فوتو: t.me/DSNS_KYIV
رەسەي اسكەرى 20 قاراشاعا قاراعان ءتۇنى ۋكراينا اۋماعىنا جاپپاي زىمىران مەە دروندار ارقىلى شابۋىل جاسادى. كيەۆتە دنەپر وزەنى ارقىلى وتەتىن ءۇش كوپىر زاقىمدانىپ، جەتى ادام قازا تاپتى. لۆوۆ قالاسىندا تاعى ەكى ادام كوز جۇمدى. شابۋىل سالدارىنان بىرقاتار وڭىردە تۇرعىن ۇيلەر، ەنەرگەتيكالىق جانە كولىك ينفراقۇرىلىمى ءبۇلىندى. بۇل تۋرالى ۆۆس جازدى، دەپ حابارلايدى “ادىرنا”.
ۋكراينا پرەزيدەنتى ۆلاديمير زەلەنسكيدىڭ مالىمەتىنشە، رەسەي اسكەرى تۇندە جانە تاڭەرتەڭ ەل اۋماعىنا 400-دەن استام درون مەن 110-نان استام زىمىران ۇشىرعان. ونىڭ ىشىندە 27-ءسى بالليستيكالىق زىمىران بولعان.
زەلەنسكي بۇل شابۋىلدى سوڭعى ۋاقىتتاعى ەڭ اۋقىمدى سوققىلاردىڭ ءبىرى دەپ اتادى. ونىڭ ايتۋىنشا، زىمىراندار بىرنەشە توپپەن، اراعا 20–30 مينۋت سالىپ ۇشىرىلعان.
ۋكراينا قارۋلى كۇشتەرى اۋە كۇشتەرىنىڭ حابارلاۋىنشا، تاڭعى ساعات 10:30-عا دەيىن 462 اۋە نىسانى اتىپ تۇسىرىلگەن نەمەسە زالالسىزداندىرىلعان. دەگەنمەن 23 جەردە زىمىراندار مەن شابۋىلداۋشى درونداردىڭ نىساناعا تيگەنى تىركەلگەن.
شابۋىلدىڭ نەگىزگى نىسانالارىنىڭ ءبىرى كيەۆ قالاسى بولدى. قالا مەرى ۆيتالي كليچكونىڭ مالىمەتىنشە، ەل استاناسىندا جەتى ادام قازا تاۋىپ، 16 ادام جاراقات العان.
تۇنگى شابۋىل كەزىندە دنەپر وزەنى ارقىلى وتەتىن پودولسكو-ۆوسكرەسەنسكي، دارنيتسكي جانە وڭتۇستىك كوپىرلەر زاقىمدانعان. پودولسكو-ۆوسكرەسەنسكي كوپىرىندە وڭ جاعالاۋدان سول جاعالاۋعا قاراي كولىك قوزعالىسى توقتاتىلدى. ال وڭتۇستىك كوپىردە بۇرىن ەنگىزىلگەن شەكتەۋلەر ساقتالىپ وتىر.
سونداي-اق كيەۆتىڭ بىرقاتار اۋدانىندا ەلەكتر قۋاتى ۇزىلگەن. قالاداعى ستراتەگيالىق ينفراقۇرىلىم نىساندارىنىڭ ءبىرى، سۋ بۇرۋ جۇيەلەرى مەن كوممەرتسيالىق عيماراتتار دا زاقىمدانعان. قازا تاپقانداردىڭ اراسىندا «كيەۆۆودوكانال» كاسىپورنىنىڭ ءۇش قىزمەتكەرى بار.
قالا بيلىگى تۇرعىنداردى جەكە كولىكپەن ءجۇرۋدى شەكتەپ، مۇمكىندىگىنشە قاشىقتان جۇمىس ىستەۋگە شاقىردى.
رەسەي قورعانىس مينيسترلىگى كيەۆ پەن وبلىسىنداعى شابۋىلدار اسكەري تەحنيكا مەن قارۋ-جاراق تاسىمالداۋعا پايدالانىلاتىن كوپىرلەرگە، سونداي-اق دروندار، «فلامينگو» قاناتتى زىمىراندارى مەن جارىلعىش زاتتار شىعاراتىن كاسىپورىندارعا باعىتتالعانىن مالىمدەدى.
ۋكراينانىڭ باتىسىنداعى لۆوۆ قالاسى دا شابۋىلعا ۇشىرادى. قالا مەرى اندرەي سادوۆويدىڭ حابارلاۋىنشا، قالانىڭ باتىس بولىگىندەگى «سكنيلوۆ» تەمىرجول ستانتسياسىنىڭ بيلەت كاسسالارى ورنالاسقان عيمارات قيراعان.
سالدارىنان ەكى ادام قازا تاۋىپ، تاعى 10 ادام اۋرۋحاناعا جەتكىزىلگەن. ولاردىڭ ەكەۋىنىڭ جاعدايى اۋىر.
