رف ارمياسىن ۋكراينا شەكاراسىنا جاقىنداتىپ كۇشەيتىپ جاتىر. The New York Times-تىڭ جازۋى بويىنشا وسىعان بايلانىستى اقش تا ءوز اسكەريلەرىن №1 دايىندىققا كەلتىرگەن. رف باق-تارىندا ۋكرايناعا مىنە-مىنە باسىپ كىرەمىز دەگەن سياقتى حابارلار "ۋتكا" رەتىندە شاڭ بەرىپ قالادى.
تۋرا وسىنداي جاعداي 2015-2017 جىلدارى ورىن العان بولاتىن. وندا دا ۋكرايناعا قارسى ۇلكەن سوعىس انە باستالادى، مىنە باستالادى دەپ كۇتىپ جۇرگەنىمىز ەستە قالىپتى. بىراق ارتىنان سوعىس تا، ەشتەڭە دە بولا قويعان جوق. وسىلارعا قاراپ وتىرىپ مىناداي وي كەلەدى - ەشقانداي دا باسىپ كىرۋ بولمايدى، وعان رف-نىڭ جۇرەگى داۋالامايدى. بىرىنشىدەن، ۋكراينا ارمياسى بۇرىنعى ارميا ەمەس، اناعۇرلىم كۇشەيگەن. ەكىنشىدەن رف-نىڭ ءوزى 2015 جىلعى رف ەمەس، السىرەگەن، قارجى تاۋسىلعان، يزگوي ەلگە اينالعان. بىراق، ارينە، دونباسستا ارانداتۋ كۇشەيەدى. كىشى-گىرىم ۇرىس قيمىلدارى دا بولىپ قالۋى عاجاپ ەمەس.
ەندەشە بۇل نە؟ ءجاي عانا قوقان-لوققى، ۋكرايناعا، باتىسقا قىر كورسەتۋ. نەگىزىنەن بايدەننىڭ جاڭا سانكتسيا ساياساتىنا نە دەپ جاۋاپ بەرەرگە بىلمەگەندىكتەن بار قولدارىنان كەلگەنى وسىلايشا ۇرەي تۋعىزۋ بولسا كەرەك. شىن سوعىس بولا قالسا ۋكراينا ەسەسىن جىبەرمەيتىنىن رف باسشىلىعى ءبىلىپ وتىر. ءبىز ءۇشىن ونىڭ وسى ۋكراينا باعىتىندا ۇرىسقا كيلىككەنى كەرەك - وندا ءوزى تاس-تالقان بولىپ جەڭىلەدى. ناتو دا قاراپ قالمايدى، گيبريدتىك تاسىلمەن ءبىراز نۇسقاۋشىلارى كەلىپ كومەك كورسەتەتىن بولادى. اتىس قارۋىن ۋكرايناعا بەرۋ ەسەلەپ كوبەيەدى. ونداي شىعىنعا بارا قوياتىنداي رف اقىماق ەمەس شىعار.
ال ءبىز سياقتى ەلدەرگە بۇل سياقتى قارۋ-جاراعىن شوشاڭداتۋ قاۋىپتى. ۋكرايناعا ءتىسى باتپاعاننان كەيىن ءوشىن باسقا كورشىلەرىنەن الۋى ابدەن مۇمكىن، سەبەبى جىندىدان ءبارىن كۇتۋگە بولادى، ال ولاردىڭ اراسىندا دەنى ساۋ ادام جوعى بەلگىلى. ءبىزدىڭ باسشىلار بۇل جەردە قانداي ساياسات ۇستانادى - ونى كەزىندە كورەتىن بولامىز. قازىرگى جاعداي وتە قاۋىپتى - وق تيگەن جارالى ايۋ ءوشىن كىمنەن الارىن بىلمەي الاسۇرۋدا.
