شاعىن جانە ورتا بيزنەستى دامىتۋدا مەملەكەتتىك باعدارلامالاردىڭ كومەگى زور. وسى باعدارلامالار ارقاسىندا بۇگىندە ءوز كاسىبىن اشىپ، شارۋاسىن دوڭگەلەتكەندەردىڭ سانى ارتىپ كەلەدى. سولاردىڭ ءبىرى - شىمكەنت قالاسىنىڭ تۇرعىنى بەكجان ەرنازاروۆ. جاسى 32-دە.
ول بىلتىرعى جىلدىڭ شىلدە ايىندا «باستاۋ بيزنەس» كاسىپكەرلىك نەگىزدەرى جوباسىمەن وقىپ، سەرتيفيكات الىپ، قايتارىمسىز مەملەكەتتىك گرانتقا قۇجات وتكىزگەن. ناتيجەسىندە بيزنەس جوباسىن ءساتتى قورعاپ، قىركۇيەك ايىندا «ەڭبەك» مەملەكەتتىك باعدارلاماسى شەڭبەرىندە گرانتقا يە بولدى.
جاس شەبەر قازىرگى تاڭدا ساندىق شەبەرحاناسىن اشىپ، تاپسىرىسقا زاماناۋي ۇلگىدە ءتۇرلى ويۋ-ورنەكتەلگەن ساندىقتاردى، قىز-جاساۋ جانە ت.ب زاتتاردى جاساۋدى قولعا العان. بەكجان بۇل شەبەرلىكتى ءوزى ۇيرەنگەن.
«وزىمە ۇنايتىن ىسپەن اينالىسىپ، تاپسىرىس جاساۋشىلاردىڭ كوڭىلىنەن شىعۋعا تىرىسامىن. ءار قازاقتىڭ ۇيىندە وسىنداي ويۋ-ورنەگى بار ساندىقتاردىڭ بولۋى كەرەك» دەيدى جاس كاسىپكەر. الداعى ۋاقىتتا ءوز ءىسىن دامىتىپ، ساپالى جيھازداردى جاساۋدى دا جوسپارلاپ وتىر.
ايتا كەتەيىك، شىمكەنت قالاسىندا وتكەن جىلى «ەڭبەك» مەملەكەتتىك باعدارلاماسى اياسىندا 5 مىڭنان استام ازاماتتىڭ ارقايسىسى 200 ايلىق ەسەپتىك كورسەتكىشتى قۇرايتىن قارجىلاي قولداۋعا يە بولعان. مەملەكەتتىك گرانت نەگىزىندە قايتارىمسىز قاراجات العان قالا تۇرعىندارى ءوز ىستەرىن باستاپ وتىر. ولار كوبىنەسە تىگىن، قولونەر شەبەرحاناسى، كونديتەرلىك ونىمدەر ازىرلەۋ مەن مال شارۋاشىلىعىنا تاڭداۋ بىلدىرگەن.
شىمكەنت قالاسى اكىمدىگىنىڭ ءباسپاسوز قىزمەتى
