جەتىسۋ وبلىسىندا «تازا قازاقستان» رەسپۋبليكالىق ەكولوگيالىق باعدارلاماسى اياسىندا ءوڭىردىڭ ەكولوگيالىق احۋالىن جاقسارتۋعا باعىتتالعان اۋقىمدى جۇمىستار جۇيەلى تۇردە جۇزەگە اسىرىلىپ كەلەدى. وتكەن جىلعى جۇمىستىڭ ناتيجەسى كوڭىلگە قونىمدى، بيىلعا جوسپارلانعان ءىستىڭ دە ىلكىمدى بولارىنا سەنىم زور.
مەملەكەت باسشىسى قاسىم-جومارت توقاەۆ «Turkistan» گازەتىنە بەرگەن سۇحباتىندا: «مەن پرەزيدەنت رەتىندە «تازا قازاقستان» اكتسياسىن الداعى ۋاقىتتا دا ەرەكشە نازارىمدا ۇستايمىن. بۇل جۇمىستىڭ ءمان-ماڭىزى وتە زور. سەبەبى، «تازا قازاقستان» جۇرتتى ۇنەمشىل ءارى اقپەيىل بولۋعا، داڭعازالىقتان ارىلۋعا، ۇنەمى ىزدەنىپ، العا ۇمتىلۋعا، ورتاق جاۋاپكەرشىلىكتى ۇمىتپاۋعا، ەلگە جاناشىرلىق تانىتىپ، قايىرىمدىلىق جاساۋعا ۇندەيدى»، – دەپ اتاپ ءوتتى. وسى ىزگىلىكتى ىسكە جەتىسۋلىقتار شىنايى ىقىلاسپەن ءۇن قوسىپ، وتكەن جىلى وبلىس اۋماعىندا اۋقىمدى اباتتاندىرۋ جانە جاڭعىرتۋ جۇمىستارى اتقارىلدى. اتاپ ايتقاندا، قالا جانە اۋدان اۋماقتارىندا بارلىعى 21 ساياباق (13 ساياباق، 6 اللەيا، 2 سكۆەر), 2 ورتالىق الاڭ، 49 اۋلا، سونداي-اق 81 بالالار مەن سپورت الاڭى اباتتاندىرىلدى. سونىمەن قاتار كوپقاباتتى تۇرعىن ۇيلەردىڭ 77 شاتىرى مەن 33 قاسبەتى جوندەلىپ، 16,5 شاقىرىم ارىق جەلىلەرى قالپىنا كەلتىرىلدى. وڭىردەگى 72 ەسكەرتكىش جاڭعىرتىلىپ، 315 شاقىرىم كوشە بويىنا جارىق شامدارى ورناتىلدى.
باعدارلاما اياسىندا تۇرعىنداردىڭ وتىنىشتەرىن قابىلداپ، ناقتى شارالار قابىلداۋعا نەگىز بولعان تەلەگرام-بوت ىسكە قوسىلعانى كوپشىلىككە ءمالىم. ونىڭ جۇمىسى باستالعالى بەرى 624 ءوتىنىش كەلىپ ءتۇسىپ، سونىڭ 525-ءى ورىندالدى. ال قاراستىرىلماعان 99 ءوتىنىشتىڭ مازمۇنى باعدارلامادان تىس، باسقا ماسەلەنى كوتەرگەن. تەك 2025 جىلدىڭ وزىندە 279 ءوتىنىش تىركەلىپ، 215-ءى وڭ شەشىمىن تاپتى.
«تازا قازاقستان» باعدارلاماسىنىڭ جالپىحالىقتىق سيپات الۋى جەمىستى ناتيجەگە قول جەتكىزەدى. وسى ورايدا وبلىس تۇرعىندارىنىڭ بەلسەندىلىگىن اتاپ ءوتۋ ماڭىزدى. بىلتىر وبلىس بويىنشا اتالعان باعدارلاما اياسىنداعى ءىس-شارالارعا 227 مىڭنان استام ادام قاتىستى. ناتيجەسىندە جوسپارلانعان 120 مىڭ كوشەتتىڭ ورنىنا 134 901 ءتۇپ كوشەت وتىرعىزىلىپ، 14 425 توننا قوقىس شىعارىلدى.
بۇل جۇمىستار بيىل دا جالعاسىن تاباتىنى انىق. جوسپارعا سايكەس، 9 ساياباق (7 پارك، 2 اللەيا), 1 ورتالىق الاڭ، 25 اۋلا، 18 بالالار جانە سپورت الاڭى اباتتاندىرىلادى. بۇدان بولەك، كوپقاباتتى تۇرعىن ۇيلەردىڭ 61 شاتىرى مەن 49 قاسبەتى جوندەلىپ، 13,6 شاقىرىم ارىق جۇيەسى قالپىنا كەلتىرىلەدى. سونداي-اق، 200 شاقىرىم كوشەنى جارىقتاندىرۋ كوزدەلىپ وتىر.
ودان بولەك، جاڭادان قۇرىلعان «الاكول-تازالىق» جانە «بالقاش-تازالىق» كوممۋنالدىق كاسىپورىندارىن ارنايى تەحنيكامەن قامتاماسىز ەتۋ، سونداي-اق بالقاش كولى جاعالاۋىنداعى كوممۋنالدىق جاعاجايلاردى اباتتاندىرۋ جوسپارلانۋدا.
ەكولوگيالىق مادەنيەتتى قالىپتاستىرىپ، ەل مەن جەردىڭ كوركىن ارتتىرۋعا جانە تۇرعىندارعا قولايلى ورتا قالىپتاستىرۋعا باعىتتالعان «تازا قازاقستان» باعدارلاماسىنىڭ مىندەتتەرىنە ءار ازامات جاۋاپكەرشىلىكپەن قاراۋعا ءتيىس.
