تالعات ماقسۇتۇلى: نەگە قازاقستاندا جەكەمەنشىك ۋنيۆەرسيتەتتەر تۋرالى ءجيى ايتىلمايدى؟

1272

قازاقستاندىق ءبىلىم جۇيەسىندەگى كادرلىق ماسەلەلەر جايلى كازگيۋ ۋنيۆەرسيتەتىنىڭ باسقارما توراعاسى تالعات نارىكباەۆ NUR.KZ پورتالىنىڭ تىلشىسىنە پىكىر ءبىلدىردى.

كادرلاردى دايىنداۋ ماسەلەسى ءبىرىنشى ورىندا تۇرۋى كەرەك. ياعني جوعارى وقۋ ورىندارىندا وقىتۋشى ماماندىعى بەدەلدى بولۋى ءتيىس. سوندا جاستار وقىتۋشىلىققا ۇمتىلادى، عىلىمعا بەت بۇرادى. ءبىلىم سالاسىنداعى وزەكتى ماسەلەردى تالقىلاي كەلە، تالعات نارىكباەۆ ەلىمىزدە جەكەمەنشىك ۋنيۆەرسيتەتتەر تۋرالى از ايتىلاتىنىن دا اتاپ ءوتتى.

«ەلىمىزدە ءبىرىنشى ورىنعا ءاردايىم ۇلتتىق، مەملەكەتتىك جوو-لاردى قويادى. بىراق ولاردىڭ دا ءوز پروبلەمالارى جەتەرلىك، ءتىپتى كەيبىرىنىڭ دەڭگەيى جەكەمەنشىك ۋنيۆەرسيتەتتەردەن دە تومەن. كوپتەگەن جەكەمەنشىك جوعارى وقۋ ورىندارى ءبىراز ۋاقىتتان بەرى باتىستىق ۇلگى بويىنشا ءبىلىم بەرۋ پروتسەسىن ءساتتى جۇزەگە اسىرىپ كەلە جاتىر. مەملەكەتتىك ۋنيۆەرسيتەتتەرگە سونداي جوو-لاردى نەگە ۇلگى رەتىندە كورسەتپەسكە؟ ولاردىڭ شىن مانىسىندە مىقتى ەكەنى ايتىلا بەرمەيدى. كەرىسىنشە، قوعامعا: «قازاقستاندا وسىنداي جوو-لار بار، رەسەيگە نەمەسە باسقا ەلگە كەتۋدىڭ قاجەتى جوق، ەلىمىزدە قالىڭدار» - دەپ، كوزدەرىن جەتكىزۋ كەرەك»،- دەيدى ول.
ونىڭ پىكىرىنشە، قازاقستاندىق ءبىلىم جۇيەسىندە بىرقاتار پروبلەمالار بار ءارى قر ءبىلىم جانە عىلىم مينيسترلىگى ونى جوققا شىعارمايدى. مىقتى پروفەسسورلىق-وقىتۋشىلىق قۇرامنىڭ بولماۋى دا وزەكتى پروبلەمالاردىڭ قاتارىندا.
«جاقىندا قر ءبىلىم جانە عىلىم ءمينيسترى اسحات ايماعامبەتوۆ فەيسبۋكتە جازبا قالدىردى. پاراقشاسىندا ۆەدومستۆولىق باعىنىستى ۋنيۆەرسيتەتتەردىڭ جالاقىسىن شۇعىل تۇردە ارتتىرىپ، ەڭ تومەنگى ايلىق مولشەرىن 200 مىڭ تەڭگەگە ءوسىرۋ قاجەتتىگىن مالىمدەگەن. مىسال رەتىندە ەلىمىزدىڭ ۇلتتىق مەملەكەتتىك ۋنيۆەرسيتەتتەرىنىڭ بىرىندە ورتاشا ايلىق 110 مىڭ تەڭگە ەكەنىن ايتىپتى. بۇل اتالعان ۋنيۆەرسيتەتتە پروفەسسورلىق-وقىتۋشى قۇرامىنىڭ ساپاسى ناشار ەكەنىن بىلدىرەدى. سەبەبى جاقسى مامان ۋنيۆەرسيتەتكە 110 مىڭ تەڭگەگە جۇمىسقا كەلمەيدى. قازىر مەملەكەتتىك جانە ۇلتتىق جوعارى وقۋ ورىندارى پروفەسسورلارىنىڭ جالاقىسىن 450 مىڭ تەڭگەگە كوتەرۋ مىندەتىن قويىپ وتىر. بۇل شەشىم ساپالى كادر تارتۋعا كومەكتەسەدى»، - دەپ اتاپ ءوتتى تالعات نارىكباەۆ.

پىكىرلەر
ۇقساس جاڭالىقتار