جەتىسۋ وبلىسىندا جالپى وڭىرلىك ءونىم كولەمى 2022 جىلمەن سالىستىرعاندا 2 ەسەگە جۋىق ءوسىپ، 2,5 ترلن. تەڭگەگە جەتتى. وتكەن جىلدىڭ قورىتىندىسى بويىنشا ەكونوميكالىق ءوسىم كەمىندە 6,5% دەڭگەيىندە كۇتىلۋدە. بۇل تۋرالى ءوڭىر باسشىسى بەيبىت يساباەۆ وبلىستىڭ الەۋمەتتىك-ەكونوميكالىق دامۋ قورىتىندىلارى مەن 2026 جىلعا ارنالعان كەشەندى دامۋ جوسپارى تۋرالى ماسەلە قارالعان وبلىس اكىمدىگىنىڭ وتىرىسىندا ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
اتاپ ايتقاندا، جەتىسۋ وبلىسى بويىنشا سوڭعى ءۇش جىلدا وڭىرگە 1,5 ترلن تەڭگە ينۆەستيتسيا تارتىلىپ، جۇمىسسىزدىق دەڭگەيى 4,7%-عا دەيىن تومەندەدى. سول سياقتى 2023–2025 جىلدارى 1 ملن شارشى مەتر تۇرعىن ءۇي پايدالانۋعا بەرىلىپ، شامامەن 11 مىڭ وتباسى قونىس تويىن تويلادى. سونىمەن قاتار 276 الەۋمەتتىك نىسان سالىنىپ، جوندەۋدەن ءوتتى، ءسويتىپ ولاردى جاڭارتۋ دەڭگەيى 55,8%-عا جەتتى. ورتالىق اۋىز سۋمەن قامتۋ دەڭگەيى 100%-دى قۇرادى، 110 ەلدى مەكەنگە گاز تارتىلىپ، ءوڭىردى گازداندىرۋ دەڭگەيى 67%-عا جەتتى.
- جەتىسۋ وبلىسى قۇرىلعاننان بەرى حالىقتىڭ ءومىر ءسۇرۋ ساپاسىن جاقسارتۋعا وڭ اسەرىن تيگىزەتىن بىرقاتار ءىرى ينفراقۇرىلىمدىق جوبالار ىسكە اسىرىلدى. «تالدىقورعان-ءۇشارال» ماگيسترالدى گاز قۇبىرى سالىندى، «دوستىق–مويىنتى» ۋچاسكەسىندە ەكىنشى تەمىرجول جولدارىنىڭ قۇرىلىسى اياقتالدى. «تالدىقورعان – ءۇشارال»، ء«ۇشارال – دوستىق» جولدارى پايدالانۋعا بەرىلدى، «سارىوزەك – كوكتال – قورعاس» جولى جاڭعىرتىلىپ، رەسپۋبليكالىق ماڭىزى بار جولدار 100%-عا جوندەلدى. وبلىس جولدارىنىڭ جاقسى جانە قاناعاتتانارلىق جاعدايداعى ۇلەسى 95%-عا جەتتى. كوپ جىلدان بەرى شەشىلمەي كەلگەن مولالى اينالماسىنان بالقاش كولىنە دەيىنگى جولى تولىق جوندەلىپ، پايدالانۋعا بەرىلدى. بۇل رەتتە تۋريزم سالاسىنا ەرەكشە نازار اۋدارىلدى. ماسەلەن، 2025 جىلى بۇل سالاعا وبلىستىڭ دامۋ بيۋدجەتىنىڭ شامامەن 30%-ى ءبولىندى، - دەپ اتاپ ءوتتى ب. يساباەۆ.
الەۋمەتتىك-ەكونوميكالىق دامۋ قورىتىندىلارى مەن 2026 جىلعا ارنالعان جوسپارلار تۋرالى نەگىزگى باياندامانى وبلىس اكىمىنىڭ ورىنباسارى اسەت قاناعاتوۆ جاسادى. ول ءوڭىردىڭ جەتىستىكتەرى مەن پروبلەمالىق ماسەلەلەرىنە تالداۋ جاسادى.
مۇنان سوڭ بىرقاتار اۋدان جانە قالا اكىمدەرى، سونداي-اق بىرنەشە باسقارما باسشىلارى ءسوز سويلەدى. باياندامالاردان كەيىن بەيبىت يساباەۆ جاۋاپتى تۇلعالارعا مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن نەگىزگە الا وتىرىپ، بىرقاتار باسىم مىندەتتەر جۇكتەدى.
