Shymkent qalasynda aýa temperatýrasynyń tómendeýine baılanysty jylytý maýsymy uzartyldy. Sáýir aıynyń alǵashqy kúnderinde sınoptıkterdiń boljaýynsha aýa temperatýrasy túnde tómendeýi kútilýde. Osy sebepti qala ákiminiń ókimimen jylytý maýsymy uzartylyp, 5 sáýirde toqtatý týraly sheshim shyǵaryldy. Bul jóninde qalalyq energetıka jáne kommýnaldyq sharýashylyq basqarmasy málim etti.
Olardyń aıtýynsha, máslıhat qabyldaǵan jylytý maýsymyn ótkizý erejesine sáıkes jylytý maýsymyn 23 naýryzda toqtatý kerek bolǵan. Biraq, densaýlyq saqtaý basqarmasyna qarasty mekemelerdiń ótinishteri men qaladaǵy karantınge oraı jáne aýa temperatýrasynyń tómendeýine baılanysty uzartylyp otyr.
Erejege sáıkes, aýa-raıy 5 táýlik boıy +8 gradýs jáne odan joǵary bolǵan jaǵdaıda jylytý maýsymy toqtatylýy tıis. Aıta keteıik, 2020 jyly jylytý maýsymy 1 sáýirde toqtatylǵan bolatyn.
Shymkent qalasy ákimdiginiń baspasóz qyzmeti
