بۇل تۋرالى بۇگىن اقپاراتتىق-كوممۋنيكاتسيالىق ورتالىعىندا وتكەن بريفينگتە شىمكەنت قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ مالىمدەدى.
– شىمكەنت قالاسىنا وسى جىلدىڭ 31 قاڭتارىنان باستاپ «سپۋتنيك-V» ۆاكتسيناسىنىڭ I كومپونەنتىنە 7400 دوزا، II كومپونەنتىنە 5800 دوزا جەتكىزىلدى. ياعني كوروناۆيرۋسقا قارسى رەسەيلىك ەكپەنىڭ ءبىرىنشى كومپونەنتى 7351, ەكىنشى كومپونەنتى 1876 ادامعا سالىندى. ال ەكپە قابىلداعانداردا كەرى اسەر بايقالماعان، – دەدى باقىتجان جولداسبەكۇلى.
سپيكەردىڭ سوزىنشە، قالادا 11 پتر زەرتحاناسى جۇمىس ىستەيدى. اتالعان زەرتحانالار تاۋلىگىنە 6 270 تەست جاساۋعا قاۋقارلى. تارقاتىپ ايتساق، شەتەلگە شىعاتىن جولاۋشىلار مەن وزدىگىنەن تەكسەرىلۋگە نيەتتى تۇرعىندار اقىلى تەستىلەۋدەن وتەدى. ال جوسپارلى تۇردە پتر تەستىن تاپسىراتىن بارلىق ساناتتاعى ادامدارعا سىناما تەگىن جۇرگىزىلەدى.
بريفينگ بارىسىندا باسقارما باسشىسى كوروناۆيرۋس ينفەكتسياسىن اۋىزدىقتاۋدىڭ جالعىز جولى ۆاكتسيناتسيالاۋ ەكەنىن العا تارتتى. وسى ورايدا ول قالا تۇرعىندارىن ەكپە سالدىرۋعا شاقىردى.
ايتا كەتەيىك، ءۇشىنشى مەگاپوليستە ۆاكتسيناتسيالاۋعا ارنالعان 38 ەگۋ پۋنكتى، 320 تەرموكونتەينەر دايىندالعان. بۇل رەتتە 1-2 ءساۋىر كۇنى قالاعا رەسەيلىك «سپۋتنيك V» ۆاكتسيناسىنىڭ 7300 جانە وتاندىق «QazCOVID» ۆاكتسيناسىنىڭ 2400 دوزاسىن اكەلۋ جوسپارلانىپ وتىر.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – ەرنار مامىر