جەتىسۋ وبلىسى اۋىل شارۋاشىلىعىن دامىتۋ ماقساتىندا اگروونەركاسىپ كەشەنىندەگى قايتا وڭدەۋ دەڭگەيىن ارتتىرۋعا باسىمدىق بەرمەك. بۇل ءۇشىن زاماناۋي اگروتەحنولوگيالار قولدانۋ، ينۆەستيتسيا تارتا وتىرىپ، تاۋارلى ءسۇت فەرمالارىن، بورداقىلاۋ الاڭدارىن، قۇس فابريكالارىن، جىلىجايلاردى سالۋ، اۋىل شارۋاشىلىعى جەرلەرىن ءتيىمدى پايدالانۋ قاجەتتىگى اتاپ ءوتىلدى. ونەركاسىپتى، شاعىن جانە ورتا بيزنەستى دامىتۋ، سالاعا ينۆەستيتسيا تارتۋ، جاڭا جۇمىس ورىندارىن اشۋ – باسىم مىندەتتەردىڭ قاتارىندا. تۇرعىن ءۇي، الەۋمەتتىك نىساندار مەن جالپى ينفراقۇرىلىم قۇرىلىسىنىڭ ساپاسى مەن مەرزىمى تۇراقتى باقىلاۋدا بولۋى ءتيىس. تاعى ءبىر ماڭىزدى مىندەت – «تازا قازاقستان» ەكولوگيالىق باعدارلاماسى اياسىندا قولايلى ءومىر ءسۇرۋ ورتاسىن قالىپتاستىرۋ. مەديتسينالىق قىزمەت ساپاسىن ارتتىرۋ، سكرينينگتىك تەكسەرۋلەردى ۋاقتىلى وتكىزۋ، وڭىرگە تاجىريبەلى مەديتسينا ماماندارىن تارتۋ ارقىلى حالىقتىڭ دەنساۋلىعىن ساقتاۋعا ەرەكشە نازار اۋدارىلادى.
- بيۋدجەت ساپالى يگەرىلۋى ءتيىس. ءبىرىنشى كەزەكتەگى قاجەتتى جوبالارعا قارجى ءتيىمدى جۇمسالۋىن قاتاڭ باقىلاۋعا الۋ كەرەك. وبلىس اكىمىنىڭ ورىنباسارلارى، باسقارما باسشىلارى، اۋدان، قالا، اۋىلدىق وكرۋگ اكىمدەرى وڭىردەىڭ الەۋمەتتىك-ەكونوميكالىق تۇراقتىلىعىن قامتاماسىز ەتۋ ءۇشىن ءوز جاۋاپكەرشىلىگىن تولىق سەزىنىپ، قولدانىستاعى قارجى مۇمكىندىكتەرىن بارىنشا ءتيىمدى پايدالانىپ، ءاربىر تاپسىرمانى ۋاقتىلى ءارى ساپالى ورىنداۋى كەرەك. جالپى، بيىلعى جىلدىڭ كورسەتكىشتەرى بەلگىلەنىپ، باسىم باعىتتارى ايقىندالدى. دامۋ جوسپارىمىز بار، ماقسات-مىندەتتەرىمىز دە – ايقىن. بىزگە باستى كەرەگى – ساپالى جۇمىس پەن ناقتى ناتيجە، - دەدى وبلىس اكىمى جيىندى قورىتىندىلاپ.
جيىن سوڭىندا 2025 جىلدىڭ قورىتىندىسى بويىنشا ماراپاتتاۋ ءراسىمى ءوتتى. «ۇزدىك اۋدان» نوميناتسياسىندا كوكسۋ اۋدانىنىڭ اكىمدىگى جەڭىمپاز اتانسا، «ۇزدىك اۋىلدىق وكرۋگ» رەتىندە الاكول اۋدانىنداعى بەسكول اۋىلدىق وكرۋگى تانىلدى. ال جەتىسۋ وبلىسى بويىنشا مەملەكەتتىك كىرىستەر دەپارتامەنتى «ۇزدىك باسقارما»، وبلىستىق كارديولوگيالىق ورتالىق «ۇزدىك مەكەمە» اتاندى.
سونداي-اق ءوز سالالارىندا جوعارى ناتيجەلەرگە قول جەتكىزگەن بىرقاتار باسشىلار «ادال قىزمەتى مەن ەڭبەگى ءۇشىن» ارنايى العىس بەلگىسىمەن ماراپاتتالدى.
