ەلىمىزدە 6 قازان كۇنى اەس سالۋ بويىنشا رەفەرەندۋم وتەدى. وسىعان بايلانىستى VIII سايلانعان قازاقستان رەسپۋبليكاسى پارلامەنتى ءماجىلىسىنىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى ەرلان بارلىباەۆپەن اەس قۇرىلىسىنىڭ ەكولوگياعا اسەرى تۋرالى بولعان سۇقباتتى نازارلارىڭىزعا ۇسىنامىز.
- قوعامدا اتوم ەلەكتر ستانسياسىن سالۋ ەلەكتر ەنەرگياسىنىڭ ءتاريفىن قىمباتاتادى دەگەن پىكىر بار. بۇل تۋرالى نە ايتا الاسىز؟
- مەن بۇل ءىستىڭ مامانى بولماعاننان كەيىن، ماعان بۇل سۇراققا جاۋاپ بەرۋ قيىن. مەنىڭ ويىمشا، اتوم ەلەكتر ستانتسياسىنىڭ قۇنى قانشا بولاتىنىن، قانشا ۋاقىتتى قاجەت ەتەتىنىن، ءتاريفتىڭ قانداي بولاتىنىن ۇكىمەتتىڭ نەمەسە ۋاكىلەتتى ورگان ەسەپتەۋى كەرەك. بۇل تۋرالى ايتىلماعاندىقتان قوعامدا تاريف كوتەرىلۋى مۇمكىن دەگەن پىكىر پايدا بولدى
- ءسىزدىڭ ويىڭىزشا، اەس قۇرىلىسى ەلەكتر قۋاتىنىڭ تاپشىلىعىن شەشە مە؟ ۇكىمەتتىڭ قازاقستان رەسپۋبليكاسىنىڭ اۋماعىندا اتوم ەلەكتر ستانتسيالارىن ىسكە قوسۋ جونىندەگى جوسپارلارى قانشالىقتى سەنىمدى؟
- ءيا، اتوم ەلەكتر ستانتسياسىن سالۋ ارقىلى ەلەكتر ەنەرگياسىنىڭ تاپشىلىعىن شەشۋگە بولادى. ۇكىمەت ۇسىنعانداي، بۇكىل ەلەكتر ەنەرگياسى نارىعىنىڭ 10%-ى اەس ەسەبىنەن شەشىلەدى دەپ ويلايمىن. بۇل – ايتارلىقتاي جەتكىلىكتى كولەم.
- ەلىمىزدەگى ەكولوگيالىق قوعام بالقاش كولىنىڭ بولاشاعى تۋرالى الاڭداۋدا. اەس سالۋدان بالقاش كولىنە قاۋىپ بار ما؟
- مەنىڭشە، بالقاشتىڭ بولاشاعىنا قاۋىپ توندىرەتىن نارسە جوق. ويتكەنى قازىرگى تەحنولوگيا سۋدى از تۇتىنۋعا مۇمكىندىك بەرەدى. سوندىقتان، بولاشاقتا بۇكىل قۇرىلىس كەزىندە بالقاش ءۇشىن قاۋىپ نەمەسە ماسەلە تۋىندامايدى دەپ ويلايمىن.
- اتوم ەلەكتر ستانتسيالارىنىڭ قالدىقتارى جەرگىلىكتى حالىقتىڭ دەنساۋلىعىنا قالاي اسەر ەتۋى مۇمكىن؟
- اەس-ءتىڭ قالدىقتارى باقىلاۋدا بولاتىندىقتان قاۋىپ توندىرمەيدى. بۇگىنگى كۇنگى تەحنولوگيا تاۋەكەلدەردى بارىنشا ازايتۋعا مۇمكىندىك بەرەدى. مەنىڭ ويىمشا، بۇل جەردە تولىق يگەرىلەتىن بولادى. قالدىق قالعاننىڭ وزىندە ولاردى ساقتاۋعا بولاتىن ورىندار بار. سوندىقتان ەشقانداي قاۋىپ جوق.
- اتوم ەلەكتر ستانتسياسىنىڭ قۇرىلىسى ايماقتىڭ دامۋىنا جانە جالپى ەل ءۇشىن قانشالىقتى اسەر ەتەدى دەپ ويلايسىز؟
- بىرىنشىدەن، بۇل جۇمىس ورىندارىنىڭ كوبەيۋى مەن جاڭا تەحنولوگيالاردىڭ ارتۋىنا اسەر ەتەدى. ەكىنشىدەن، اتوم ەنەرگەتيكاسىنىڭ دامۋىنا ىقپال ەتەدى. ال مۇنىڭ بارلىعى ەل ەكونوميكاسىنا وڭ اسەرىن تيگىزەدى دەپ ەسەپتەيمىن
