جوڭعار (جەتىسۋ) الاتاۋى جوتاسىنداعى مۇزدىق پەن شىڭ، قاراتاۋداعى ۆاننادي كەن ورنىنان تابىلعان «ساتباەۆيت» مينەرالى، «اكادەميك ساتباەۆ» گلاديوليۋس گۇلى اتالعان. 4 مارتە لەنين، 2-ءشى دارەجەلى وتان سوعىسى وردەندەرىمەن، مەدالدارمەن ماراپاتتالعان.

عالىم 1964  جىلى قايتىس بولدى.

"ادىرنا" ۇلتتىق پورتالى 

پىكىرلەر