اباي وبلىسى، جارما اۋدانى، اقتايلاق بي مەكتەبىنىڭ جوعارى سىنىپ وقۋشىلارى كىشى سىنىپتارعا قىسىم كورسەتىپ، سالدارىنان 9-سىنىپتىڭ ەكى وقۋشىسى ءبىر ۋاقىتتا ءوز وزىنە قول جۇمساماق بولعان ەدى. وسى وقيعاعا بايلانىستى مەكتەپ ديرەكتورى قىزمەتىنەن شەتتەتىلىپ، سىنىپ جەتەكشى جۇمىستان شىعارىلدى. قازىر ارناي قۇرىلعان توپ وقۋشىلارمەن تىلدەسىپ، تەكسەرىس جۇرگىزىپ جاتىر. بۇل جايلى "ادىرنا" ۇلتتىق پورتالى "aikyn.kz"-كە سىلتەمە كورسەتە وتىرىپ حابارلايدى.
جارما اۋداندىق ءبىلىم ءبولىمىنىڭ مالىمەتىنشە، ايقىن ەسىمدى 9-سىنىپ وقۋشىسى تاڭەرتەڭ ءوز ءۇيىنىڭ قوراسىندا جىپكە بۋىنىپ قالعان. قايعىلى جاعدايدان كەيىن شۇعىل ءموبيلدى توپ قۇرىلىپ، ەكى كۇن بويى مەكتەپ تىرشىلىگىنە تەكسەرىس جۇرگىزدى.
«ايقىن بۇل مەكتەپتە ءبىرىنشى سىنىپتان باستاپ وقيدى. كوپبالالى وتباسىندا تاربيەلەنگەن ول بەس بالانىڭ تۇڭعىشى. وتباسىنىڭ تۇرمىستىق جاعدايى جاقسى. ايقىننىڭ بۇرىن ءوز-وزىنە قول جۇمساۋ ارەكەتتەرى بولماعان»، – دەلىنگەن اقپاراتتا.
ال سۋيتسيد جاساماق بولعاندا قۇتقارىلعان ايقىننىڭ سىنىپتاسىنا قاتىستى تىڭ دەرەكتەر شىقتى. قازىر ول ءدىن-امان. وقۋشىنىڭ وزىنەن ۇلكەن 11-سىنىپ وقۋشىسىمەن ەرەگەسىپ، توبەلەسكەنى بەلگىلى بولدى.
قازىرگى ۋاقىتتا مەكتەپ ديرەكتورى قىزمەتىنەن شەتتەتىلىپ، سىنىپ جەتەكشىسى جۇمىستان شىعارىلدى.
«سىنىپ وقۋشىلارىن اڭگىمەگە تارتۋ بارىسىندا ايقىننىڭ بارلىق سىنىپتاسىمەن سىيلاستىقتا بولعاندىعى انىقتالدى. وزگەگە ءاردايىم كومەككە كەلۋگە دايىن بولىپ، ءبارىنىڭ كوڭىل كۇيىن كوتەرۋگە تىرىساتىنى ايتىلدى. كىشىپەيىل، ادامگەرشىلىگى مول، ءادىل، كاراپايىم رەتىندە سيپاتتالدى. ءاردايىم ساباققا دايىندالىپ كەلىپ، ءوز ويىن ەركىن جەتكىزەتىن. وزات وقۋشى بولعان ول «ۇزدىك اتتەستاتقا» ۇمىتكەر ەدى. مۇعالىمدەرگە ەشقاشان تەرىس مىنەزىن كورسەتپەگەن. مانەرلەپ وقۋدان رەسپۋبليكالىق بايقاۋلاردىڭ، بوكستان وبلىستىق جارىستاردىڭ جۇلدەگەرى»، – دەلىنگەن حابارلامادا.
"ادىرنا" ۇلتتىق پورتالى ايقىننىڭ وتباسىنا قايعىرا وتىرىپ كوڭىل ايتادى.
قۇرمەتتى، قازاق ەلىنىڭ ازاماتتارى. بارشاڭىزدى ءبىر-بىرىڭىزگە باۋىرمال بولىپ، مەيىلىنشە، اينالاڭىزعا، كىشىگە، ۇلكەنگە جاناشىرلىق، مەيىرىم تانىتۋعا شاقىرامىز.
"قازاقتى جامانداما، قازاق بالا!
حالىق قوي قازاق دەگەن از-اق قانا!
ماڭگىلىك اي استىندا،
جەر ۇستىندە
قازاقتىڭ جاناشىرى قازاق قانا!.."
"ادىرنا" ۇلتتىق پورتالى
