قىتايدىڭ "اۋرۋلاردىڭ الدىن الۋ جانە باقىلاۋ ورتالىعىنىڭ" (CDC) عالىمدارى العاش رەت رەتسەنزيالانعان جۋرنالدا Covid شىعۋ تەگى تۋرالى عىلىمي زەرتتەۋلەرىن جاريالادى. زەرتتەۋ ناتيجەسىندە ۆيرۋس ۇلگىلەرىنەن "جابايى جانۋارلارعا" ءتان گەنەتيكالىق ماتەريال تابىلدى، دەپ حابارلايدى "ادىرنا" ۇلتتىق پورتالى.
كوروناۆيرۋستىڭ پايدا بولۋىنا قاتىستى جۇمعان اۋزىن اشپاي وتىرعان قىتاي بيلىگى الەم عالىمدارى تاراپىنان سىنعا قالعان ەدى. ولار تۇڭعىش رەت عىلىمي باسىلىمدا بۇعان قاتىستى زەرتتەۋ جۇمىسىن جاريالادى.
عالىمدار 2020 جىلدىڭ قاڭتار-ناۋرىز ايلارىندا بازاردان كوروناۆيرۋستىڭ شىعۋ تەگىن انىقتاۋ ءۇشىن 1380 سىناما العان. ونىڭ ىشىندە جابايى جانۋارلاردى زاڭسىز ساتاتىن بازارداعى 73 cىنامادان كورونا بەلگىلەرى انىقتالدى.
سونىمەن قاتار، كوروناۆيرۋستى تاسىمالداۋعا قابىلەتتى كەيبىر جابايى جانۋارلار، راكون يتتەرى، وسى بازاردا ساتىلعانىن حابارلاندى. دەگەنمەن اۆتورلار ءالى ناقتى مالىمدەمە جاساۋعا اسىقپاي وتىر. ولار بازاردان الىنعان سىنامالاردى ناقتى ءبىر توقتامعا كەلۋ ءۇشىن جەتكىلىكسىز دەپ سانايدى. وسىلايشا Covid-19-دىڭ شىعۋ تەگى بەلگىسىز كۇيىندە قالدى.
"بىزدىڭ زەرتتەۋىمىزدەن الىنعان دالەلدەر بۇل گيپوتەزانى ناقتىلاۋ ءۇشىن جەتكىلىكسىز. زەرتتەۋىمىزدە راكون يتتەرىنەن "SARS-COV-2" بولعانى ايتىلادى. الايدا، بۇل سىنامالار ۆيرۋستىڭ جانۋارلاردان بىزگە جۇققانىنا دالەل بولا المايدى. سونىمەن قاتار، جانۋارلاردان بىزگە جۇقققان بولسا، كەرىسىنشە ادامنان جانۋارعا دا جۇعۋى مۇمكىن ەكەنىن ەسكەرتەمىز، — دەلىنگەن زەرتتەۋدە.
دەگەنمەن، بىرقاتار ساراپشىلار قىتاي عالىمدارىنىڭ دەرەكتى بۇرمالاپ، "تۇلكىبۇلاڭعا" سالىپ وتىرعانىن ايتىپ وتىر.
"ەڭ باستىسى، بۇل ماڭىزدى دەرەكتەر جيناعى اشىق جاريالاندى جانە ونى باسقالاردىڭ قاراستىرۋى، تالداۋى مەن سىناۋىنا جول اشىق", — دەيدى كوروناۆيرۋس جاپپاي تارالعالى بەرى گەنەتيكالىق زەرتتەۋلەرمەن اينالىسىپ كەلە جاتقان گلازگو ۋنيۆەرسيتەتىنىڭ پروفەسسورى دەۆيد روبەرتسون.
ونىڭ پىكىرىنشە، سىنامالار "كوروناۆيرۋستىڭ بازارداعى جانۋارلاردان ادامدارعا جۇقتىرعانىنا دالەل".
"ەگەر ءسىز بۇل دەرەكتەردى ۋحانداعى Covid-19-نىڭ ءاپ دەگەندە شىققان جاعدايىمەن سالىستىرساڭىز، ءبىر شيكىلىكتىڭ بار ەكەنىن تۇسىنەسىز. ءارى ۆيرۋستىڭ تارالۋ ايماعىنا قاراپ-اق جانۋارلاردان جۇققانىن پايىمداۋعا بولادى", - دەپ ول ءوز ويىن ۆۆس ارناسىندا ءتۇسىندىردى.
ورايى كەلگەندە ايتا كەتەيىك، اقش فەدەرالدى تەرگەۋ بيۋروسىنىڭ (فبر) ديرەكتورى كريستوفەر رەي كوروناۆيرۋستىڭ باستالۋىنا سەبەپكەر رەتىندە قىتاي بيلىگى قاراستى ۋحان زەرتحاناسىن كىنالايدى. رەيدىڭ ايتۋىنشا، قحر ۇكىمەتى پاندەميانىڭ سەبەپتەرىنە قاتىستى تەرگەۋدى سان-cاققا جۇگىرتىپ، الەمدى شاتاستىرۋعا تىرىسۋ ءۇشىن بارىن سالىپ جاتىر.
"ادىرنا" ۇلتتىق پورتالى
