شىمكەنت قالاسىندا اۋا تەمپەراتۋراسىنىڭ تومەندەۋىنە بايلانىستى جىلىتۋ ماۋسىمى ۇزارتىلدى. ءساۋىر ايىنىڭ العاشقى كۇندەرىندە سينوپتيكتەردىڭ بولجاۋىنشا اۋا تەمپەراتۋراسى تۇندە تومەندەۋى كۇتىلۋدە. وسى سەبەپتى قالا اكىمىنىڭ وكىمىمەن جىلىتۋ ماۋسىمى ۇزارتىلىپ، 5 ساۋىردە توقتاتۋ تۋرالى شەشىم شىعارىلدى. بۇل جونىندە قالالىق ەنەرگەتيكا جانە كوممۋنالدىق شارۋاشىلىق باسقارماسى ءمالىم ەتتى.
ولاردىڭ ايتۋىنشا، ءماسليحات قابىلداعان جىلىتۋ ماۋسىمىن وتكىزۋ ەرەجەسىنە سايكەس جىلىتۋ ماۋسىمىن 23 ناۋرىزدا توقتاتۋ كەرەك بولعان. بىراق، دەنساۋلىق ساقتاۋ باسقارماسىنا قاراستى مەكەمەلەردىڭ وتىنىشتەرى مەن قالاداعى كارانتينگە وراي جانە اۋا تەمپەراتۋراسىنىڭ تومەندەۋىنە بايلانىستى ۇزارتىلىپ وتىر.
ەرەجەگە سايكەس، اۋا-رايى 5 تاۋلىك بويى +8 گرادۋس جانە ودان جوعارى بولعان جاعدايدا جىلىتۋ ماۋسىمى توقتاتىلۋى ءتيىس. ايتا كەتەيىك، 2020 جىلى جىلىتۋ ماۋسىمى 1 ساۋىردە توقتاتىلعان بولاتىن.
شىمكەنت قالاسى اكىمدىگىنىڭ ءباسپاسوز قىزمەتى
