ساۋد ارابياسىندا اقش مەملەكەتتىك حاتشىسى ماركو رۋبيو مەن رەسەي دەلەگاتسياسى كەزدەستى. كەزدەسۋگە ۇلتتىق قاۋىپسىزدىك كەڭەسشىسى مايك ۋولتتس جانە تاياۋ شىعىس بويىنشا ارنايى ەلشى ستيۆ ۋيتكوفف تا قاتىستى، دەپ حابارلايدى “ادىرنا” ۇلتتىق پورتالى.
“گولوس امەريكي” باسىلىمىنىڭ حابارلاۋىنشا، مەملەكەتتىك حاتشى ماركو رۋبيو سەيسەنبى كۇنى رەسەيدىڭ سىرتقى ىستەر ءمينيسترى سەرگەي لاۆروۆپەن كەزدەستى. بۇل دونالد ترامپ پەن ۆلاديمير ءپۋتيننىڭ 12 اقپاندا بولعان اڭگىمەسىنىڭ جالعاسى بولدى. كەزدەسۋ ساۋد ارابياسىندا ءوتتى.
حاتشى رۋبيوعا ۇلتتىق قاۋىپسىزدىك جونىندەگى كەڭەسشى مايك ۆالتس پەن تاياۋ شىعىس بويىنشا ارنايى ەلشى ستيۆ ۆيتكوفف، پرەزيدەنت ترامپتىڭ ەكىجاقتى قارىم-قاتىناستاردى قالپىنا كەلتىرۋ ءۇشىن تاڭداعان كومانداسى قوسىلدى. سىرتقى ىستەر ءمينيسترى لاۆروۆقا رەسەي پرەزيدەنتىنىڭ كومەكشىسى يۋري ۋشاكوۆ قوسىلدى.
كەزدەسۋدىڭ بولعانى تۋرالى مەملەكەتتىك دەپارتامەنتتىڭ رەسمي وكىلى تەممي بريۋس حابارلادى.
بريۋس ءوز مالىمدەمەسىندە، ترامپتىڭ سوعىستى توقتاتۋ ءۇشىن ارەكەت ەتىپ وتىرعانىن جانە اقش بەيبىتشىلىكتى قالايتىنىن، الەمدەگى كۇشتى پوزيتسياسىن پايدالانىپ، ەلدەردى بىرىكتىرۋگە ۇمتىلاتىنىن اتاپ ءوتتى.
“ترامپ — ۋكراينا مەن رەسەيدى وسىعان كەلىستىرۋگە ماجبۇرلەي الاتىن الەمدەگى جالعىز كوشباسشى»، — دەدى بريۋس.
تاراپتار رەسەي مەن اقش-تىڭ ديپلوماتيالىق وكىلدىكتەرىنىڭ جۇمىسىن قالپىنا كەلتىرۋ ءۇشىن كونسۋلتاتسيالار مەحانيزمىن قۇرۋعا جانە ۋكرايناداعى قاقتىعىستى توقتاتۋ جولدارىن تابۋ ءۇشىن جوعارى دەڭگەيدەگى ارنايى توپتار تاعايىنداۋعا كەلىستى. بۇل شارالار تۇراقتى، ورنىقتى جانە بارلىق تاراپتار ءۇشىن قابىلداناتىن بەيبىت كەلىسىمدى قامتاماسىز ەتۋگە باعىتتالعان.
سونىمەن قاتار، تاراپتار ۋكرايناداعى قاقتىعىستىڭ ءساتتى اياقتالۋىنان تۋىندايتىن گەوساياسي، ەكونوميكالىق جانە ينۆەستيتسيالىق مۇمكىندىكتەر بويىنشا بولاشاقتا ىنتىماقتاستىقتىڭ نەگىزىن قالاۋ تۋرالى كەلىستى.
ەر-ريادتاعى كەزدەسۋ قاتىسۋشىلارى پروتسەستىڭ ۋاقىتىلى ءارى ءونىمدى العا جىلجۋىن قامتاماسىز ەتۋ ءۇشىن ءوزارا ءىس-قيمىل جاساۋعا مىندەتتەمە الدى.
«ءبىر تەلەفون قوڭىراۋى مەن ءبىر كەزدەسۋ تۇراقتى بەيبىتشىلىك ورناتۋ ءۇشىن جەتكىلىكسىز. ءبىز ارەكەت ەتۋىمىز كەرەك جانە بۇگىن ءبىز ماڭىزدى قادام جاسادىق»، دەپ اتاپ ءوتتى بريۋس مالىمدەمەسىندە.
مەملەكەتتىك دەپارتامەنت ساۋد ارابياسىنا كەزدەسۋدى ۇيىمداستىرۋداعى جەتەكشىلىگى ءۇشىن، ونىڭ ىشىندە مۇراگەر حانزادا مۇحاممەد بين سالمان ءال- ساۋدقا العىس ايتتى.
