الماتى وبلىسىنداعى ەكولوگيالىق ماسەلەلەردى كەشەندى شەشۋدىڭ جول كارتاسى بەكىتىلگەن. قۇجات 5 باعىتتان 8 تارماقتان تۇرادى. وڭىردەگى ەكولوگيالىق احۋالدى جاقسارتۋ ماقساتىندا قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ جانە الماتى وبلىسىنىڭ اكىمى اماندىق باتالوۆ پەن مۇددەلى مەملەكەتتىك مەكەمەلەر اتالعان كارتانى بەكىتكەن ەدى.
ەل ىشىندە كۇرمەۋى شەشىلمەگەن شارۋالاردىڭ ءبىرى - جىلۋ قازاندىقتارى. شىندىققا تۋرا قاراساق، ءالى كۇنگە دەيىن شالعاي اۋدانداردا كوپ قاباتتى ۇيلەردە قاتتى وتىنمەن كۇنەلتىپ وتىرعاندار بار. بۇل بۇگىنگى تاڭداعى باستى ماسەلە بولىپ وتىر.
2020 جىلى 1,88 ملرد.تەڭگەگە وبلىس ورتالىعىنداعى قوس قازاندىق تابيعي گازعا اۋىستىرىلدى. ال اعىمداعى جىلى تاعى دا ەكى قازاندىقتى جاڭارتپاق. مامانداردىڭ ايتۋىنشا، جوبالاردى ىسكە اسىرۋ حالىقتىڭ ءومىر ءسۇرۋ ساپاسىن جانە ەلدى مەكەندەردىڭ ەكولوگيالىق جاعدايىن ەداۋىر جاقسارتادى ەكەن.
بەكىتىلگەن قۇجات اياسىندا الماتى قالاسىنا جاقىن ورنالاسقان اۋداندارداعى تۇرعىن ءۇي الاپتارىن، الەۋمەتتىك، وندىرىستىك جانە وزگە دە نىسانداردى تابيعي گازعا كەزەڭ-كەزەڭىمەن كوشىرۋ جۇمىستارى جولعا قويىلعان. قازىرگى تاڭدا 129 كوپپاتەرلى تۇرعىن ۇيگە ارنالعان 21 بلوكتى-ءمودۋلدى قازاندىق (بمك) پايدالانۋعا بەرىلگەن. ناتيجەسىندە 3857 ابونەنت ورتالىق جىلۋعا قوسىلعان. اعىمداعى جىلى تاعى 14 بمك قۇرىلىسى اياقتالۋعا تاياعان. سايكەسىنشە 23 كوپپاتەرلى تۇرعىن ءۇي ورتالىق جىلۋعا قوسىلىپ، 1041 ابونەنت قىزىعىن كورمەك.
«2021 جىلى 100 كوپ پاتەرلى تۇرعىن ۇيلەرگە 31 بلوكتى - ءمودۋلدى قازاندىق سالۋ جوسپارلانۋدا. اتالمىش قازاندىقتار قاراساي، ەڭبەكشىقازاق، ۇيعىر، پانفيلوۆ اۋداندارىندا سالىنادى دەپ كۇتىلۋدە. 2022 جىلدىڭ سوڭىنا دەيىن وڭىردە 691 كوپقاباتتى تۇرعىن ءۇي ءۇشىن 60 بمك ورناتىلادى دەپ كوزدەلگەن»,- دەيدى الماتى وبلىسى ەنەرگەتيكا جانە تۇرعىن ءۇي كوممۋنالدىق شارۋاشىلىق باسقارماسىنىڭ «تۇرعىن ءۇي كوممۋنالدىق شارۋاشىلىق ءبولىمىنىڭ» باس مامانى دانيار مەدەلبەكۇلى.
رەسمي دەرەكتەرگە سۇيەنسەك، ورتالىق قازاندىقتاردى قاتتى وتىننان تابيعي گازعا اۋىستىرۋ ناتيجەسىندە قورشاعان ورتاعا زياندى زاتتاردىڭ شىعارىلۋى 2557 تونناعا تومەندەگەن. مازۋتقا قاجەتتىلىك 19,2 مىڭ تونناعا، قاتتى وتىنعا قاجەتتىلىك 40,4 مىڭ تونناعا ازايعان.
ايتا كەتەيىك، ەكولوگيالىق پروبلەمالاردى كەشەندى شەشۋ جونىندەگى جول كارتاسىنداعى تارماققا بىرقاتار ماسەلەلەر كىرىكتىرىلگەن:
- جىلۋ ەلەكتر ورتالىعىن جاڭعىرتۋ;
- اتموسفەرالىق اۋانىڭ جاي-كۇيى تۋرالى اقپاراتقا حالىقتىڭ ونلاين – قولجەتىمدىلىگى ءۇشىن تالدىقورعان قالاسىنىڭ LED-ەكراندارىندا "AirKZ" ءموبيلدى قوسىمشاسىنان دەرەكتەردى رەترانسلياتسيالاۋ;
- جىلىنا 50000 بىرلىكتەن كەم ەمەس جاسىل جەلەكتەردى وتىرعىزۋ;
- ەسكەلدى اۋدانىنىڭ جانە قاپشاعاي قالاسىنىڭ كارىز جۇيەلەرىن، كارىز جەلىلەرى مەن تازارتۋ قۇرىلىستارىن قايتا جاڭارتۋ جانە سالۋ;
- وبلىستىڭ سۋ وبەكتىلەرىندە سۋ قورعاۋ ايماقتارى مەن بەلدەۋلەرىن بەلگىلەۋ.
