Qashyqtyqtan oqytý kezinde balalardy kompıýtermen qamtamasyz etý úshin bólingen qarajatty jymqyrý faktilerine qatysty qylmystyq ister tergelip jatyr. Bul týraly Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Bekaıdarov aıtty dep habarlaıdy «Adyrna» ulttyq portaly.
«Jyl basynan beri Sybaılas jemqorlyqqa qarsy qyzmet 650-ge jýyq sotqa deıingi tergeýdi tirkedi. 60 laýazym ıesi ustalyp, 57 adamǵa qatysty qamaýda ustaý bultartpaý sharasy qabyldandy»,-dedi D. Bekaıdarov onlaın brıfıngide.
Sonymen qatar ol QR Úkimeti rezervi esebinen aǵymdaǵy is-sharalardy júrgizý baǵdarlamasy boıynsha kompıýter, planshet pen noýtbýk satyp alýǵa 2020 jyly bólingen bıýdjet qarjysyn jymqyrý faktileri boıynsha qylmystyq ister tergelip jatqanyn aıtty. Osy oraıda bilim berý basqarmasynyń laýazym ıelerine qatysty elimizdiń bes óńirinde 6 qylmystyq is tergelip jatyr.
«Qarajat qashyqtyqtan oqytý kezinde tabysy az otbasylardyń balalaryn kompıýtermen qamtamasyz etý úshin bólingen bolatyn. Atalǵan sotqa deıingi tergeý memlekettik ishki aýdıt aktileri negizinde tirkeldi. Sotqa deıingi tergeý amaldary jalǵasyp jatyr», - dedi Danııar Bekaıdarov.
Álemniń damyǵan, órkenıetti elderi pandemııa kezinde meılinshe halqyna kómektesip, azamattaryna barynsha qoldaý kórsetýge kúsh saldy. Al bizdiń elimizde jaǵdaı kerisinshe órbidi. El basyna kún týǵan shaqta da qý qulqynyn ǵana oılaǵandardy vırýs ta, basqa da toqtatpaǵany ókinishti. Sabaqty úıinde otyryp oqýyna yńǵaıly bolsyn dep úkimet tarapynan arnaıy aqsha bólip, noýtbýk taratý isi qolǵa alyndy-aq. Ókinishke qaraı, bıýdjetten bólingen ol aqshany da aranyna toǵytýdan taıynbaǵandar bolypty.
Bul ázirge anyqtalǵan birer ǵana derek. Al ıt arqasy qııandaǵy aýyl-aımaqtarda bul máseleniń qalaı sheshilgenin kim bilsin?! Tek jep qalý, qarbyta aýyzǵa salý, óńeshten qazir ótkize salý... Bul qazirgi bizdiń qoǵamnyń shynaıy kelbetine aınaldy. Bilim basqarmalarynyń pandemııa kezindegi batqan bylyqtary munymen toqtamaıtyny sózsiz. El qazynasynyń mıllıardtaǵan qarjysy qanshama adamnyń qaltasynda ketkeni anyqtalý-anyqtalmaýy belgisiz sharýa. Alaıda Qazaqstan qoǵamy sát saıyn tek qaltaǵa basyp qalýdy, jep qalýdy ǵana kózdeıtinderdiń ortasyna aınalǵany ókinishti.
Muqash MURATULY,
«Adyrna» ulttyq portaly.
