Telegram جەلىسى قازاقشا سويلەدى. بۇل تۋرالى اقپارات جانە قوعامدىق دامۋ ءمينيسترى دارحان قىدىرالى مالىمدەدى، دەپ حابارلايدى "ادىرنا" ۇلتتىق پورتالى.
Telegram الەۋمەتتىك جەلىسىنىڭ مازىرىنە قازاق ءتىلى قوسىلدى.
«Telegram-عا iOS جانە Android ارقىلى نەمەسە web نۇسقاسىنا كىرسەڭىز، قازاق ءتىلى رەسمي تۇردە ەنگىزىلگەنىن كورەسىز. ايتا كەتۋ كەرەك، كەشە عانا سەنات بەكىتكەن "ونلاين پلاتفورما جانە ونلاين جارناما" تۋرالى زاڭ جوباسىندا دا ءدال وسى ماسەلە قاراستىرىلعان. زاڭناما قابىلدانسا، ەندى الەمدىك الەۋمەتتىك جەلىلەر ينتەرفەيستەرى مەن مازىرلەرىن قازاقشالاۋى كەرەك»، – دەپ جازدى دارحان قىدىرالى.
سونىمەن قاتار مينيستر بۇل ماسەلەنى حالىقارالىق كومپانيالاردىڭ وكىلدەرىمەن كەزدەسۋلەردە دە كوتەرىپ جۇرگەنىن ايتىپ، جاhاندىق جەلىلەر قازاقشا سويلەيتىن كۇن الىس ەمەس ەكەنىن اتاپ ءوتتى.
"ادىرنا" ۇلتتىق پورتالى