بۇدان بولەك، جاتاقحانا مەن قويما عيماراتىندا ءورت شىققان. قالا ماڭىنداعى ەنەرگەتيكالىق ينفراقۇرىلىم نىسانى زاقىمدانعان. شابۋىلدان كەيىن لۆوۆ پەن وبلىستا ەلەكتر قۋاتىن اۆاريالىق ءوشىرۋ كەستەسى ەنگىزىلدى.
رەسەي قورعانىس مينيسترلىگى شابۋىل نىسانالارىنىڭ قاتارىندا ەلەكتر قوسالقى ستانتسياسى مەن لۆوۆ اۆياتسيالىق زاۋىتى بولعانىن حابارلادى.
دنەپروپەتروۆسك وبلىسىنداعى جيولتىە ۆودى قالاسىندا بەس قاباتتى تۇرعىن ۇيگە سوققى جاسالعان. وبلىستىق اسكەري اكىمشىلىك باسشىسى الەكساندر گانجانىڭ مالىمەتىنشە، ەكى ايەل مەن ەكى ەر ادام اۋرۋحاناعا جەتكىزىلگەن. قۇتقارۋشىلار ولاردىڭ ەكەۋىن ورتەنىپ جاتقان پاتەرلەردەن الىپ شىققان.
كريۆوي روگ قالاسىندا ينفراقۇرىلىم نىساندارى مەن جانارماي قۇيۋ ستانتسياسى زاقىمدانعان.
حاركوۆ قالاسىنىڭ شەۆچەنكو اۋدانىنداعى اۋرۋحاناعا جاسالعان شابۋىلدان ءتورت ادام جاراقات الىپ، عيماراتتىڭ 50-دەن استام تەرەزەسى سىنعان. تاڭەرتەڭ وسى اۋدانداعى تۇرعىن ءۇي كەشەنىنە دە سوققى تيگەن، الايدا ادام شىعىنى تىركەلمەگەن.
ودەسسا وبلىسىندا ەنەرگەتيكالىق نىساننىڭ زاقىمدانۋى سالدارىنان 40 مىڭنان استام تۇتىنۋشى جارىقسىز قالعان. جيتومير وبلىسىندا كولىك جانە ونەركاسىپ ينفراقۇرىلىمى بۇلىنگەن.
ۋكراينا پرەمەر-ءمينيسترى سەرگەي كورەتسكيدىڭ مالىمەتىنشە، كيەۆ، نيكولاەۆ، ودەسسا جانە چەرنيگوۆ وبلىستارىنداعى كاسىپورىندار، سونداي-اق بىرنەشە وڭىردەگى تۇرعىن ۇيلەر زاقىمدانعان.
سوڭعى ايلاردا رەسەي ۋكراينا ەنەرگەتيكاسىنا باعىتتالعان جاپپاي شابۋىلدارىن جيىلەتتى. بۇعان جاۋاپ رەتىندە ۋكراينا قازان ايىنىڭ سوڭىنان باستاپ رەسەيدىڭ مۇناي وڭدەۋ زاۋىتتارىنا سوققىلارىن قايتا كۇشەيتكەن. ۋكراينا قارۋلى كۇشتەرىنىڭ باس شتابى رەسەيدەگى بەس ءىرى مۇناي وڭدەۋ زاۋىتىنا زاقىم كەلگەنىن مالىمدەدى.
اقش پرەزيدەنتى دونالد ترامپ ەكى تاراپتى ەنەرگەتيكالىق نىساندارعا شابۋىل جاساۋدى توقتاتۋعا شاقىرىپ، «ەنەرگەتيكالىق ءبىتىم» باستاماسىن ۇسىنعان بولاتىن. الايدا رەسەي بۇل ۇسىنىستى قابىلداماعان.
رەسەي پرەزيدەنتى ۆلاديمير پۋتين قىتايداعى ءباسپاسوز ءماسليحاتىندا قىرىم كوپىرىنە جاسالعان شابۋىلدارعا بايلانىستى ۋكرايناعا جاۋاپ سوققىلارى جالعاساتىنىن مالىمدەدى.
ال 10–11 قاراشا كۇندەرى ابۋ-دابيدە رەسەي، ۋكراينا جانە اقش دەلەگاتسيالارى اراسىندا ۇشجاقتى كەلىسسوزدەر وتكەن ەدى. كەزدەسۋدىڭ نەگىزگى ناتيجەسى اسكەري تۇتقىنداردى اۋقىمدى كولەمدە الماسۋ تۋرالى ۋاعدالاستىق بولدى.
قازىرگى ۋاقىتتا امەريكالىق تاراپ بەيبىت كەلىسسوزدەرگە ەۋروپا وكىلدەرىن دە قاتىستىرۋ ماسەلەسىن قاراستىرىپ جاتىر. پۋتين رەسەيدىڭ ديپلوماتيالىق ارنالار ارقىلى ەۋروپا ەلدەرىن ماسكەۋگە شاقىرعانىن ايتىپ، ودان كەيىن ۋكراينامەن ديالوگتىڭ كەلەسى فورماتى ايقىندالاتىنىن جەتكىزدى.
