سقو اۋداندارىنىڭ ءبىرىنىڭ ءبىلىم قىزمەتكەرلەرى از قامتىلعان وتباسىلاردان شىققان بالالارعا ارنالعان نوۋتبۋكتەردى جىمقىردى دەگەن كۇدىككە ءىلىندى، دەپ حابارلايدى «ادىرنا» ءتىلشىسى وبلىستىق سىبايلاس جەمقورلىققا قارسى قىزمەتكە سىلتەمە جاساپ.
سولتۇستىك قازاقستان وبلىسى بويىنشا سىبايلاس جەمقورلىققا قارسى قىزمەتى وبلىس اۋداندارى اكىمدىكتەرىنىڭ بىرىندەگى ءبىلىم ءبولىمىنىڭ قىزمەتكەرلەرىنە قاتىستى سوتقا دەيىنگى تەرگەۋدى باستادى.
ولار پاندەميا كەزىندە از قامتىلعان وتباسىلاردان شىققان اۋدان مەكتەپتەرىنىڭ وقۋشىلارى ءۇشىن ءبىلىم باسقارماسىمەن قر ۇكىمەتىنىڭ شۇعىل شىعىندارعا ارنالعان رەزەرۆى ەسەبىنەن ساتىپ الىنعان نوۋتبۋكتەردىڭ ءبىر بولىگىن ۇرلادى دەگەن كۇدىككە ءىلىندى.
«جاسالعان قىلمىستان مەملەكەتكە كەلتىرىلگەن زالال قۇنى 12 ملن. تەڭگەدەن اسقان.قالعان ءمان-جايلار تەرگەۋ مۇددەسىندە جاريا ەتۋگە جاتپايدى. ىس بويىنشا تۇپكىلىكتى شەشىم تەرگەۋ ارەكەتتەرىن جۇرگىزۋ ناتيجەلەرى بويىنشا قابىلداناتىن بولادى»،-دەپ مالىمدەدى ۆەدومستۆو.
«ادىرنا» ۇلتتىق پورتالى
