بۇگىن اقپاراتتىق-كوممۋنيكاتسيالىق ورتالىعىندا وتكەن بريفينگتە شىمكەنت قالالىق ءبىلىم باسقارماسىنىڭ باسشىسى جانات تاجيەۆا 2020-2021 وقۋ جىلىنىڭ IV توقسانىندا وقۋ پروتسەسىن ۇيىمداستىرۋ، وقۋشىلاردى 1-سىنىپقا قابىلداۋ جانە ۇلتتىق بىرىڭعاي تەستىلەۋ بويىنشا جان-جاقتى باياندادى.
– شىمكەنتتە بيىلعى وقۋ جىلىنىڭ IV توقسانىندا جالپى ءبىلىم بەرەتىن مەكتەپتەردە سىنىپتاعى وقۋشى سانى 25 ادامنان اسىرىلماي ارالاس فورماتتا وقىتىلادى. سونىمەن قاتار 300 وقۋشىعا دەيىنگى مەكتەپتەردە وقۋشى سانىن 25-تەن اسىرماي ءداستۇرلى فورماتتا وقىتۋ ۇيىمداستىرىلۋدا. ال ساباقتان تىس ۋاقىتتا ءبىلىم بەرۋ اكىمشىلىگىنىڭ شەشىمىنە سايكەس 15 ادامنان اسپايتىن توپتا جەكەلەي وقىتۋعا رۇقسات ەتىلەدى. بۇل شەشىمدەر نەگىزىندە ءبىز قالالىق باس سانيتاردىڭ قاۋلىسىنا سۇيەنەمىز، – دەدى ج.تاجيەۆا.
باسقارما باسشىسىنىڭ ايتۋىنشا، جوعارعى سىنىپ وقۋشىلارىن اتتەستاتتاۋ 9-سىنىپتاردا 28 مامىر – 7 ماۋسىم، ال 11-سىنىپتاردا 1–10 ماۋسىم ارالىعىندا بارلىق سانيتارلىق تالاپتى ساقتاي وتىرىپ ۇيىمداستىرىلادى. ودان بولەك، 1-سىنىپقا بالالاردى قابىلداۋ 11 قادامنان تۇراتىن نۇسقاما ارقىلى جۇرگىزىلەدى. قۇجاتتار ەلەكتروندى فورماتتا «ەلەكتروندىق ۇكىمەتتىڭ» ۆەب پورتالى ارقىلى 1 ساۋىردەن 1 تامىزعا دەيىن قابىلدانادى.
ءباسپاسوز ماجىلىسىندە جانات ارىسبەكقىزى بيىل وتەتىن ۇلتتىق بىرىڭعاي تەستىلەۋدىڭ ەرەكشەلىگىنە توقتالدى.
– بۇل جىلى ۇلتتىق بىرىڭعاي تەستىلەۋ بويىنشا تالاپكەرلەرگە 4 مۇمكىندىك بەرىلىپ وتىر. اقىلى تەستىلەۋدىڭ ءبىرىنشىسى قاڭتار ايىندا ءوتتى. ال ەكىنشىسى 10 ناۋرىز بەن 10 ءساۋىر ارالىعىندا ءوتىپ جاتىر. وسى ورايدا ۇمىتكەر اقىسىز گرانتقا ءتۇسۋ مۇمكىندىگى بويىنشا ءساۋىردىڭ 11-ءى مەن ماۋسىمنىڭ 30-ى ارالىعىندا 2 رەت ءوز باعىن سىناي الادى. ول ءۇشىن وقۋشى تەست تاپسىراتىن ورىندى، كۇندى جانە ۋاقىتتى ءوز قالاۋى بويىنشا تاڭدايدى، – دەدى باسقارما باسشىسى.
ايتا كەتەيىك، قالادا IV توقسان بارىسىندا اتا-انالارعا بالالارىنا مەكتەپ فورماسىن ساتىپ الۋدىڭ قاجەتى جوق. بۇل ءداستۇرلى ءتəرتىپ مىندەتتەلمەيدى. ياعني، وقۋشىلارعا ءبىلىم وشاعىنا ەركىن، ۇقىپتى جانە جيناقى كيىمدە بارۋعا رۇقسات بەرىلىپ وتىر.
ەسكەرتەتىن جايت، ءبىلىم بەرۋ ۇيىمدارىندا ساباق وقىتۋ بارىسىندا بارلىق سانيتارلىق تالاپ ساقتالادى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – ەرنار مامىر
