بۇگىن شىمكەنتتەگى ءال-فارابي اتىنداعى عىلىمي-امبەباپ كىتاپحانادا «ءال-فارابي مۇراسى – وركەنيەت قازىناسى» تاقىرىبىندا حالىقارالىق عىلىمي-تەوريالىق كونفەرەنتسيا ءوتتى.
ۇلى عۇلاما ءال-ءفارابيدىڭ 1150 جىلدىعىنا ارنالعان جيىندى تاريح عىلىمدارىنىڭ دوكتورى، پروفەسسور، اكادەميك ساتتار ماجيتوۆ جۇرگىزسە، ءىس – شارانى شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان اشىپ بەردى.
«بۇگىنگى كونفەرەنتسيا رەسپۋبليكالىق كولەمدە ءوتىپ جاتىر. شىمكەنت قالاسى ءال-فارابي مۇراسىن تەرەڭ زەرتتەۋگە ۇلكەن باسىمدىق بەرىپ وتىر. «وتىرار» كىتاپحاناسىنا ءال-ءفارابيدىڭ اتىن بەرىپ، بولاشاقتا «فارابيتانۋشى» كىتاپحانا ەتۋ جوسپارىمىزدا بار. سەبەبى، عۇلاما شىمكەنت پەن تۇركىستاننىڭ اراسىندا ورنالاسقان - وتىراردا ءبىلىم ىزدەپ، شىعىسقا بارىپ عىلىم شىڭىنا شىققان. سوندىقتان مۇنداي ۇلكەن كىتاپحانىنىڭ ءال-فارابيدىڭ اتىمەن اتالۋى زاڭدىلىق، - دەدى شىڭعىس مۇقان.
كونفەرەنتسيادا ءابۋ ناسىر ءال-ءفارابيدىڭ عىلىمي تراكتاتتارىنىڭ نەگىزگى پرينتسيپتەرى تالقىلانىپ، عىلىمي جۇمىستارىن زەرتتەۋ بويىنشا عىلىمي جۇمىستاردىڭ بىرىڭعاي دەرەكقورىن قۇرۋ جانە ونىڭ شىعارمالارىن ناسيحاتتاۋ ءسوز بولدى. ءابۋ ناسىر ءال-ءفارابيدىڭ باي شىعارماشىلىق جانە عىلىمي مۇراسىنا حالىقتىڭ جانە جۇرتشىلىقتىڭ نازارىن اۋدارۋ، عىلىمي مۇراسىن زەرتتەۋ، عالىمنىڭ عىلىمي ماتەريالدارى بويىنشا بىرىڭعاي دەرەكتەر بازاسىن قۇرۋ ماسەلەسى ايتىلدى.
اتالعان ءىس-شاراعا فيلوسوفيا عىلىمدارىنىڭ دوكتورى، پروفەسسور ءابساتتار دەربىسالى، بەلگىلى عالىم، فيلوسوفيا عىلىمدارىنىڭ دوكتورى، پروفەسسور عاريفوللا ەسىم جانە ەلىمىزدىڭ زيالى قاۋىم وكىلدەرى مارحابات بايعۇت، ساتتار ماجيتوۆ، ءۇمىتحان مۇڭالباەۆا، بارشاگۇل قاشقانقىزى مەن ابدۋللا جۇماشەۆ قاتىسۋدا. سونىمەن قاتار، فرانتسيانىڭ ەڭبەك سىڭىرگەن پروفەسسورى البەرت فيشلەر مەن اقش-تىڭ وگايو ۋنيۆەرسيتەتىنىڭ پروفەسسورى دجەيمس پاتريك ونلاين قوسىلىپ، اعارتۋشى عالىمدى ۇمىتپاي، ەڭبەكتەرىن وسكەلەڭ ۇرپاققا تانىتىپ جاتقاندارى ءۇشىن قازاق ەلىنە العىسىن ءبىلدىردى.
شىمكەنت قالاسى اكىمدىگىنىڭ ءباسپاسوز قىزمەتى
