پالەستينانىڭ گازا سەكتورىندا قالعان قازاقستاندىقتاردىڭ سانى اتالدى. بۇل تۋرالى سىرتقى ىستەر ءمينيسترىنىڭ ءبىرىنشى ورىنباسارى قايرات وماروۆ مالىمدەدى، دەپ حابارلايدى Kazinform.
«قازاقستاننىڭ 17 ازاماتى قالعان. قالعاندارى – سولاردىڭ وتباسى مۇشەلەرى. ءبىزدىڭ ازاماتتار تۋرالى ايتقاندا ولاردىڭ وتباسى مۇشەلەرى تۋرالى دا ايتامىز. بۇل ناقتى گازا سەكتورىنداعى جاعداي. اكەلىنگەن 99 ادامنىڭ ءبىر بولىگى – ەلىمىزدىڭ ازاماتتارى. قالعاندارى سولاردىڭ وتباسى مۇشەلەرى. شەكارادان شىققان كەزدە يزرايل مەن مىسىر تارابى ءبىز ۇسىنعان ءتىزىمدى تىڭعىلىقتى تەكسەرەدى. شەكارادان وتەتىن ادامداردىڭ اراسىندا تەرروريستەر جوقتىعىنا، ەلدەن شىعارعىسى كەلمەيتىن ادامدار ەمەستىگىنە كوز جەتكىزۋ كەرەك»، - دەدى قايرات وماروۆ.
سونداي-اق يزرايل اۋماعىنداعى قازاقستاندىقتاردىڭ ەسەبى ەرىكتى تۇردە جۇرگىزىلەتىندىكتەن، ناقتى قانشا ادام بارىن ءدال ايتۋ مۇمكىن ەمەستىگىن ءتۇسىندىردى. بۇعان دەيىن يزرايلدەن ەلگە ورالعىسى كەلەتىن قازاقستان ازاماتتارى ەۆاكۋتسيالانعانىن دا ەسكە سالدى.
بۇعان دەيىن گازا سەكتورىندا 161 قازاقستاندىق بار ەكەنى ايتىلعان بولاتىن.
«ءبىز ەۆاكۋاتسيا ۇيىمداستىرعان كەزەڭدە 161 ادام بولدى. ونىڭ 99-ى ەلگە كەلۋگە نيەت ءبىلدىردى. ءبىز سونداي مۇمكىندىك ۇسىندىق. بىرقاتار ازامات، 17 ادام مەن ونىڭ وتباسى مۇشەلەرى سوندا قالامىز دەگەن شەشىم قابىلدادى. ەۆاكۋاتسيادان ءتۇرلى سەبەپپەن باس تارتتى. ەلگە ورالۋعا كەلىسكەندەردى عانا اكەلدىك. بۇل باعىتتاعى جۇمىستارىمىز جالعاسادى. كەلەشەكتە قايتقىسى كەلەتىندەر بولسا، ولارمەن دە جۇمىس ىستەيمىز. قولدارىنا بيلەتى دايىن، ۇشىپ شىققىسى كەلىپ وتىرعان ازاماتتار بار. ولارمەن مىسىرداعى، يوردانياداعى، يزرايلدەگى وكىلدىكتەرىمىز جۇمىس ىستەپ جاتىر»، - دەدى سىرتقى ىستەر ءمينيسترىنىڭ ءبىرىنشى ورىنباسارى.
