قاشىقتىقتان وقىتۋ كەزىندە بالالاردى كومپيۋتەرمەن قامتاماسىز ەتۋ ءۇشىن بولىنگەن قاراجاتتى جىمقىرۋ فاكتىلەرىنە قاتىستى قىلمىستىق ىستەر تەرگەلىپ جاتىر. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ اسا ماڭىزدى ىستەر جونىندەگى تەرگەۋشىسى دانيار بەكايداروۆ ايتتى دەپ حابارلايدى «ادىرنا» ۇلتتىق پورتالى.
«جىل باسىنان بەرى سىبايلاس جەمقورلىققا قارسى قىزمەت 650-گە جۋىق سوتقا دەيىنگى تەرگەۋدى تىركەدى. 60 لاۋازىم يەسى ۇستالىپ، 57 ادامعا قاتىستى قاماۋدا ۇستاۋ بۇلتارتپاۋ شاراسى قابىلداندى»،-دەدى د. بەكايداروۆ ونلاين بريفينگىدە.
سونىمەن قاتار ول قر ۇكىمەتى رەزەرۆى ەسەبىنەن اعىمداعى ءىس-شارالاردى جۇرگىزۋ باعدارلاماسى بويىنشا كومپيۋتەر، پلانشەت پەن نوۋتبۋك ساتىپ الۋعا 2020 جىلى بولىنگەن بيۋدجەت قارجىسىن جىمقىرۋ فاكتىلەرى بويىنشا قىلمىستىق ىستەر تەرگەلىپ جاتقانىن ايتتى. وسى ورايدا ءبىلىم بەرۋ باسقارماسىنىڭ لاۋازىم يەلەرىنە قاتىستى ەلىمىزدىڭ بەس وڭىرىندە 6 قىلمىستىق ءىس تەرگەلىپ جاتىر.
«قاراجات قاشىقتىقتان وقىتۋ كەزىندە تابىسى از وتباسىلاردىڭ بالالارىن كومپيۋتەرمەن قامتاماسىز ەتۋ ءۇشىن بولىنگەن بولاتىن. اتالعان سوتقا دەيىنگى تەرگەۋ مەملەكەتتىك ىشكى اۋديت اكتىلەرى نەگىزىندە تىركەلدى. سوتقا دەيىنگى تەرگەۋ امالدارى جالعاسىپ جاتىر»، - دەدى دانيار بەكايداروۆ.
الەمنىڭ دامىعان، وركەنيەتتى ەلدەرى پاندەميا كەزىندە مەيلىنشە حالقىنا كومەكتەسىپ، ازاماتتارىنا بارىنشا قولداۋ كورسەتۋگە كۇش سالدى. ال ءبىزدىڭ ەلىمىزدە جاعداي كەرىسىنشە ءوربىدى. ەل باسىنا كۇن تۋعان شاقتا دا قۋ قۇلقىنىن عانا ويلاعانداردى ۆيرۋس تا، باسقا دا توقتاتپاعانى وكىنىشتى. ساباقتى ۇيىندە وتىرىپ وقۋىنا ىڭعايلى بولسىن دەپ ۇكىمەت تاراپىنان ارنايى اقشا ءبولىپ، نوۋتبۋك تاراتۋ ءىسى قولعا الىندى-اق. وكىنىشكە قاراي، بيۋدجەتتەن بولىنگەن ول اقشانى دا ارانىنا توعىتۋدان تايىنباعاندار بولىپتى.
بۇل ازىرگە انىقتالعان بىرەر عانا دەرەك. ال يت ارقاسى قيانداعى اۋىل-ايماقتاردا بۇل ماسەلەنىڭ قالاي شەشىلگەنىن كىم ءبىلسىن؟! تەك جەپ قالۋ، قاربىتا اۋىزعا سالۋ، وڭەشتەن قازىر وتكىزە سالۋ... بۇل قازىرگى ءبىزدىڭ قوعامنىڭ شىنايى كەلبەتىنە اينالدى. ءبىلىم باسقارمالارىنىڭ پاندەميا كەزىندەگى باتقان بىلىقتارى مۇنىمەن توقتامايتىنى ءسوزسىز. ەل قازىناسىنىڭ ميللياردتاعان قارجىسى قانشاما ادامنىڭ قالتاسىندا كەتكەنى انىقتالۋ-انىقتالماۋى بەلگىسىز شارۋا. الايدا قازاقستان قوعامى ءسات سايىن تەك قالتاعا باسىپ قالۋدى، جەپ قالۋدى عانا كوزدەيتىندەردىڭ ورتاسىنا اينالعانى وكىنىشتى.
مۇقاش مۇراتۇلى،
«ادىرنا» ۇلتتىق پورتالى.
