قازاقستاندىقتار ەمير ەسىمدى ءبۇلدىرشىننىڭ ەمىنە ميلليارد تەڭگە جينادى. 29 ناۋرىزدا بۇل تۋرالى ەميردىڭ اتا-اناسى سابينا داۋلەتكاليەۆا مەن تالەح شاحماروۆ Instagram جەلىcىندە باياندادى، دەپ حابارلايدى "ادىرنا" ءتىلشىسى.
"ەميردىڭ ەمىنە ارنالعان قور جابىلدى. بىزگە كورسەتكەن قولداۋلارىڭىز بەن سەنىمدەرىڭىز ءۇشىن بارلىعىڭىزعا زور العىسىمىزدى بىلدىرگىمىز كەلەدى. ويتكەنى بۇل سوممانى جيناۋ، تەك سىزدەردىڭ ارقالارىڭىزدا مۇمكىن بولدى. سونىمەن قاتار بىزگە ۇلكەن سومانى جيناۋعا ۇلەس قوسقان باس ءانونيمدى سيقىرشىمىزعا العىس ايتامىز. قوردى جابىق دەپ جاريالاۋىمىزدىڭ بىردەن-ءبىر فاكتورى ءبىز، ەميردى ەمدەتۋگە رەسەيگە كەتەتىنىمىزدى اتاپ وتكىمىز كەلەدى. بۇل عاجايىپتىڭ "قايىرىمدىلىق گەوگرافياسى" (گەوگرافيا دوبرا) قورى مەن دارىگەرلەردىڭ ارقاسىندا ورىن العاندىعىن اتاپ وتكىمىز كەلەدى. مۇمكىن ەمەس بولىپ كورىنەتىن بۇل ۇلكەن قوردى جابۋ، قازاقستانداعى جۇلىن بۇلشىقەت اتروفياسىمەن(جبا) اۋىراتىن باسقا وتباسىلاردىڭ بالالارىنىڭ ءومىرى ءۇشىن كۇرەستى نىعايتۋعا جانە قوعام مەن ءبىزدىڭ دەنساۋلىق ساقتاۋداعى ماسەلەنىڭ شەشىمى بولاتىندىعىن كورسەتكەندەي. قازاقستانداعى جبا-مەن اۋىراتىن 200-گە جۋىق ناۋقاس، ونىڭ ىشىندە ەرەسەكتەر مەن بالالار بار. ولار دا وسى عاجايىپتىڭ ورىن الۋىن كۇتۋدە. بۇل عاجايىپ، مەملەكەت جاساۋى كەرەك عاجايىپ. قازاقستاندا تىركەلمەگەن "سپينرازا" پرەپاراتىن جەدەل تىركەۋ، بۇل بولاشاققا دەگەن، ءومىر سۇرۋگە دەگەن قۇقىعى بار جانداردىڭ ارمانى", - دەپ جازدى ەميردىڭ اتا-اناسى Instagram پاراقشاسىنداعى جازباسىندا.
اقساي قالاسىنىڭ تۇرعىندارى، شاحماروۆتار وتباسىنىڭ كىشكەنتاي عانا پەرىشتەسى ەمير "جۇلىن بۇلشىقەتىنىڭ اتروفياسى" دياگنوزىمەن اۋىراتىن. اۋرۋدىڭ دامۋىن توقتاتۋ ءۇشىن ەكى جاسقا تولعانعا دەيىن «زولگەنسما» ينەكتسياسىن الۋ كەرەك. بۇل پرەپاراتتىڭ قۇنى ءبىر ميلليارد تەڭگەنى قۇرايدى.
ەميردىڭ ەمىنە ارنالعان ۇلكەن قورعا ءتۇرلى بلوگەرلەر مەن انشىلەر، قوعام بەلسەندىلەرى مەن تانىمال جاندار ات سالىسقان ەدى. ايتا كەتەر بولساق، تانىمال بلوگەر "JanSerigi" قايىرىمدىلىق قورىنىڭ اۆتورى، بۇعان دەيىن دە تالاي جاننىڭ ارمانىن ورىنداۋعا ۇلەسىن قوسقان جانسەرىك قادىرباەۆ ءبىر تاۋلىكتىڭ ىشىندە 30 ميلليون قاراجات جينادى. ونىڭ سوزىنشە، بۇل اۆتورلىق قورىنىڭ تاريحىندا العاش جينالعان قوماقتى سوما.
"ادىرنا" ۇلتتىق پورتالى
