رەسەيلىك بلوگەر يليا ۆارلاموۆ قازاقستانداعى تۇرمىستىق زورلىق-زومبىلىق تاقىرىبىندا تۇسىرگەن دەرەكتى فيلمىنە قاتىستى الەۋمەتتىك جەلىدە ايتىلعان سىن-پىكىرلەرگە جاۋاپ بەردى، دەپ حابارلايدى "ادىرنا" ءتىلشىسى.
ول ءوز فيلمىندە قازاقستاندى ورتالىق ازياداعى تۇرمىستىق زورلىق-زومبىلىقتىڭ «ەپيتسەنترى» دەپ اتاعان. وسىدان كەيىن الەۋمەتتىك جەلى قولدانۋشىلارىنىڭ پىكىرى ەكىگە ءبولىندى. ءبىرى قوعامداعى وزەكتى ماسەلەنى كوتەرگەنى ءۇشىن اۆتورعا قولداۋ بىلدىرسە، ەندى ءبىرى فيلم ەلدىڭ حالىقارالىق بەدەلىنە كەرى اسەر ەتەدى دەپ سىنعا الدى. ال يليا ۆارلاموۆ الەۋمەتتىك جەلىدەگى پاراقشاسىندا جاريالاعان جازباسىندا ءفيلمنىڭ نەگىزگى ماقساتى ەلدى قارالاۋ ەمەس، تۇرمىستىق زورلىق-زومبىلىققا قاتىستى جۇيەلى ماسەلەلەرگە نازار اۋدارتۋ ەكەنىن ايتتى.
«فيلمدە مەن قازاقستاندى تۇرمىستىق زورلىق-زومبىلىقتىڭ ەپيتسەنترى دەپ اتادىم. بىراق ءبىزدىڭ كەيىپكەرلەردىڭ ءبىرى مۇنى دالىرەك سيپاتتادى: "قازاقستان – تەك تۇرمىستىق زورلىق-زومبىلىقتىڭ ەپيتسەنترى ەمەس، قىلمىستاردى جۇيەلى تۇردە جاسىرۋدىڭ دا ەپيتسەنترى"»، – دەپ جازدى بلوگەر.
ول ءوز ءسوزىن دالەل رەتىندە فيلمدە باياندالعان بىرنەشە وقيعانى مىسالعا كەلتىردى. اتاپ ايتقاندا، انتونيدا سۋروۆانىڭ ءىسىن ەسكە سالدى. ونىڭ ايتۋىنشا، ايەل كۇيەۋىنىڭ ۇستىنەن پوليتسياعا سەگىز رەت ارىزدانعان. كۇدىكتى ۋاقىتشا قاماۋعا الىنعانىمەن، وعان قاتىستى قىلمىستىق ءىس قوزعالماعان. كەيىن بۇل وقيعا ايەلدىڭ قازا بولۋىمەن اياقتالعان
