قازاق تىلىنە جاناشىر جاندار 0,001 پايىزعا دا جەتپەيتىن سياقتى

6052
Adyrna.kz Telegram
قازىر عانا بوتانيكالىق ساياباقتى ارالاپ كەلدىم. ۇزاق جاياۋلاتىپ، بويىما قان جۇرگىزىپ، سەرۋەندەپ قايتتىم. بوتانيكالىق ساياباقتا اۋا رايىنىڭ قولايلىلىعىنا بايلانىستى ادامداردىڭ دا سانى ارتىپ، قالا تۇرعىندارى سەرۋەندەپ ءجۇر. ەكىنشى جاعىنان، ساياباقتاعى ادامداردىڭ قازاق تىلىنە قانشالىقتى ءمان بەرەدى ەكەن دەپ نازار سالىپ ءجۇردىم. ۇلكەنى دە، كىشىسى دە، بالا-شاعاسى دا ءجۇر. بىرەن ساران ورىستار بولماسا، بارلىعى قازاقتار.
بىراق... بىراق بارلىعى دا ورىسشا سايراپ ءجۇر. ساياباقتىڭ باس-اياعىنا دەيىن اينالىپ شىقتىم. قازاقتاردىڭ بارلىعى ورىسشا سويلەيدى. بالاسىن جەتەكتەگەن قاتىن-قالاشتار مەن قىز-كەلىنشەكتەردىڭ بارلىعى دا بالالارىمەن ورىسشا تىلدەسەدى. قازاقتىڭ بارلىعى ورىسقا دەرلىك ساتىلعان با دەپ كوكتەمگى كوڭىلىڭ كۇزدەي بولادى. ساناڭ سانسىراپ، ءىشىڭ ۋداي اشيدى. مەن شامالاعان كورسەتكىش بويىنشا ساياباقتا 98 پايىز قازاقتار ورىسشا سويلەسىپ ءجۇر. مەن پراكتيكادان ايتىپ وتىرمىن.
ءبىز مۇندا وتىرمىز، قازاق ءتىلىنىڭ تاعدىرىن جىرلاپ، ەرتەڭىن ويلاپ، نە ىستەسەك قازاق ءتىلىنىڭ پەرسپەكتيۆاسىن دۇرىستايمىز دەپ. ايتىڭدارشى قازاقتار! نە ىستەسەك قازاق ءتىلىنىڭ بولاشاعى مەن پەرسپەكتيۆاسىن دۇرىس جاساپ، عىلىم مەن تەحنولوگيانىڭ، ءوندىرىس پەن پروگرەستىڭ تىلىنە اينالدىرا الامىز؟ قازاق ءتىلى عىلىم مەن تەحنولوگيانىڭ، ءوندىرىس پەن پروگرەستىڭ تىلىنە اينالماي، قالايشا دامىماق!؟ الدە دۇرىسى وسى دەپ وسىندا تارتىسىپ وتىرا بەرەمىز بە؟
ورىس ءتىلىن جامانداعانىمىزبەن بۇكىل تەحنيكالىق-ينجەنەرلىك پروگراممالار مەن ماتەريالداردى ورىس تىلىنەن الىپ وتىرامىز. قاي پروگراممانى ىزدەسەم دە ورىس ءتىلى ارقىلى جۇكتەپ، جۇمىسىمدى ىسكە اسىرامىن. ءوزىمىزدىڭ تىلدە تاس تا جوق. ءبىز قازاق تىلىمەن ءبىر ءبىرىمىزدى تومپەشتەپ، ءبىر ءبىرىمىزدى ساباپ، ءبىر ءبىرىمىزدى توقپاقتاپ وتىرامىز. فەيسبۋكتە وسەك، اناۋ ساتقىن، مىناۋ ساتقىن، اناۋ يت، مىناۋ شوشقا دەيمىز. ساتقىن بولماعان، يت پەن شوشقا بولماعان ادام جوق. اتاڭنىڭ باسى دامىتاسىڭ ءتىلدى وسى تۇرىڭمەن.
ءبىزدىڭ قازاق ءتىلىن دە تەحنيكالىق-ينجەنەرلىك تىلگە اينالدىرىپ، بارلىق قاجەتتىلىككە جارايتىن دۇنيەلەردى تولتىرماساق، ويباي قازاق ءتىلى، ءولدى قازاق ءتىلى دەپ بايبالام سالعانىڭمەن ەشقانداي دا ناتيجەگە جەتە المايسىڭ. زاماننىڭ كوشى ءبىز ايتىپ وتىرعان وسەكپەن ولشەنبەيدى. قازاق تىلىندە جۇكتەپ الاتىن تەحنولوگيالىق، باعدارلامالىق كەرەككە جارايتىن تاس تا جوق. كەرەك بولسا باعدارلامالاردى قازاق تىلىندە جۇكتەپ كورشى، نە تابار ەكەنسىڭ...
قازاق ءتىلىن دامىتۋ ءۇشىن قازاق تىلىندە تەحنولوگيا مەن باعدارلامالار جاساپ، ءوزىڭنىڭ تۋعان تىلىڭە بايلاپ قويۋ كەرەك. ورىستار مەن اعىلشىندار، قىتايلار مەن جاپوندار، كورەيلەر مەن نەمىستەر وسىلاي جاساپ وتىر ەمەس پە!؟ سولاردان ءبىر جەرىمىز كەم بە، راسىندا!؟
بەكبولات قارجان،
"ادىرنا" ۇلتتىق پورتالى
پىكىرلەر